સૂચના / રાજ્યભરની પાલિકા-મહાપાલિકાને અપાયો આ આદેશ, પાલન થાય તો સારું

પર્યાવરણની જાળવણી અને પેપરના થઇ રહેલા ખોટા ખર્ચની બચત માટે પાલિકાઓમાં તમામ કામગીરી ઓનલાઇન થશે. મોટાભાગે પાલિકાઓમાં દર મહિને સામાન્ય સભા સહિત ખાસ સમિતિઓની ૧ર જેટલી બેઠકો મળે છે.

આ ઉપરાંત દર અઠવાડિયે સ્ટેન્ડિંગ કમિટીની બેઠક મળે છે. મોટા ભાગે આ તમામ બેઠકોના એજન્ડા કમિટીઓના સભ્યને હાથોહાથ આપવામાં આવે છે. આના માટે ખાસ માણસો દ્વારા એજન્ડાની નકલ જે તે સભ્ય સુધી રૂબરૂ પહોંચાડવામાં આવે છે જેના કારણે પાલિકાનો સ્ટાફ પણ આમાં રોકાયેલો રહે છે. 
 

એજન્ડાની નકલો છાપવા પાછળ લાખો રૂપિયાનો ખર્ચ થાય છે. સામાન્ય સભામાં સરેરાશ અંદાજે ૧૦૦ પાનાંની મિનિટસ હોય છે. કોર્પોરેટર કે કાઉન્સિલર ભાગ્યે જ આ મિનિટસ વાંચે છે. કેટલાક તો આ મિનિટસ સાથે રાખવાના બદલે પાલિકામાં જ મોકલીને જતા રહે છે.

આવી કેટલીયે બાબતે ધ્યાનમાં આવતા સરકારે પર્યાવરણ બચાવવા સમય અને ખર્ચ બચાવવા સમિતિઓને લગતી તમામ બાબતોની કામગીરી ડિજિટલ કરવાની નિર્ણય લીધો છે. આગામી દિવસોમાં એજન્ડા, મિનિટસ સહિતની તમામ બાબતો ઇ-મેઇલ અથવા વોટસએપ ગ્રૂપ દ્વારા મોકલી આપવામાં આવશે.