Gujarat Budget 2022 / આજથી ભૂપેન્દ્ર સરકારના પહેલા બજેટ સત્રની શરૂઆત, આવતીકાલે મોટા એલાનની સંભાવના

• આજથી ગુજરાતના બજેટ સત્રની શરૂઆત
• આવતીકાલે વિધાનસભામાં બજેટ રજૂ થશે
• ચાર દિવસ બજેટ ઉપર ચર્ચા કરાશે

ગુજરાત વિધાનસભાના બજેટ સત્રની શરૂઆત રાજ્યપાલના સંબોધન સાથે આજથી શરૂ થશે. જે અગામી 31મી માર્ચ સુધી ચાલશે. જેમાં આવતી કાલે વિધાનસભામાં ગુજરાતનું બજેટ રજૂ થશે. નાણામંત્રી કનુભાઈ દેસાઈ ગુજરાતનું વર્ષ 2022-23 ના ફાઈનાન્શિયલ વર્ષ માટેનું બજેટ રજૂ કરશે. ચૂંટણી પહેલાનું બજેટ સત્ર હોવાથી સૌની નજર હાલ બજેટ પર છે. ઉલ્લેખનીય છે કે, બજેટના મુદ્દે ચાર દિવસ સુધી ચર્ચા થશે.આ સાથે આ બજેટ સત્રમાં બે સુધારા વિધેયક પણ પસાર કરવામાં આવશે  

મુખ્યમંત્રી અને નાણામંત્રી માટે આ પહેલુ બજેટ હશે

આ બજેટસત્રમાં  કૃષિ અને મહેસૂલ વિભાગના સુધારા વિધેયક પસાર કરાશે તેમજ સરકારી બીલ ઉપર 4 દિવસ ગૃહમાં ચર્ચા થશે.ભૂપેન્દ્ર પટેલની સરકારનું આ પહેલુ બજેટ છે, તો નાણા મંત્રી પહેલીવાર ગુજરાતનું બજેટ રજૂ કરવા જઈ રહ્યાં છે. તેઓ વર્ષ 2022–23નું આશરે 2.35 લાખ કરોડનું અંદાજપત્ર રજૂ કરશે તેવી શક્યતા છે. બજેટ સત્ર તોફાની બની રહે તેવી પૂરેપૂરી શક્યતા છે. કારણ કે, ચૂંટણી પહેલાનું આ બજેટ છે, જેથી વિપક્ષ પર આ બજેટ પર સરકાર સામે મોરચો માંડી શકે છે. આ બજેટ સત્ર 31 માર્ચે પૂર્ણ થશે

બજેટમાં કયા ક્ષેત્ર પર અપાશે ભાર?

ખેડૂતો, શિક્ષણ, નાના ઉદ્યોગો, રોજગારી, શહેરી વિકાસ અને આરોગ્ય પર વિશેષ જાહેરાતો થઈ શકે છે. યુવાનો માટે લાભદાયી યોજનાઓ તો બીજી તરફ કોરોના કાળમાં મંદીમાં આવી ગયેલા ઉદ્યોગકારોને રિઝવવા માટે નવી યોજનાઓની જાહેરાત પણ કરવામાં આવી શકે છે. વિધાનસભા ચૂંટણીને ધ્યાને રાખી ફૂલગુલાબી વેરા વિનાનું પણ રાહતોથી ભરપૂર બજેટ ગુજરાત વાસીઓ માટે આવશે તેવા એંધાણ છે.

ગૃહ વિભાગનું બજેટ  છેલ્લા 8 વર્ષમાં 900%થી વધુ વધ્યું

તત્કાલીન સીએમ આનંદીબેન પટેલ અને રૂપાણી સરકારના 8 વર્ષોમાં ગૃહ વિભાગને ફાળવવામાં આવતી રકમમાં 900 ટકાથી વધુનો વધારો થયો છે. ગૃહ વિભાગને  2014-15 767, 2015-16 500, 2016-17 1700, 2017-18 5000, 2018-19 5420, 2019-20 5775, 2020-21 7503, 2021-22 7960 કરોડની ફાળવણી કરવામાં આવી છે, જેની સામે ક્રાઈમ રેસિયો પણ ડબલ થઈ ગયો છે. ત્યારે હવે ભૂપેન્દ્ર સરકારમાં ગૃહ વિભાગને ફાળે કેટલી રકમ જાય છે તેને લઈને સળવળાટ શરૂ થઈ ગયો છે.

વિધાનસભા ચૂંટણીને ધ્યાને રાખી બજેટનું કદ મોટું હોવાની સંભાવના

રાજ્યના વિકાસ માટે સરકારલાખો કરોડો રૂપિયાનું બજેટ ફાળવે છે.શહેર અને ગામડાની જનતાને સુવિધાઓ અને ભૌતિક સુખાકારી મળી રહે તે માટે આયોજનો થાય છે.દર વર્ષે જનતાને બજેટના ભાગરૂપે વિવિધ યોજનાઓની જાહેરાત પણ કરાય છે. ત્યારે ગુજરાત રાજ્યનું બજેટ સત્ર શરૂ થવા જઈ રહ્યું છે જેની કામગીરીના આયોજન હેતુસર ગઈકાલે કામકાજ સલાહકાર સમિતિની બેઠક યોજવામાં આવી હતી. મળતી માહિતી અનુસાર  વિધાનસભા ચૂંટણીને ધ્યાને રાખી આ બજેટ 2.35 લાખકરોડથી વધારે હોવાનું મનાઈ રહ્યું છે.બજેટ 3 માર્ચે  રજૂ થશે. જેમાં રાજ્યપાલના સંબોધન પર ત્રણ દિવસ  ચર્ચા ચાલશે. વિધાનસભામાં અંદાજ પત્ર પર ચાર દિવસ ચર્ચા  ચાલશે. તો પૂરક માગણીઓ  પર બે દિવસ ચર્ચા થશે. જ્યારે સરકારી વિધેયકો પર 4 દિવસ  ચર્ચા ચાલશે. વિધાનસભા  સત્ર દરમિયાન 6-8 દિવસ બે-બે બેઠકો થશે. 

બજેટ સત્ર તોફાની રહે તેવા પૂરેપૂરા એંધાણ

બજેટ સત્ર માટે  સરકાર અને વિપક્ષ બંનેએ તૈયારીઓ કરી લીધી છે. આ બજેટ સત્ર હંગામી રહે તેવા પૂરેપૂરા એંધાણ છે. બેરોજગારી, ખેડૂતો, અને શિક્ષણ, અને ભરતી કૌભાંડ, મોંધવારી  મુદ્દે વિપક્ષ સરકારને ઘેરવાનો પ્લાન બનાવી ચૂક્યું છે. સામે પક્ષે સરકારે પણ તમામ પ્રશ્નોના વળતાં જવાબ માટે રણનીતિ નક્કી કરી લીધી છે.

કુલ 26 બેઠકમાં મળશે 14મી વિધાનસભાનું 10મુ સત્ર

ગુજરાત વિધાનસભાનું સત્ર 2 માર્ચથી શરૂ થશે અને 31 મી માર્ચ સુધી ચાલશે.14મી વિધાનસભાનું 10મુ સત્ર કુલ 26 બેઠકમાં મળશે.આ સત્રમાં બજેટ દરમિયાન 9 રજામાં કોઈપણ પ્રકારની કામગીરી કરવામાં આવશે નહી.તો આ વિધાનસભા સત્રમાં કોરોનાના સંક્રમણને ધ્યાને રાખીને વિશેષ વ્યવસ્થા કરવામાં આવશે.સામાજિક અંતર સાથે સભ્યોની બેઠક વ્યવસ્થા કરાશે.આ સત્રમાં ગૃહમાં પ્રવેશ માટે કોરોનાના ટેસ્ટ ફરજિયાત નહી હોય પરંતુ રસીના 2 ડોઝના સર્ટિફિકેટ ચકાસીને જ ગૃહમાં પ્રવેશ આપવામાં આવી શકે છે.