ગાંધીનગર ખાતે કોંગ્રેસની કારોબારીની બેઠક મળી હતી. કારોબારી બેઠકમાં પ્રદેશ કોંગ્રેસ અધ્યક્ષ જગદીશ ઠાકોરે ભાજપ પર આકરા પ્રહાર કર્યા છે.
ગાંધીનગર જિલ્લા કોંગ્રેસની કારોબારી બેઠક
વિધાનસભાની ચૂંટણી બાદ મળી કારોબારી બેઠક
પ્રદેશ પ્રમુખ જગદીશ ઠાકોરે ભાજપ પર કર્યા આકરા પ્રહાર
ચાલુ ચૂંટણીએ પોલીસ કામ બંધ કરાવવા ધમકી આપતીઃ જગદીશ ઠાકોર
ગુજરાત વિધાનસભાની ચૂંટણી તાજેતરમાં જ પૂર્ણ થઈ છે. વર્ષ 2022ની ચૂંટણીમાં કોંગ્રેસનું પ્રદર્શન ખૂબ જ ખરાબ રહ્યું છે. એક સમયે 149 બેઠક જીતવાનો રેકોર્ડ ધરાવતી કોંગ્રેસ 17 બેઠકો પર જીત મેળવી અને બેસી ગઈ છે. ત્યારે વિધાનસભાની ચૂંટણી બાદ આજે ગાંધીનગર ખાતે જિલ્લા કોંગ્રેસની કારોબારી બેઠક મળી હતી. કારોબારી બેઠકમાં ચૂંટણી સંદર્ભે સમીક્ષા કરવામાં આવી હતી. આ બેઠકમાં પ્રદેશ પ્રમુખ જગદીશ ઠાકોર સહિત જીલાના પ્રમુખ અરવિંદસિંહ સોલંકી,ડો.જીતુ પટેલ ડો.હિમાંશુ પટેલ નિશિત વ્યાસ સહિતના ગાંધીનગર જિલ્લા હોદ્દેદારો, કોંગ્રેસના આગેવાનો તેમજ NSUIના હોદ્દેદારો પણ હાજર રહ્યા હતા.
દેશભરમાં દબાવાની ચાલી રહી છે રાજનીતિઃ જગદીશ ઠાકોર
વિધાનસભાની ચૂંટણીમાં કોંગ્રેસનું ખરાબ પ્રદર્શન જોવા મળ્યું હતું. ચૂંટણી બાદ હવે કોંગ્રેસનો બેઠકોનો દોર શરૂ થઈ ગયો છે. આજની બેઠકમાં કોંગ્રેસના પ્રદેશ પ્રમુખે ભારત પર આકરા પ્રહાર કર્યા હતા. તેમણે કહ્યું કે, તમે જોવો છો કે હાલ બધુ એક પક્ષે ચાલી રહ્યું છે. દરેક લોકો જાણે છે દેશભરમાં દબાવાની રાજનીતિ ચાલી રહી છે.
ચાલુ ચૂંટણીએ પોલીસ કામ બંધ કરાવવા ધમકી આપતીઃ જગદીશ ઠાકોર
જગદીશ ઠાકોરે કહ્યું હતું કે, ચાલું ચૂંટણીએ અમે જોયું છે પોલીસ અધિકારીઓ બોલાવે, બંધ કરી દો કામ કરવાનું. મોઢે કહ્યું છે કે કાલે જેલમાં નાખતા હોય તો આજે નાખજો, કોંગ્રેસનું કામ કરતા હતા અને કરીશું. કોંગ્રેસે આઝાદી પહેલા પણ મૃત્યુની ચિંતા કરી ન હતી.
પૈસા અને પોલીસના જોરે પરિણામો આવ્યા છેઃ જગદીશ ઠાકોર
ઉચ્ચ અધિકારીઓને બેઠક જીતાડવા કહેવામાં આવ્યું હતું, આઝાદી વખતે આની કરતા વધારે સમય ખરાબ હતો. છેલ્લા 20 વર્ષથી હિન્દુ મુસલમાન સિવાય મુદ્દો નથી. ભારતીય જનતા પાર્ટીના લોકો છ મહિનાથી કહેતા હતા કે અમે ગાંધીનગર જીતીશું, લોકશાહીથી જીતવું હતુંને, રૂપિયાની રેલમ છેલ. જે નથી માનતો એને પોલીસ, જે નથી માનતો એને ગુંડા અને અસમાજિક તત્વો, એના બળે જ આ પરિણામો આવ્યા છે.
ભાજપે ભયનું વાતાવરણ ઊભું કર્યું છેઃ કોંગ્રેસ પ્રમુખ
જગદીશ ઠાકોરે કહ્યું કે, કોઈને બોલવાનો હક નહીં, સરકારની સામે સવાલ કરવાનો હક નહીં. સરકારને પ્રશ્ન પૂછવાનો હક નહીં. પેપર ફૂટે અને યુવાનો ગાંધીનગરમાં આવીને સવાલ ન પૂછી શકે એવું વાતાવરણ ઊભું કર્યું છે.