સ્વાસ્થ્ય / આ અનસેફ ફુડથી દુર રહેશો તો સ્વસ્થ રહેશો

સોડા અને સોફ્ટ ડ્રિંક્સ
વાત ભલે સોડાની હોય કે સોફ્ટ ડ્રિંક્સની કે ડાયેટ કોકની. તેના નિર્માણમાં લિક્વિડ શુગરનો પ્રયોગ થાય છે. તેમાં રહેલુ ફોસ્ફોરિક એસિડ ફુડપાઇપથી લઇને લિવર સુધીની કોશિકાઓ પર અસર કરે છે. આ સિવાય તેમાં રહેલુ રસાયણ સોડિયમ ક્લોરાઇડ બ્લડ પ્રેશરને અનિયંત્રિત કરવા માટે જવાબદાર હોય છે. જે આગળ જતા હ્રદયના કાર્યને પ્રભાવિત કરે છે.

નકલી માખણ
મોટાભાગે બજારોમાં ખાદ્ય સામગ્રીને પકવવા કે ફ્રાઇ કરવા માટે અસલીના બદલે નકલી માખણનો ઉપયોગ થાય છે. ઘણા નિષ્ણાતોના જણાવ્યા મુજબ તેમાં સીમિત માત્રા કરતા વધુ કોલેસ્ટ્રોલ મળી આવે છે. તેના નિયમિત ઉપયોગથી મેદસ્વીતા, ડાયાબીટિસ જેવા રોગોની શક્યતાઓ વધી જાય છે. જરુરિયાત કરતા વધુ આવુ નકલી માખણ ખાવાથી ચરબી પેટની લાઇનિંગ પર જામીને ત્યાંની કોશિકાઓ પર જામે છે અને કેન્સરનો ખતરો વધી જાય છે.

ટોમેટો સોસ
સ્ટોર કે માર્કેટમાંથી ખરીદેલા ટોમેટો સોસમાં આર્ટિફિશિયલ કલર, રિફાઇન્ડ શુગર, કોર્ન સીરપ અને સોડિયમની માત્રા વધુ હોય છે. આ તત્વ તણાવ, હાઇ બ્લડ પ્રેશર, મેદસ્વીતા અને હ્રદય રોગ સાથે જોડાયેલી બીમારીઓને વધારવા માટે જવાબદાર છે. નિષ્ણાતો તેના બદલે ઘરે તૈયાર કરેલા ટોમેટો સોસનો ઉપયોગ કરવાની સલાહ આપે છે. સામાન્ય રીતે માર્કેટમાં મળતા પેક્ડ કેચઅપમાં ઘણી વાર ખરાબ ટામેટોનો પણ ઉપયોગ કરી લેવાય છે.

પિત્ઝા અને બર્ગર
અત્યારના જમાનામાં બાળકોથી લઇને મોટા બધાને બર્ગર અને પિત્ઝા જેવા ફુડ આકર્ષે છે, પરંતુ શરીરને તેનાથી જેટલુ નુકશાન થાય છે તેટલુ બીજા કશાથી થતુ નથી. તેમાં સૌથી વધુ ફ્રોઝન પિત્ઝા આરોગ્ય પર ભારે પડે છે. તેમાં સીમિત માત્રામાં સોલ્ટ અને શુગરની સાથે એવા મસાલા હોય છે જે આંતરડાને નુકશાન પહોંચાડે છે. તેમાં રહેલા પ્રિઝર્વેટીવ કેમિકલ્સ અન્નનળી અને મોઢાના કેન્સરને બળ આપે છે.

આર્ટિફિશિયલ સ્વીટનર
કૃત્રિમ સ્વીટનરમાં સેકરિન મળી આવે છે. જેનો શુગરના રુપમાં પ્રયોગ કરાય છે. સાચી વાત એ છે કે સ્વીટનર્સ ચરબી વધારવાનુ કામ કરે છે. આ સ્વીટનર્સ પેન્ક્રિયાઝ ઉપરાંત કિડનીને પણ ડેમેજ કરે છે. આંતરડા તેને સંપુર્ણ રીતે શોષી શકતા નથી તેથી આંતરડા સાથે જોડાયેલા અંગોની લાઇનિંગ પર તે જામી જાય છે. ઘણી વાર તે પથરીનું રુપ પણ લઇ શકે છે.