સ્પોર્ટસ ન્યૂઝ / ભારત-પાકિસ્તાન તણાવ વચ્ચે આવ્યો ચોંકાવનારો રિપોર્ટ, શું ટીમ ઇન્ડિયા નહીં રમે એશિયા કપ?

આ વર્ષે સપ્ટેમ્બર માસમાં યોજાનારી એશિયા કપ ટુર્નામેન્ટમાંથી બહાર રહેવાનો નિર્ણય ભારત લઇ શકે છે. એક અગ્રણી અખબારના અહેવાલ મુજબ BCCI એ નિર્ણય લીધો છે કે ભારતીય ટીમ એશિયા કપનો ભાગ નહીં હોય. ભારતીય ક્રિકેટ કંટ્રોલ બોર્ડ ટૂંક સમયમાં આ અંગે જાહેરાત કરશે તેવું રિપોર્ટમાં જણાવાયું છે. સાથે જ બીસીસીઆઈએ એસીસીને આવતા મહિને શ્રીલંકામાં યોજાનાર મહિલા ઇમર્જિંગ એશિયા કપ અને સપ્ટેમ્બરમાં યોજાનાર પુરુષ એશિયા કપમાંથી ખસી જવાના નિર્ણયની જાણ કરી છે. ACC હાલમાં પાકિસ્તાનના ગૃહમંત્રી મોહસીન નકવીના નેતૃત્વમાં છે, જેઓ પાકિસ્તાન ક્રિકેટ બોર્ડના અધ્યક્ષ પણ છે.

રિપોર્ટમાં કહેવામાં આવ્યું છે કે, "આ નિર્ણય પાકિસ્તાન ક્રિકેટને અલગ પાડવાના પ્રયાસનો એક ભાગ છે. ભારતીય ટીમ એવી ટુર્નામેન્ટમાં ભાગ લઈ શકતી નથી જેનું નેતૃત્વ પાકિસ્તાની મંત્રી કરે છે. આ દેશની ભાવના છે. અમે આગામી મહિલા ઇમર્જિંગ ટીમ્સ એશિયા કપમાંથી અમારા ખસી જવા અંગે ACC ને મૌખિક રીતે જાણ કરી દીધી છે, અને તેમની ઇવેન્ટ્સમાં અમારી ભાવિ ભાગીદારી પણ હવે નહીં હોય, અમે ભારત સરકાર સાથે સતત સંપર્કમાં છીએ."

બીસીસીઆઈના આ નિર્ણયથી સપ્ટેમ્બરમાં ભારતમાં યોજાનારા એશિયા કપ પર પ્રશ્નાર્થ ચિહ્ન લાગી ગયું છે. ભારત, પાકિસ્તાન, બાંગ્લાદેશ, અફઘાનિસ્તાન અને શ્રીલંકા સહિતની આ ટુર્નામેન્ટ મુલતવી રાખવાનો નિર્ણય ભવિષ્યમાં લેવામાં આવી શકે છે. સૂત્રોએ જણાવ્યું હતું કે BCCI જાણે છે કે ભારત વિના એશિયા કપનું આયોજન શક્ય નથી કારણ કે આંતરરાષ્ટ્રીય ક્રિકેટ ઇવેન્ટ્સના મોટાભાગના પ્રાયોજકો ભારતના છે. આ ઉપરાંત, ભારત ટુર્નામેન્ટમાં ભાગ ન લેવાને કારણે, બ્રોડકાસ્ટર્સ પણ એશિયા કપમાં રસ ગુમાવશે.

આ પણ વાંચોઃ

ઓપરેશન સિંદૂરના ડેલિગેશનમાં સામેલ નહીં થાય TMC સાંસદ યુસુફ પઠાણ, જાણો કારણ

2024 માં, સોની પિક્ચર્સ નેટવર્ક્સ ઇન્ડિયા (SPNI) એ એશિયા કપના મીડિયા અધિકારો US$170 મિલિયનની ફીમાં ખરીદ્યા. જોકે, જો આ વર્ષે એશિયા કપ નહીં થાય તો આ સોદો ફરીથી કરવો પડશે. 2023 એશિયા કપ હાઇબ્રિડ મોડેલ હેઠળ રમાયો હતો. જેમાં ટુર્નામેન્ટનો એક ભાગ શ્રીલંકામાં યોજાયો હતો. કોલંબોમાં ભારતે ટાઇટલ જીત્યું હતું, જ્યારે પાકિસ્તાન ફાઇનલ માટે ક્વોલિફાય પણ થઈ શક્યું નહોતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ