રજૂઆત / રાજ્યના મંત્રીમંડળના વિસ્તરણની શક્યતા, નવી ગાડીઓ ખરીદવા સરકારની તૈયારીઓ

મુખ્યમંત્રી કાર્યાલયમાં ખરીદીની દરખાસ્તને મંજૂર કરવા માટેની ફાઇલ મૂકવામાં આવી છે. ટૂંક સમયમાં જ સરકાર ઇનોવા કે ક્રેટા કાર ખરીદવાનો નિર્ણય લેશે તેવું સૂત્રોનું કહેવું છે. રાજ્ય સરકારે અગાઉ પણ કાર ખરીદવાની તૈયારી કરી હતી, પણ આ વખતે તો મંત્રીમંડળના વિસ્તરણ સાથે ખાતાંની પણ ફેરબદલ થશે. આથી રાજ્ય સરકારે નવા મંત્રીઓને મંત્રીના શપથ લેવા સાથે જ સુવિધા આપી શકાય તેટલા માટે 15 નવી ઇનોવા કે ક્રેટા કાર ખરીદવાની તૈયારી શરૂ કરી દીધી છે.

આ માટેની દરખાસ્ત મુખ્યમંત્રી કાર્યાલયમાં આવી ગઈ છે અને કદાચ સરકાર મંગળવારે તેને મંજૂરી આપી પણ શકે છે તેમ સૂત્રો કહે છે. કાર ખરીદવા માટે સેવન સીટર ઇનોવા કાર તથા ક્રેટા ખરીદવાની પણ દરખાસ્ત છે. એવું બની શકે કે, સરકાર મંત્રીની પસંદ હોય તેવા પ્રકારની કાર તેને આપી શકે છે. આગામી દિવસોમાં બોર્ડ નિગમોમાં પણ નિમણૂકો થવાની હોવાથી નવનિયુક્ત ચેરમેનને પણ નવી કારનો લાભ મળી શકે છે.