ગાંધીનગર / 'ઉડતા ગુજરાત' કરતા 'પકડતા ગુજરાત' કહો', વિપક્ષના કટાક્ષ પર હર્ષ સંઘવીનું નિવેદન

• ગુજરાતમાં ડ્રગ્સ મામલે વિધાનસભામાં ગરમાવો 
• સુખરામ રાઠવાએ ડ્રગ્સ મામલે કર્યો સરકારને ઘેરવા પ્રયાસ
• ઉડતા ગુજરાત કરતા પકડતા ગુજરાત કહેશો તો પોલીસનું મનોબળ વધશે : હર્ષ સંઘવી

ગુજરાતમાં ડ્રગ્સ પકડવામાં 'ડ્રગ્સ રિવોર્ડ પોલિસી' ખૂબ મહત્વની સાબિત થઈ છે રાત દિવસ કામ કરીને ડ્રગ્સ પકડતી ગુજરાત પોલીસનું મનોબળ તોડવાનું કોંગ્રેસ બંધ કરે, રાજ્યના યુવાધનના હિતમાં ચાલી રહેલા ડ્રગ્સ નાબૂદી અભિયાન વિરુદ્ધ કોંગ્રેસે રાજનીતિ ન કરવી જોઈએ, ગુજરાત પોલીસે કેન્દ્રીય એજન્સીઓ સાથે મળીને ભારત-પાકિસ્તાન બોર્ડર, મહારાષ્ટ્ર, પંજાબ, પશ્ચિમ બંગાળ અને દિલ્હી જેવાં રાજ્યોમાંથી ડ્રગ્સ માફિયાઓને પકડ્યા છે

૬,૫૦૦ કરોડના ડ્રગ્સ સાથે ૭૪૦ ગુનેગારોને જેલના હવાલે: હર્ષ સંઘવી
ગૃહ રાજયમંત્રી હર્ષ સંઘવીએ વિધાનસભા ગૃહમાં ચર્ચા દરમિયાન જણાવ્યું હતું કે, આ ઉડતું નહિ, પણ ડ્રગ્સ પકડતું ગુજરાત છે. ગુજરાતમાં ડ્રગ્સ પકડાયું નથી, પણ ગુજરાત પોલીસની સતર્કતાથી ગુજરાતમાં ડ્રગ્સ અને ડ્રગ્સ માફિયાઓને પકડવામાં આવે છે. મુખ્યમંત્રી ભૂપેન્દ્ર પટેલના સતત માર્ગદર્શનમાં છેલ્લા એક વર્ષમાં રૂ. ૬,૫૦૦ કરોડના ડ્રગ્સ સાથે ૭૪૦ ગુનેગારોને જેલના હવાલે કરવામાં આવ્યાં છે. આટલું જ નહિ પણ તેમાંથી એક પણ ગુનેગારને આજ સુધી જામીન મળ્યા નથી. 

રાજ્યોમાંથી પકડાયેલા ડ્રગ્સના તાર પંજાબની જેલ સુ઼ધી જાય છે: સંઘવી
રાજ્ય સરકાર દ્વારા ગુજરાતમાં ડ્રગ્સ પકડવા માટે અમલમાં મુકાયેલી ઐતિહાસિક 'ડ્રગ્સ રિવોર્ડ પોલિસી'ની ભૂમિકા ખૂબ જ મહત્વની સાબિત થઈ છે એમ જણાવી મંત્રીશ્રીએ વિપક્ષ પર પ્રહાર કરતાં કહ્યું હતું કે, રાત-દિવસ જીવના જોખમે ફરજ બજાવીને ડ્રગ્સ પકડતી ગુજરાત પોલીસનું મનોબળ તોડવાનું કોંગ્રેસ બંધ કરે. રાજ્યના યુવાધનના હિતમાં ચાલી રહેલા ગુજરાત પોલીસના ડ્રગ્સ નાબૂદી અભિયાન વિરુદ્ધ કોંગ્રેસે રાજનીતિ ન કરવી જોઈએ. એટલું જ નહિ, ગુજરાત પોલીસે કેન્દ્રીય એજન્સીઓ સાથે મળીને ભારત-પાકિસ્તાન બોર્ડર, મહારાષ્ટ્ર, પંજાબ, પશ્ચિમ બંગાળ, હરિયાણા અને દિલ્હી જેવાં રાજ્યોમાંથી ડ્રગ્સ અને ડ્રગ્સ માફિયાઓને પકડ્યા છે. વિવિધ રાજ્યોમાંથી પકડાયેલા ડ્રગ્સના તાર પંજાબની જેલ સુ઼ધી જાય છે. ડ્રગ્સ સામેનો આ જંગ સૌ સાથે મળીને જીતવાનો છે અને ભાવિ પેઢીનું ભવિષ્ય ઉજ્જવળ બનાવવાનું છે. પશ્ચિમી દેશોમાં ડ્રગ્સનું સેવન એ ફેશન સ્ટેટસ બની ગયું છે. ગુજરાતના યુવાનોમાં આ દૂષણ ન ફેલાય તે જોવાનું કામ આપણા સૌનું છે. 

ગુજરાત કોંગ્રેસમુક્ત નહી પણ ડ્રગ્સયુક્ત થઈ રહ્યુ છે : સુખરામ રાઠવા
ગુજરાતમાં ડ્રગ્સ મામલે વિધાનસભામાં ગરમાવો જોવા મળ્યો છે...સુખરામ રાઠવાએ ડ્રગ્સ મામલે સરકારને ઘેરવા પ્રયાસ કર્યા છે...તેમણે નિવેદન આપતા રહ્યું કે ડ્રગ્સ ઠલવાય છે તે કંપનીઓનું લાયસન્સ રદ થવુ જોઈએ.ગુજરાત કોંગ્રેસમુક્ત નહી પણ ડ્રગ્સયુક્ત થઈ રહ્યુ છે. 

સીધું ભવન રોડ પર ડ્રગ્સનો વેપલો: ધારાસભ્ય વિરજી ઠુમ્મર
વિધાનસભા ગૃહમાં ડ્રગ્સનો મામલો ગરમાયો હતો. ડ્રગ્સ મામલે ધારાસભ્ય વિરજી ઠુમ્મરે દાવા સાથે કહ્યું હતું કે મારી સાથે ચાલો હર્ષભાઇ, અમદાવાદમાં ડ્રગ્સ ક્યાં મળે છે બતાવું, સીધું ભવન રોડ પર ડ્રગ્સ વેચાય છે. કેવી રીતે વેચાય છે હું બતાવીશ.