મોંઘવારી / ભાર વગરના ભણતર પર મોંઘવારીનો ભાર, આ વખતે સ્ટેશનરીના ભાવમાં વાલીઓને દઝાડશે

• આ વર્ષે  પાઠ્યપુસ્તકોના ભાવમાં 20 થી 25 %નો ભાવ વધારો 
• વિદ્યાર્થી દીઠ આશરે રૂ.1000નો ખર્ચ વધ્યો
• ભાવ વધારા પાછળનું મુખ્ય કારણ પેટ્રોલ અને ડીઝલ 

આ વર્ષે પણ સ્ટેશનરીના ભાવમાં 20થી25 ટકાનો ભાવ વધારો 

ઉનાળુ વેકેશન પૂરું થવાની સાથે જ શાળા શરૂ થવાની ગણતરી અંતર્ગત વાલીઓ સ્ટેશનરીનું બજેટ પ્લાનિંગ કરી રહ્યાછે. જોકે કેટલીક કેન્દ્રીય શાળાઓમાં નવું શૈક્ષણિક વર્ષ પણ શરૂ થઇ ચૂક્યું છે. સ્ટેશનરી સહિત નોટબુકના વધેલા ભાવના કારણે વાલીઓમાં ચિંતા છે. દર વર્ષની જેમ આ વર્ષે પણ નોટબુક અને પાઠ્યપુસ્તકોના ભાવમાં 20થી25 ટકાનો ભાવ વધારો જોવા મળી રહ્યો છે. ત્યારે વાલીઓનું બજેટ ખોરવાઈ ગયું છે.

ભાવ વધારા પાછળનું મુખ્ય કારણ પેટ્રોલ અને ડીઝલ  

આ વર્ષે ભાવ વધારા પાછળનું મુખ્ય કારણ પેટ્રોલ અને ડીઝલ છે. તેના ભાવમાં વધારો થતાં સીધી અસર ટ્રાન્સપોર્ટ પર પડી છે અને તેનાં પરિણામે દરેક ચીજ વસ્તુઓ મોંઘી થઇ છે. જેમાં સ્ટેશનરીનો પણ સમાવેશ થયો છે.  આ ઉપરાંત કાગળના ભાવમાં વધારો થવાના કારણે ચોપડીઓ અને નોટબુકો મોંઘાં થયાં છે ગાઈડ, નોટબુક, ફૂલ સ્કેપ સહિત વિવિધ સ્ટેશનરીમાં વધારો નોંધાતાં વાલીઓ માટે સંતાનોનું ભણતર ભારણરૂપ બની રહ્યું છે.

સ્ટેશનરી સહિત યુનિફોર્મમાં પણ 25 ટકા વધારો 

સ્ટેશનરીમાં બોલપેન, કંપાસ, સ્કેચબુક ઉપરાંત વોટર બોટલ, યુનિફોર્મ સહિતની અનેક વસ્તુઓમાં 25 ટકા વધારો થયો છે. કંપાસ, બોલપેન વગેરેમાં લોખંડનો મોટા પ્રમાણમાં ઉપયોગ થાય  છે. હાલ લોખંડનાં ભાવમાં વધારો થવાથી અને લોખંડની અછત સર્જાતાં આવી તમામ વસ્તુઓ મોંઘી થઈ છે. બીજી તરફ કાગળની પણ અછત જોવા મળી રહી છે. એડ્વાન્સ રકમ આપવા છતાં માલ મળતો નથી. જેની સીધી અસર બાળકોની ટેક્સ્ટ બુક તેમજ નોટબુકના ભાવોમાં જોવા મળી રહી છે. અને તેમાં પણ 25 ટકા જેટલો વધારો નોંધાયો છે

વિદ્યાર્થી દીઠ આશરે રૂ.1000નો ખર્ચ વધ્યો

નોટબુક અને ચોપડામાં રૂા. 5થી 10નો વધારો થયો છે. એ જ રીતે સ્કૂલબેગમાં બાળકોને મનગમતાં કાર્ટૂન પાત્ર છોટા ભીમ, સ્પાઈડરમેન, મોટુ પતલુ, બાહુબલિ, ડાઈનાસોર જેવી છાપવાળી કલરફૂલ બેગના રૂ. 150થી 250 અગાઉના ભાવમાં વધારો થઇને હાલ રૂા. 300થી 450ના ભાવે વેચાણમાં છે. ઉપરાંત લંચબોકસ અને કંપાસના ભાવોમાં પણ વધારો થયો છે. સરેરાશ તમામ ચીજવસ્તુઓ ખરીદતાં વાલીઓનાં ખિસ્સાં પર વિદ્યાર્થી દીઠ સરેરાશ રૂ.1000નો ભાર વધ્યો છે.