હીરા અને ટેક્સટાઇલ ઉદ્યોગોએ નવી ઓળખ આપી છેઃ હર્ષ સંઘવી
સુરતના સરથાણા કનવેન્શ હોલ ખાતે ઈન્ટરનેશનલ ટેક્સટાઇલ એક્સ્પોનું આયોજન કરાયું છે. ચેમ્બર ઓફ કોમર્સ દ્વારા 07થી 09 જાન્યુઆરી સુધી ઈન્ટરનેશનલ ટેક્સટાઇલ એક્સ્પોનું આયોજન કરવામાં આવ્યું છે. જેના ઉદ્ધાટન પ્રસંગે આજે ગૃહ રાજ્યમંત્રી હર્ષ સંઘવી, ટેક્સટાઈલ એન્ડ રેલવે રાજ્યમંત્રી દર્શનાબેન જરદોશ પણ ખાસ ઉપસ્થિત રહ્યા હતા.
ચેમ્બર ઓફ કોમર્સને ઇન્ટરનેશનલ લેવલે વિચારવું જોઈએ: હર્ષ સંઘવી
ઈન્ટરનેશનલ ટેક્સટાઇલ એક્સ્પોમાં ગૃહ રાજ્યમંત્રી હર્ષ સંઘવીએ જણાવ્યું હતું કે, સુરતનું કપડા બજાર અને હીરા બજાર બંને ઉદ્યોગના માધ્યમથી સુરતને હંમેશા દુનિયાભરમાં એક નવી ઓળખ મળતી આવી છે. હીરા અને ટેક્સટાઇલ ઉદ્યોગોએ સુરતને નવી ઓળખ આપી છે. સુરતનું ટેક્સટાઇલમાં મોટું યોગદાન છે. ચેમ્બર ઓફ કોમર્સને ઇન્ટરનેશનલ લેવલે વિચારવું જોઈએ.
ઇન્ટરનેશનલ લેવલે આગળ વધવામાં રાજ્ય-કેન્દ્ર સરકાર તૈયાર છે: હર્ષ સંઘવી
તેમણે જણાવ્યું કે, ચેમ્બર ઓફ કોમર્સે ઇન્ટરનેશનલ લેવલના એક્ઝિબિશન અંગે વિચાર કરવો જોઈએ. દેશ અને દુનિયાને આપણા સુરત સુધી કેવી રીતે લવાય એ માટે વિચાર કરવો જઈએ. ઇન્ટરનેશનલ લેવલે આગળ વધવામાં રાજ્ય-કેન્દ્ર સરકાર તૈયાર છે. તમારે માટે આ વિચાર પર આગળ વધવાનું છે.
નવું ટેક્સટાઇલ પોલીસ સ્ટેશન અપાશે: સંઘવી
હર્ષ સંઘવીએ જણાવ્યું હતું કે, સ્પોર્ટ્સ ગારમેન્ટ માટે અમે પ્રયાસ કરી રહ્યા છીએ. સાથે લોકોની માંગને ધ્યાન રાખીને ઉદ્યોગોની સલામતી માટે નવું ટેક્સટાઇલ પોલીસ સ્ટેશન અપાશે. આ પોલીસ સ્ટેશનમાં 75નો સ્ટાફ તૈનાત હશે. ટેક્સટાઇલ પોલીસ સ્ટેશન માત્ર ટેક્સટાઇલને લગતા ગુનાઓ અંગે કામ કરશે. ટેક્સટાઇલ વેપારીઓ સાથે છેતરપિંડી કરનારા હવે શાંતીથી ઊંઘી નહીં શકે. આ પોલીસ સ્ટેશનમાં પેમેન્ટને લગતા કેસની સિવિલ નહીં પરંતુ ક્રિમિનલ કેસ તરીકે તપાસ થશે.