BIG NEWS / નહીં થંભે એસ.ટી બસના પૈડા: માજી સૈનિકો બાદ હવે ST કર્મીઓની હડતાળ પૂર્ણ, 25 વર્ષ જૂના પડતર પ્રશ્નોનો અંત

• રાજ્યમાં માજી સૈનિકો બાદ વધુ એક આંદોલન સમેટી લેવાયું
• ST નિગમના કર્મચારીઓની સરકારે 10 માંગો સ્વીકારી લીધી
• મોડી રાત સુધી મંત્રી પૂર્ણેશ મોદીની કર્મીઓ સાથે ચાલી હતી બેઠક

એક બાદ એક આંદોલનમાં ઘેરાયેલી સરકાર માટે વધુ એક રાહતના સમાચાર આવ્યા છે. રાજ્યના સામાન્ય માણસ માટે ધોરીનસ કહેવાય એવી સલામત સવારી ST નિગમના કર્મચારીઓ પોતાની પડતર માંગને લઈને ST બસના પૈડા થંભાવી દેવાની તૈયારીમાં જ હતા. ત્યારે વાહનવ્યવહાર મંત્રી પૂર્ણેશ મોદીની પહેલે રંગ લાવી છે.

રાજ્ય સરકારે 14માંથી 10 માંગ સ્વીકારી લીધી

મંત્રી પૂર્ણેશ મોદીએ મોડી રાત સુધી ST નિગમના કર્મચારીઓ સાથે બેઠક યોજી હતી. જે બેઠકમાં કર્મચારીઓની પડતર માંગ ઉપર ઊંડી ચર્ચા વિચારણાં કરવા એસ.ટી.નિગમના કર્મચારીઓની જે પડતર માંગ હતી તેમાં 14માંથી 10 માંગ સરકારે સ્વીકારી લીધી છે. એસ.ટી.નિગમના ત્રણેય યુનિયનને સમજાવવામાં વાહનવ્યવહાર મંત્રી સફળ રહ્યા છે અને હવે એસ.ટી.નિગમના કર્મચારીઓએ પણ આંદોલન સમેટવાની જાહેરાત કરી લીધી છે.

બાકી રહેતું એરિયર્સ 11 % મોંઘવારી ભથ્થા સાથે 3 હપ્તામાં ચૂકવાશે

નોંધનીય છે કે, રાજ્યમાં છેલ્લા ઘણા સમયથી વિવિધ વિભાગના કર્મચારીઓ હડતાળ કરી રહ્યાં છે. ત્યારે રાજ્યના ST વિભાગના કર્મચારીઓની હડતાળનો આજે અંત આવ્યો છે. વાહન વ્યવહાર મંત્રી સાથે ST નિગમના કર્મચારીની બેઠક કરવામાં આવી હતી. જેમાં કર્મચારીઓની માંગણીઓ બાબતે ચર્ચા કરીને 25 વર્ષ જૂના પડતર પ્રશ્નોનું સમાધાન થયું છે. બેઠક બાદ બાકી રહેતું એરિયર્સ 11 % મોંઘવારી ભથ્થા સાથે 3 હપ્તામાં ચૂકવવાનો નિર્ણય લેવામાં આવ્યો છે. જેમાં પ્રથમ હપ્તો 24 ઓકટોબર સુધી, જ્યારે બીજો હપ્તો 14 જાન્યુઆરી સુધી અને ત્રીજો હપ્તો 25 એપ્રિલ સુધીમાં ચૂકવવાનો નિર્ણય લેવામાં આવ્યો છે.

જાણો શું હતી ST નિગમના કર્મચારીઓની માંગ ? 

1. રાજ્યના તમામ કર્મચારીઓ ની જેમ ST ના કર્મચારીઓને 34 ટકા DA આપવાની માંગ 

2. વર્ગ 4ના કર્મચારીઓને છેલ્લા 2 વર્ષથી નથી મળ્યું બોનસ તે તાત્કાલિક આપવા માંગ 

3. ડ્રાઇવર અને કંડક્ટરને 1900 ગ્રેડ પે આપવા માંગ 

4. ફિક્સ પે ના કર્મચારીઓને 16,500 ની બદલે બીજા 19950 આપવા માંગ

5. છેલ્લા 25 વર્ષમાં ભાડા ભથ્થામાં નથી થયો વધારો, તાત્કાલિક વધારો કરવા માંગ  

6. 2011 પહેલા ચાલુ નોકરીએ મરણ પામેલ કર્મચારીના વારસદારોને નોકરીની માંગ 

7. રજાના પગારની રોકડમાં ચૂકવણી

8. નિવૃત કર્મચારીઓને રજા ના પગાર નું ચુકવણું કરવું 

9. નિગમના મહિલા કર્મચારીઓને રેસ્ટ રૂમની અલગ વ્યવસ્થા કરવા માંગ 

10. કામદાર વિરોધી 20/77 નો પરિપત્ર રદ્દ કરવા માંગ