રાજકારણ / વિધાનસભામાં 156 બાદ લોકસભામાં 26નો ટાર્ગેટ: CR પાટીલે કહ્યું દરેક બેઠક પર 5 લાખની લીડ મેળવવાનું આયોજન

• લોકસભા ચૂંટણી અંગે સી.આર.પાટીલનું નિવેદન
• દરેક સીટ 5 લાખથી વધુ મતે વિજયી થાય તે પ્રકારનું આયોજન
• નવસારીના ગણદેવી તાલુકાના કાર્યક્રમમાં આપ્યુ નિવેદન

ગુજરાત વિધાનસભાની ચૂંટણીમાં ભવ્ય જીત મેળવ્યા બાદ હવે ભાજપે લોકસભાની ચૂંટણીની તૈયારીઓ શરૂ કરી દીધી છે. ભાજપના પ્રદેશ પ્રમુખ પાટીલે આ માટે રણનીતિ ઘડવાની શરૂ કરી દીધી છે. 2024માં યોજાનારી લોકસભાની ચૂંટણીને લઈને સી.આર પાટીલનું નિવેદન સામે આવ્યું છે. તેમણે જણાવ્યું છે કે, ગુજરાતની તમામ બેઠકો પર ભાજપની જીત થશે. 

5000 મતથી નીચે આપણે 20 સીટો ગુમાવી છેઃ સી.આર પાટીલ 
નવસારીના ગણદેવી તાલુકામાં એક કાર્યક્રમ દરમિયાન સ્ટેજ પરથી સી.આર પાટીલે કહ્યું હતું કે, ગુજરાત વિધાનસભાની ચૂંટણીમાં આપણે  156 સીટ પર પહોંચ્યા છીએ, 20 સીટ થોડા મત માટે રહી ગઈ છે. 5000 મતથી નીચે આપણે 20 સીટો ગુમાવી છે. થોડો વધારે પ્રયત્ન કર્યો હોત તો 176 પર આપણે પહોંચી જાત. કંઈ વાંધો નહીં બીજીવાર ફરીથી આપણે પ્રયાસ કરીશું. 

આપણી સામેના ઉમેદવારની ડિપોઝિટ જપ્ત કરાવી દેવાની છેઃ પાટીલ
લોકસભા ચૂંટણી અંગે ભાજપ પ્રદેશ પ્રમુખ સી.આર.પાટીલે કહ્યું કે, લોકસભાની ચૂંટણીમાં આપણી સામે કોઈપણ પાર્ટીના ઉમેદવાર કે અપક્ષ ઉમેદવાર ઉભા રહેશે. તે બધાની ડિપોઝિટ જપ્ત કરાવી દેવાની છે. મેં હમણાં પ્રવાસ શરૂ કર્યો છે મારી કલ્પના છે કે દરેકે દરેક સીટ પાંચ લાખથી વધારે લીડથી જીતાય એ પ્રકારનું પણ આયોજન કરવાનું આપણે વિચારી રહ્યા છીએ. 

ભાજપે તમામ બેઠક જીતવા લક્ષ્યાંક નિર્ધારિત કર્યો
ગુજરાત વિધાનસભા ચૂંટણી 2022માં ભાજપે રેકોર્ડ બ્રેક 156 બેઠકો જીતને રાજકારણમાં નવો ઇતિહાસ બનાવ્યો છે. હવે ભાજપે લોકસભા મિશન-2024 માટે તૈયારીઓ શરૂ કરી દીધી છે. પ્રદેશ ભાજપ દ્વારા લોકસભાની 26માંથી 26 બેઠક મેળવવાનો લક્ષ્યાંક નિર્ધારીત કરાયો છે. લોકસભા ચૂંટણીમાં વિપક્ષની ડિપોઝિટ જપ્ત કરવાનો લક્ષ્યાંક નિર્ધારીત કરવામાં આવ્યો છે. 

તમામ ધારાસભ્યોને આપી દીધી છે સૂચના
લોકસભાની ચૂંટણી વર્ષ 2024માં આવશે અને હજુ તેને એક વર્ષ કરતા વધુનો સમય બાકી છે, પરંતુ અત્યારથી જ ભાજપ દ્વારા પોતાના ધારાસભ્યોને સ્પેશિયલ ટાસ્ક આપીને મહત્વની સૂચના આપી દેવામાં આવી છે. ધારાસભ્યોને ચૂંટણીલક્ષી કામગીરીનો પ્રારંભ કરવા માટેની સૂચના આપી દેવામાં આવી છે. ધારાસભ્યોને મોબાઈલ એપ્લિકેશન દ્વારા મતદારોનો સંપર્ક કરવાની સૂચના આપી દેવામાં આવી છે.