વોર્નિંગ / મહારાષ્ટ્રમાં અમિતાભ અને અક્ષયની ફિલ્મો રિલીઝ તો શું શૂટ પણ નહીં થવા દઈએ : કોંગ્રેસે આપી ચીમકી

• મહારાષ્ટ્ર કોંગ્રેસના અધ્યક્ષે આપી ધમકી 
• અમિતાભ, અને અક્ષય કુમારની ફિલ્મોને લઈને આપી ધમકી 
• કહ્યું, પીએમ મોદીની સરકાર સામે તેઓ ચૂપ કેમ છે ?

મહારાષ્ટ્ર કોંગ્રેસના પ્રમુખ નાના પટોલે ધમકી આપી છે કે તેઓ અમિતાભ બચ્ચન અને અક્ષય કુમાર જેવા બોલિવૂડ કલાકારોની ફિલ્મોનું શૂટિંગ બંધ કરાવી દેશે. 

ફિલ્મી એક્ટરો પર મહારાષ્ટ્ર કોંગ્રેસના પ્રમુખ લાલઘૂમ 

પત્રકારો સાથે વાત કરતા મહારાષ્ટ્ર પ્રદેશ કોંગ્રેસ સમિતિના અધ્યક્ષે કહ્યું કે આ અભિનેતાઓ અગાઉના યુપીએ શાસનની વિરુદ્ધ ટ્વીટ કરતા હતા જ્યારે ઇંધણના ભાવમાં વધારો કરવામાં આવતો હતો પરંતુ જ્યારે દેશમાં પેટ્રોલની કિંમત 100 રૂપિયાને પહોંચી ગઈ છે ત્યારે તેઓ ચૂપ કેમ છે? નોંધનીય છે કે પટોલે વિધાનસભાના સ્પીકર પદેથી હાલમાં જ રાજીનામું આપ્યું હતું. 

આ સિવાય તેમણે વધુમાં કહ્યું હતું કે અગાઉ જ્યારે કેન્દ્રમાં મનમોહન સિંહની સરકાર હતી, પછી ભલે તે અમિતાભ બચ્ચન હોય કે અક્ષય કુમાર, તેઓ પેટ્રોલના ઊંચા ભાવો અંગે ટ્વીટ કરતા હતા. હવે આજે જ્યારે આંતરરાષ્ટ્રીય ક્રૂડના ભાવ નીચા છે પરંતુ નરેન્દ્ર મોદીની આગેવાનીવાળી ભાજપ સરકાર પેટ્રોલ, ડીઝલ અને એલપીજીના ભાવમાં વધારો કરી રહી છે ત્યારે તેઓ આજે કેમ બોલી રહ્યા નથી. યુપીએ સરકાર લોકશાહી રૂપે કરતી હતી, તેથી તેઓ તેની ટીકા કરી રહ્યા હતા. 

ભાજપે એક્ટરોનું કર્યું સમર્થન

કોંગ્રેસની ધમકી પર પ્રતિક્રિયા આપતા મહારાષ્ટ્ર ભાજપના ધારાસભ્ય રામ કદમે બોલીવુડના બંને અભિનેતાઓને સંપૂર્ણ સમર્થન આપવાની ખાતરી આપી છે. કદમે કહ્યું કે દેશ અમિતાભ અને અક્ષય સાથે ઊભું છે, જેમણે દેશની તરફેણમાં ટ્વિટ કર્યું છે.

કોંગ્રેસના નેતાઓ અભિનેતાઓને ધમકી આપી રહ્યા છે કે તેઓ મહારાષ્ટ્રમાં તેમની ફિલ્મોના શૂટિંગ કે રિલીઝ નહીં કરવા દે. અમિતાભ બચ્ચને કયો ગુનો કર્યો છે? તેમણે માત્ર દેશની તરફેણમાં ટ્વિટ કર્યું છે, એવું ભાજપના ધારાસભ્યે જણાવ્યું હતું. દેશની બહાર બેઠેલા કેટલાક લોકો ભારત વિરુદ્ધ કાવતરાં કરી રહ્યા છે અને તેની છબી બગાડવાનો પ્રયાસ કરી રહ્યા છે, કોંગ્રેસ પક્ષ આવા લોકોનું સમર્થન કરી રહ્યું છે જે ભારતની વિરુદ્ધ છે. મહત્વનું છે કે આ મુદ્દે હજુ સુધી ફિલ્મી એક્ટરો તરફથી ,કોઈ પણ પ્રતિક્રિયા જાણવા મળી નથી.