ફ્રી વીજળી / ગુજરાતને શ્રીલંકા નહીં બનવા દઇએ : કેજરીવાલની જાહેરાત પર CR પાટીલના પ્રહાર, કોંગ્રેસે પણ આપી પ્રતિક્રિયા

• ભાજપ-કોંગ્રેસનો AAP પર પ્રહાર
• ચૂંટણી પહેલા રાજકારણ ગરમાયું
• AAPની મફત વીજળીની જાહેરાત

ગુજરાતમાં આમ આદમી પાર્ટીની સરકાર બનશે તો મફત વીજળી આપવાની અરવિંદ કેજરીવાલની જાહેરાત બાદ રાજકારણ ગરમાયું છે. ભાજપ અને કોંગ્રેસે કેજરીવાલના આ નિવેદનને લઈ આકરા પ્રહાર કર્યા હતા. ભાજપ પ્રદેશ પ્રમુખ સી.આર. પાટીલે કટાક્ષ કરતા કહ્યું કે ગુજરાતને શ્રીલંકા બનવા નહીં દઈએ અને રેવડીવાળાને ગુજરાતમાં ઘુસવા નહીં દઈએ.તો કોંગ્રેસે AAPની ફ્રી વીજળીની જાહેરાત પર કટાક્ષ કરતા પૂર્વ પ્રમુખ અમિત ચાવડાએ કહ્યું કે ગુજરાતની પ્રજા જુઠાણામાં આવવાની નથી AAP ખોટો દુષ્પ્રચાર કરી રહી છે અને કેજરીવાલના વાયદા જુઠ્ઠા છે તેવો તંજ કસ્યો હતો.

ગુજરાતને શ્રીલંકા નહીં બનવા દઇએ": સી.આર.પાટીલ,પ્રમુખ,ગુજરાત ભાજપ
ત્યારે ગુજરાતમાં પણ દિલ્હી અને પંજાબ જેમ ફ્રી કલ્ચરની જાહેરાતો કરવામા આવતા ભાજપ પ્રદેશ અધ્યક્ષ સી.આર.પાટીલે કેજરીવાલને આડે હાથ લીધા છે. અને વાર કરતાં કહ્યું કે ગુજરાતને શ્રીલંકા બનવા નહિ દઈએ, રેવડી વાળને ગુજરાતમાં ઘૂસવા નહીં દઈએ. મહત્વનું છે કે સી આર પાટિલ વન ડે વન ડિસ્ટ્રિક્ટ કાર્યક્રમને લઈ રાજકોટના પ્રવાસે હતા. જ્યાં  ગોંડલમાં ભાજપ પ્રમુખ સી.આર.પાટીલનો રોડ શો યોજાયો હતો. જેમાં મંત્રી અરવિંદ રૈયાણી, ગીતાબા જાડેજા, જયેશ રાદડિયા, કુંવરજી બાવળિયા, લાખાભાઇ સાગઠીયા પણ ઉપસ્થિત રહ્યા હતા. કાર્યક્રમના સંબોધનમાં પાટિલે અરવિંદ કેજરીવાલ પર નિશાન સાધી મફત કલ્ચરનો વિરોધ કર્યો હતો. 

કેજરીવાલે સુરતથી કરી હતી 300 યુનિટ ફ્રી વીજળીની જાહેરાત
આમ આદમી પાર્ટી ગુજરાતમાં ગેરંટી કાર્ડ સાથે વિધાનસભા ચૂંટણીના મેદાનમાં ઉતરી છે. જેમાં આજે દિલ્લીના મુખ્યમંત્રી અરવિંદ કેજરીવાલે સુરત ખાતે સૌથી મોટી જાહેરાત કરી હતી. જેમાં આમ આદમી પાર્ટી જો ગુજરાતમાં સરકાર બનાવશે તો દર મહિને 300 યુનિટ વીજળી મફત આપવામાં આવશે. આ સાથે જ વર્ષો જુના લાખો રૂપિયાના વીજળીના બીલ હશે તો તેને પણ માફ કરવાની જાહેરાત કરાઈ છે. જોકે 300 યુનિટની ઉપર જો એકપણ યુનિટ વીજળી વપરાશે તો લોકોએ આખું બિલ ભરવું પડશે તેવી પણ આ ગેરંટી કાર્ડમાં જોગવાઈ છે. પરંતુ આ જાહેરાત દરેક લોકોને અસર કરે છે. જેથી સત્તાપક્ષ અને અન્ય વિપક્ષી પાર્ટીઓની મુશ્કેલીઓ વધારી શકે છે. સમગ્ર જાહેરાત મામલે ભાજપ અને કોંગ્રેસ આપ અને કેજરીવાલ પર ધારદાર પ્રહાર કરી રહી છે.