પડતર માંગણીઓ ન સંતોષાતા રાજ્યના શિક્ષણ સંઘો નારાજ, બોર્ડની પરીક્ષાના પરિણામમાં થઇ શકે છે વિલંભ
રાજ્યના શિક્ષણ સંઘોએ સરકાર સામે ચઢાવી છે બાંયો
30 હજાર કરતા વધુ શિક્ષકોએ પેપર તપાસવાનો કર્યો બહિષ્કાર
ધોરણ 10-12 બોર્ડની પરીક્ષાનું પરિણામમાં થઇ શકે વિલંબ
રાજ્યમાં બોર્ડની પરીક્ષાઓ ચાલી રહી છે. ધોરણ 10 અને 12 બોર્ડની પરીક્ષા શાંતિ પૂર્ણ માહોલમાં યોજાઇ રહી છે પરંતુ આ વખતે આ બોર્ડની પરીક્ષાનું પરિણામ મોડું આવી શકે છે. કારણ કે રાજ્યના શિક્ષણસંઘોએ પોતાની પડતર માંગણીઓને લઇને રાજ્ય સરકાર સામે બાંયો ચઢાવી છે. 30 હજાર કરતા વધારે શિક્ષકોએ પેપર તપાસવાનો બહિષ્કાર કરતા તેની અસર પરિણામ પર પડી શકે છે.
શિક્ષકોએ પેપર તપાસવાનો બહિષ્કાર કર્યો
મહત્વનું છે કે પડતર પ્રશ્નોનો નિકાલ ન થતા શૈક્ષિક સંઘોએ સાથે મળીને બોર્ડની પરીક્ષાના પેપર તપાસવા માટે ઇન્કાર કરી દીધો છે. જો સરકારે આગામી દિવસોમાં આ મુદ્દે કોઈ ઉકેલ નહી લાવે અને શૈક્ષિક સંઘો પોતાની વાત પર અડગ રહેશે તો મૂલ્યાંકન કામગીરી અટકી જશે જેની સીધી અસર પરિણામ પર જોવા મળશે.. મહત્વનું છે કે ગુજરાત રાજ્ય શૈક્ષણિક સંઘ સંકલન સમિતિએ મુખ્યમંત્રી, નાણાંમંત્રી અને શિક્ષણ મંત્રીને આવેદનપત્ર આપીને આગામી બોર્ડ પરીક્ષાની ઉત્તરવહી મૂલ્યાંકન કામગીરીનો બહિષ્કાર કરવાની ચીમકી આપી છે. શૈક્ષણિક સંઘે રજૂઆત કરી છે કે પાંચ વર્ષની ફિક્સ પગારની નોકરી સળંગ ગણવા ગ્રાન્ટેડ માધ્યમિક અને ઉચ્ચતર માધ્યમિક સ્કૂલના શિક્ષકો માટે પરિપત્ર કરાયો નથી.
જો પેપર મૂલ્યાંકન અટકાય તો શું થઈ શકે?
બોર્ડના વિદ્યાર્થીઓનું પેપર મૂલ્યાંકન ન થાય તો બોર્ડનું પરિણામ ન આવે
પેપર મૂલ્યાંકનમાં વિલંબ થાય તો પરિણામમાં વિલંબ થાય
પરિણામ વિલંબે આવે તો નવા વર્ષના એડમિશનમાં વિલંબ થાય
એડમિશન મોડા થાય તો શૈક્ષણિક વર્ષનું કેલેન્ડર ખોરવાય
ધોરણ 12 પછી વધુ અભ્યાસ માટે વિદેશ જવા ઇચ્છતા વિદ્યાર્થીઓનુ શિડયુલ ખોરવાય
શૈક્ષિક સંઘોની શું છે માંગણી ?
જૂની પેન્શન યોજના લાગુ કરવામાં આવે
પાંચ વર્ષની નોકરી સળંગ ગણવામાં આવે
7મુ પગાર પંચના બાકી રહેલા હપ્તા ચૂકવવામાં આવે
એક એક વર્ગની શાળામાં 3 શિક્ષક અને 1 આચાર્યનું મહેકમ આપવામાં આવે
પરિણામ આધારિત ગ્રાન્ટ આપવામાં આવે તે નિયમ દૂર થાય
બિન સૈક્ષણિક કર્મચારીઓની બઢતી તથા ભરતી કરવામા આવે
સાતમા પગાર પંચના એરિયર્સના બાકી હપ્તા ચુકવવામાં આવે
આચાર્યો અને વહિવટી કર્મચારીઓને એલટીસીનો રોકડ વિકલ્પનો લાભ આપવામાં આવે