પેપર વાયરલકાંડ / બૉર્ડનું પ્રશ્નપત્ર વિતરણ બાદ તરત જ વાયરલ થયું હોવાનો દાવો, હજુ મોટા ખુલાસા થાય તેવી આશંકા

• ધોરણ 10 પેપરના જવાબો વાયરલ થવાનો મામલો
• પેપર અડધો કલાક પહેલા નહીં પણ અઢી કલાક પહેલાં વાયરલ થયું હતું
• પેપરમાં હજુ વધુ કાંડ આવી શકે છે બહાર

ધોરણ 10ના હિન્દીના પેપરના જવાબો વાયરલ થવા મામલે હજુ વધુ કાંડ બહાર આવી શકે તેમ છે. તમને જણાવી દઇએ કે, પેપર અડધો કલાક પહેલા નહીં પરંતુ અઢી કલાક પહેલાં વાયરલ થયું હતું. પરીક્ષા 10.15 એ શરૂ થઈ હતી અને પેપર 10.47 એ વાયરલ થયું હતું. સોશિયલ મીડિયા પર પેપર અડધો કલાક બાદ મુકાયું હતું. 11:52 મિનિટે પેપરની આન્સર કી સાથે તેનું સોલ્યુશન પણ ફરતું થઇ ગયું હતું.

પેપર વિતરણ થતાંની સાથે જ વાયરલ થયું હતું તેનો બોર્ડે પણ સ્વીકાર કર્યો : મનીષ દોશી

આ સાથે ધોરણ 10ના હિન્દી પેપરના જવાબો વાયરલ થવા મામલે કોંગ્રેસ દ્વારા શિક્ષણ વિભાગ ગંભીર આક્ષેપ પણ કરવામાં આવ્યાં છે. કોંગ્રેસ પ્રવક્તા મનીષ દોશીએ આક્ષેપો કરતા જણાવ્યું કે, 'શિક્ષણ વિભાગે ખોટા ખુલાસા કર્યા છે. બોર્ડના અધિકારીઓ દ્વારા ત્રણ અલગ-અલગ જવાબો અપાયા છે. બોર્ડના સચિવે ગેરરીતિનો કિસ્સો ગણાવ્યો છે. પેપર વિતરણ થતાંની સાથે જ વાયરલ થયું હતું. બોર્ડે પણ આ વાતનો સ્વીકાર કર્યો છે. બોર્ડની ફૂલપ્રુફ સિસ્ટમનો દાવો ક્યાં ગયો. વિદ્યાર્થીઓને શાળામાં મોબાઇલ અને ગેજેટ પર પ્રતિબંધ છે તો પછી પેપર કોણે વાયરલ કર્યું એ સૌથી મોટો પ્રશ્ન છે.

ખોટી અફવામાં કે હિંમત ખોવાની  જરૂર નથી : એ.જે શાહ

ગુજરાત માધ્યમિક શિક્ષણ બોર્ડના ચેરમેન એ.જે.શાહે જણાવ્યું કે, 'પેપર ફૂટ્યું નથી એ પહેલી હકીકત છે. 2900 બિલ્ડીંગોમાં પરીક્ષા લેવાઈ રહી હતી. પરીક્ષાનું પેપર વર્ગખંડ સુધી સુરક્ષિત પહોંચે એવી વ્યવસ્થા છે. પેપર ફૂટવાની બાબત અયોગ્ય છે, પેપર ફૂટ્યું જ નથી. 13 દિવસથી પેપર શાંત માહોલમાં લેવાઈ રહી હતી. વર્ગખંડમાં પ્રવેશ બાદ કોઈને બહાર જવા દેવાતા નથી. 12:45 વાગ્યાનો બનાવ હોવાની બાબત સામે આવી રહી છે. પરીક્ષા શરૂ થવા પહેલાં કોઈ બાબત સામે નથી આવી. ખોટી અફવામાં કે હિંમત ખોવાની  જરૂર નથી. પોણા એક વાગ્યે કોઈ સુધી વાત પહોંચાડવી હોય તો કેવી રીતે પહોંચે? કોઈ એક વિદ્યાર્થી વહેલાં નીકળીને આવું કર્યું હોઇ શકે. સાયબરમાં તપાસ કરવામાં આવશે. અધિકારીઓને તપાસ સોંપવામાં આવશે. 2900 બિલ્ડીંગો પૈકી ક્યાંક કોઈની ભૂલ થઇ ગઇ હશે. નિયમ મુજબ પરીક્ષા પૂર્ણ થયા પહેલાં કોઈ બહાર ન નીકળી શકે. સરકાર અને વિભાગને બદનામ કરવાનો પ્રયત્ન થઈ રહ્યો છે. હિન્દીનું પેપર આપનાર 7.39 લાખ વિદ્યાર્થીઓ છે. ઇન્ટરનલ તપાસ બાદ ફરિયાદ આપવામાં આવશે.

ધોરણ 10નું હિન્દીનું પેપર વાયરલ થયાનું કનેક્શન છેક મહીસાગર સુધી

ધોરણ 10નું હિન્દીનું પેપર વાયરલ થયાનું કનેક્શન છેક મહીસાગર સુધી છે. મહીસાગર જિલ્લો વધુ એક વખત પેપર લિક કાંડને લઇ વિવાદમાં આવ્યો છે. ત્યારે આ મામલે સંતરામપુર તાલુકાના કાળીબેલ ગામના શૈલેશ પટેલની ધરપકડ કરાઇ છે. ગઈ કાલે ધોરણ 10નું હિન્દીનું પેપર સોશિયલ મીડિયામાં ફરતુ થયું હતું. પેપર લિક કાંડમાં આરોપી શૈલેશ પટેલ કે જે કાળીબેલ ગામનો રહેવાસી તેની પોલીસે ધરપકડ કરી છે.

પેપર વાયરલ કરનાર 4 લોકોની પોલીસે કરી અટકાયત

વધુમાં તમને જણાવી દઇએ કે,  'સોશિયલ મીડિયા પર ધો. 10નું હિન્દી પેપર વાયરલ થવા મામલે કોપી કેસ નોંધાયો છે. 5 લોકો સામે કોપી કેસનો ગુનો નોંધાયો છે. જેમાં અમિત તાવિયાડ, સુરેશ ડામોર, શૈલેષ પટેલ અને ઘનશ્યામ ચારેલના નામ સામે આવ્યાં છે. પેપર વાયરલ કરનાર 4 લોકોની પોલીસે અટકાયત કરી છે.

જો કે, પેપર વાયરલ કરનાર એક વ્યક્તિ હજુ પોલીસની પકડથી દૂર છે. અમિત તાવિયાડે પેપરનો ફોટો વોટ્સએપ પરથી સુરેશ ડામોરને મોકલ્યો હતો. સુરેશ ડામોરે આ ફોટો ઘનશ્યામ ચારેલને મોકલ્યો હતો. બાદમાં ઘનશ્યામ ચારેલે પેપરના ફોટોની પ્રિન્ટ કાઢી સુરેશને આપી હતી. ઘનશ્યામને પેપરની પ્રિન્ટ કાઢી સુરેશને આપવાની સૂચના મળી હતી. ઘનશ્યામ ચારેલને આ સૂચના ફુઆના દીકરા જયેશ ડામોરે આપી હતી. સુરેશ ડામોરે પેપર માટે શૈલેષ પટેલનો સંપર્ક કર્યો હતો. શૈલેષ પટેલ વૃદાંવન આશ્રમ શાળાનો શિક્ષક છે. જ્યારે અમિત તાવિયાડ ભૂતપૂર્વ વિદ્યાર્થી અને શૈલેષનો ઓળખીતો છે.