રાજ્યમાં રોજના 6 હજાર મેગાવોટ સોલાર અને વિંડ એનર્જીનું ઉત્પાદન, કુલ 40 હજાર મેગાવોટની ક્ષમતા સામે વપરાશ 21 હજાર મેગાવોટ
વીજ સંકટ પર મંત્રી કનુ દેસાઈનુ નિવેદન
"ગુજરાતમાં પૂરતો વીજ પુરવઠો"
"ગુજરાત પાવર કટથી બચી શક્યુ"
વાપીના મોરાઇ માં એક કાર્યક્રમમાં ઉપસ્થિત નાણા અને ઉર્જા મંત્રી કનુ દેસાઇએ વીજસંકટ પર નિવેદન આપતા કહ્યું છે કે સમગ્ર દેશમાં ગુજરાત જ એક એવું રાજ્ય છે જે પાવર કટની સમસ્યાથી બચી શક્યું છે. આ સાથે તેમણે પીએમ મોદીના વખાણ કરતાં કહ્યું હતું કે ગુજરાત વડાપ્રધાન નરેન્દ્ર મોદીનું આભારી છે. કારણ કે.નરેન્દ્ર મોદીના પ્રયાસોથી જ રાજ્યમાં અત્યારે રોજના 6 હજાર મેગાવોટ સોલાર અને વિન્ડ એનર્જી ઉપલબ્ધ થઈ રહી છે
રકતદાન શિબિરમાં આપી હાજરી
મહત્વનું છે કે વાપી નજીક આવેલા મોરાઈ ઇન્ડસ્ટ્રિઅલ એસોસિએશન દ્વારા આજે મહારક્તદાન કેમ્પ નું આયોજન કરવામાં આવ્યું હતું. જેમાં મોરાઇની એમિગો અને જાણીતી વેલસ્પન નામની કંપનીઓમાં કર્મચારીઓને કામદારોએ રક્તદાન કેમ્પનું આયોજન કર્યું હતું. આ પ્રસંગે નાણા અને ઉર્જા મંત્રી કનુ દેસાઇએ રક્તદાન કેમ્પમાં ઉપસ્થિત રહી અને રક્તદાન કરનાર કર્મચારીઓ અને કામદારો નો ઉત્સાહ વધાર્યો હતો.
ગેસ આધારિત વીજ પ્લાન્ટ બંધ
આ મુલાકાત બાદ મીડિયા સાથેની વાતમાં તેઓએ વર્તમાન સમયમાં રાજ્યમાં વીજળીની સમસ્યા અંગે વાત કરી હતી સાથે જ વીજળી અને ગેસ ના ભાવ વધારા અંગે ના સવાલ ના જવાબ માં ઉર્જા મંત્રી કનુભાઇ દેસાઇએ જણાવ્યું હતું કે સમગ્ર વિશ્વમાં અત્યારે યુક્રેન અને રશિયાના યુદ્ધને કારણે ગેસ પૂરવઠામાં સમસ્યા સર્જાઈ છે. આથી દેશના ગેસ આધારિત વીજ પ્લાન્ટ બંધ છે વીજળી નો સંપૂર્ણ મદાર ઈમ્પોર્ટેડ કોલસા આધારિત છે. તેમ છતાં વડાપ્રધાન નરેન્દ્ર મોદીના પ્રયાસોથી અત્યારે રાજ્યમાં રોજના 6 હજાર મેગાવોટ જેટલું સોલાર અને વિન્ડ એનર્જીનો ઉત્પાદન થઇ રહ્યું છે. સાથે જ કોલસા આધારિત જ વીજ ઉત્પાદન થી રાજ્યના ઉદ્યોગો અને રહેણાક વિસ્તાર ને પૂરતો વીજ પુરવઠો મળી રહ્યો છે.
ગુજરાતમાં કેટલો વીજ વપરાશ
આ ઉપરાંત તેઓએ કહ્યું હતું કે ગુજરાતનો અત્યારનો વીજળી વપરાશ 21 હજાર મેગા વોટ થયો છે. આપણી જે ક્ષમતા 40 હજાર મેગા વોટ કરતા પણ વધારે છે. પરંતુ જે સોલાર પાવરની મર્યાદા હોય છે. યૂક્રેન યુદ્ધના કારણે તમામ ગેસ પાવર પ્લાન્ટ સમગ્ર દેશમાં બંધ થયા છે. આખા દેશમાં આપણુ રાજ્ય જ એવું છે જેમણે વીજ કટોકટીનો સામનો નથી કર્યો. ખેડૂતોને પૂરતા પ્રમાણમાં વિજળી મળી છે. આપણા ગુજરાતનો સરેરાશ વપરાશ પર હેડ વાર્ષિક વ્યક્તિ દીઠ 2100 યુનિટ છે. જ્યારે સમગ્ર દેશમાં યુનિટ દીઠ વ્યક્તિ દીઠ વપરાશ 1100 યુનિટ છે. આટલો મોટો ડિફરન્સ છે જે બતાવે છે કે આખા દેશમાં આપણુ રાજ્ય પ્રથમ હરોળનું રાજ્ય છે.