તપાસ / મંત્રી કાનાણીના પુત્ર અને મહિલા પોલીસકર્મી બબાલમાં કરાઈ આ કાર્યવાહી, CM પણ નારાજ થયાની ચર્ચા

• કુમાર કાનાણીને મુખ્યમંત્રીએ પણ ઠપકો આપ્યો
• રાત્રી કર્ફ્યુ દરમિયાન રોકવા બાબતે બોલાચાલી થઇ હતી
• સુરતમાં કુમાર કાનાણીના પુત્ર અને મહિલા પોલીસકર્મી વચ્ચે બબાલ થઇ હતી

સુરતમાં રાજ્ય આરોગ્ય મંત્રી કુમાર(કિશોર) કાનાણીના પુત્ર અને મહિલા કોન્સ્ટેબલ સુનિતા યાદવ વચ્ચે રાત્રી કર્ફ્યુ દરમિયાન રોકવા બાબતે બોલાચાલી થઇ હતી. ત્યારે હવે આ મામલો વધુ બિચક્યો છે. સુનિતા યાદવે મંત્રીના પુત્ર અને અધિકારીઓની વાત ના સ્વિકારી અને પોલીસની નોકરીમાંથી રાજીનામું આપી દેવાની ચર્ચા થઇ રહી છે. જેને લઇને હવે સોશિયલ મીડિયામાં #I support sunita yadavના નામે ટ્રેન્ડ શરૂ થયો છે. તેવામાં હવે આ અંગે કુમાર કાનાણીને મુખ્યમંત્રીએ પણ ઠપકો આપ્યો હતો. કુમાર કાનાણીના પુત્ર દ્વારા કરવામાં આવેલા વર્તન બદલ ઠપકો આપ્યો હોવાનું સૂત્રો દ્વારા જાણવા મળી રહ્યું છે. 

તપાસના આદેશ અપાયા

આ ઘટનામાં બબાલ થયા બાદ સુરતના પોલીસ કમિશનર દ્વારા તપાસના આદેશ આપવામાં આવ્યા છે. સમગ્ર મામલે ACP તપાસ કરશે. પોલીસ કમિશનર દ્વારા વિવાદનો ફણગો ફૂટતા હવે એસીપી સીકે પટેલને તપાસ સોંપવામાં આવી છે.

પ્રધાનમંત્રી નરેન્દ્ર મોદીનો પણ પુત્ર હોય તો હું તેને રોકતીઃ મહિલા પોલીસકર્મી

MLA લખેલી કારને રાત્રે સાડા 10 વાગ્યા બાદ કુમાર કાનાણીનો પુત્ર નીકળ્યો હતો. રાત્રે 10 વાગ્યા બાદ લૉકડાઉનનું કડક અમલ કરાવવા ગૃહ મંત્રાલય દ્વારા કહેવામાં આવ્યું છે. જે ઓડિયોક્લીપ સામે આવી તેમાં મહિલા પોલીસકર્મી ગુસ્સો જોવા મળી રહ્યા છે. પોતાની ડ્યૂટીનું પાલન કરતા આ મહિલા પોલીસકર્મી કહી રહ્યા છે કે પ્રધાનમંત્રી નરેન્દ્ર મોદીનો પણ પુત્ર હોય તો હું તેને રોકતી. ઓડિયો ક્લીપમાં બેફામ વાણી વિલાસ થઈ રહ્યો છે.

શું છે સમગ્ર મામલો?

સુરતમાં કુમાર કાનાણીના પુત્ર અને મહિલા પોલીસકર્મી વચ્ચે બબાલની ઘટના સામે આવી હતી. પ્રકાશ કાનાણી અને તેના મિત્રોએ કરેલી બબાલનો ઓડિયો વાયરલ થયો હતો. સુરતના વરાછામાં કુમાર કાનાણીના દીકરાના મિત્રો રાત્રે ફરવા નિકળ્યા હતા. જેમને રોકવામાં આવતા બબાલ થઇ હતી. મહિલા પોલીસ કર્મીએ તેના મિત્રોને અટકાવતા પ્રકાશ કાનાણી પણ ઘટના સ્થળે પહોંચ્યા હતા. MLA લખેલી કાર લઈને પ્રકાશ કાનાણી ઘટના સ્થળે પહોંચ્યા હતા. જોકે પ્રકાશ કાનાણીએ શાંતિ જાળવવા અપીલ કરી હતી. પરંતુ બાદમાં પ્રકાશ કાનાણીની પણ  મહિલાકર્મી સાથે બબાલ થઈ હતી. બન્ને વચ્ચે બબાલની ઓડિયો ક્લીપ વાયરલ થતા મામલો સામે આવ્યો છે. મામલો ગરમાતા ઉચ્ચ પોલીસ અધિકારીઓ સુધી વાત પહોંચી છે. ઉચ્ચ અધિકારીઓએ મહિલા પોલીસકર્મીને ઘરે જવાના આદેશ આપ્યા હતા. ઉચ્ચ પોલીસ અધિકારીઓએ મહિલાકર્મીને તાબડતોડ ઘરે મોકલ્યા હતા. આ ઘટના બાદ મહિલા પોલીસ કર્મીએ રાજીનામું આપ્યું હોવાની ચર્ચા ચાલી રહી છે.