ભારતને 2011 વર્લ્ડકપ ચેમ્પિયન બનાવવામાં મહત્વની ભૂમિકા ભજવનારા ગુજરાતના ફાસ્ટ બૉલર મુનાફ પટેલે ઇન્ટરનેશનલ ક્રિકેટના તમામ ફોર્મેટમાંથી નિવૃતિ જાહેર કરી દીધી છે. 35 વર્ષીય મુનાફે કરિયરમાં 13 ટેસ્ટ 70 વન-ડે અને 3 T-20 મેચ રમી છે. જોકે મુનાફ ક્રિકેટનું ગ્રાઉન્ડ નહી છોડે. તે આગામી T10 લીગનો ભાગ રહેશે જેમાં તે રાજપૂતની ટીમ માટે રમતો દેખાશે.
મુનાફે 2006માં ઇંગ્લેન્ડ સામે મોહાલી ટેસ્ટમાં ક્રિકેટમાં ડેબ્યૂ કર્યુ હતુ. તેના એક મહિના બાદ જ તેને પ્રથમ વનડે રમી હતી. તે 2006-11 દરમિયાન ટીમ ઇન્ડિયાનો નિયમિત સભ્ય રહ્યો. જોકે ઈજાને લીધે તે વાંરવાર ટીમની અંદર-બહાર થતો રહ્યો. મુનાફે પોતાની છેલ્લી ઇન્ટરનેશનલ મેચ 2011માં રમી હતી. 2011 વર્લ્ડ કપમાં ભારતના બૉલિંગ કોચ રહેલા એરિક સિમન્સે મુનાફને ‘અજ્ઞાત યોદ્ધા’નું બિરુદ આપ્યું હતું.
મુનાફે શનિવારે સોશિયલ મીડિયા પર નિવૃત્તિની જાહેરાત કરી. તેણે લખ્યુ કે ''હેલો ફ્રેન્ડ્સ હું નિવૃતિ લઇ રહ્યુ છુ અને મને તેનો કોઇ અફસોસ નથી. મેં જે ખેલાડીઓ સાથે ક્રિકેટ રમ્યુ તે બધા નિવૃતિ લઇ ચૂક્યા છે માત્ર ધોની રમી રહ્યો છે. બધાનો સમય પૂરો થઇ ગયો છે. મારી ઉંમર થઇ ચૂકી છે અમે ફિટનેસ પણ સાથ નથી આપી રહી.''
મુનાફે કહ્યું કે ''મારા માટે સૌથી મોટી સિદ્ધિ એ છે કે હું 2011 ના વર્લ્ડ કપ વિજેતા ટીમનો સભ્યો છું.'' મુનાફને આ ટૂર્નામેન્ટમાં ઈંગ્લેન્ડ સામે ટાઈ મેચ માટે યાદ કરવામાં આવે છે. આ મેચમાં ઇંગ્લેન્ડને છેલ્લી ઓવરમાં જીતવા માટે 14 રનની જરૂર હતી. પ્રથમ ત્રણ બોલમાં ઇંગ્લેન્ડે 9 રન બનાવી દીધા હતા. છેલ્લા બોલે 2 રનની જરૂર હતી. જેમાં તેણે માત્ર 1 રન આપીને મેચ ટાઇ કરાવી. મુનાફે વર્લ્ડ કપની 8 મેચોમાં 11 વિકેટ લીધી હતી. તે ભારત માટે ઝહિર ખાન (21) અને યુવરાજ સિંહ (15) બાદ ત્રીજો સૌથી સફળ બૉલર રહ્યો.
કરિયરની શરૂઆતમાં મુનાફની બોલિંગ એક્શન અને લાઈનલેન્થના કારણે તેની ઓસ્ટ્રેલિયાના મહાન બોલર ગ્લેન મેકગ્રા સાથે તુલના થતી હતી. જોકે સતત ઈજાને લીધે તે ક્રિકેટમાં જોઇને તેવી સફળતા મેળવી ચૂક્યો નહોતો. મુનાફે કહ્યું કે ''હું ક્યારેય એક સારો ફિલ્ડર નહોતો અનેહું જાણું છું કે તમને પણ મારા પર ઘણી વખત ગુસ્સો આવ્યો હશે જોકે હું કહેવા માગું છું કે મેદાન પર મેં હંમેશા મારું 100% આપ્યુ છે.''
મુનાફે જીવનમાં ઘણો સંઘર્ષ કર્યો છે. તે એક ટાઈલ્સ કંપનીમાં બૉક્સમાં ટાઇલ્સ પેક કરવાનું કામ કરતો હતો. તેને આઠ કલાકની શિફ્ટ પછી 35 રૂપિયા મળતા હતા. મુનાફે કહ્યુ કે ''મારી પાસે બીજો કોઇ રસ્તો ન હતો. મારા પિતા એકલા જ કામ કરનારા સભ્ય હતો અને તેટલા રૂપિયા ગુજરાન ચલાવવા માટે પૂરતા ન હતા આજે મેં કંઇ પણ મેળવ્યુ તે ક્રિકેટને આભારી છે.''