IPL ચેમ્પિયન ચેન્નાઇ સુપરકિંગ્સે કેપ્ટન મહેન્દ્રસિંહ ધોની અને રોયલ ચેલેન્જર્સ બેંગલુરૂએ ભારતીય કેપ્ટન વિરાટ કોહલીને IPL 2019માં 12મી સિઝન માટે રિટેન કર્યા છે. દિલ્હી ડેરડેવિલ્સે ગૌતમ ગંભીર અને કિંગ્સ ઇલેવન પંજાબે યુવરાજ સિંહને બહાર કર્યા છે. IPL-12 માટે 18 ડિસેમ્બરે યોજાનારી હરાજી પહેલા આઠ ફ્રેન્ચાઇઝી ટીમોએ રિટેન કરેલા અને રિલીઝ કરેલા ખેલાડીઓની જાહેરાત કરી છે. 8 ટીમોએ 44 વિદેશી ખેલાડી સહિત 130 ખેલાડીઓને રિટેન કર્યા છે.
ધોની રોહિત સાથે રિષભ પંત પણ 15 કરોડમાં રિટેન:
મુંબઇ ઇન્ડિયન્સે પોતાના સૌથી સફળ કેપ્ટન રોહિત શર્માને રિટેન કર્યો છે. ધોની અને રોહિતને 15-15 કરોડ રૂપિયા મળશે જ્યારે વિરાટ કોહલીને 17 કરોડ રૂપિયા મળશે. 15 કરોડના બ્રેકેટમાં રિષભ પંત પણ સામેલ છે તેને દિલ્હીએ રિટેન કર્યો છે. ચેન્નાઇએ સુરેશ રૈના (11 કરોડ) પંજાબે લોકેશ રાહુલ (11 કરોડ) કોલકાતાએ સુનીલ નારાયણ (12.50 કરોડ) રાજસ્થાને સ્ટીવ સ્મિથ અને બેન સ્ટોક્સ (બન્નેને 12.50 કરોડ) મુંબઇએ હાર્દિક પંડ્યા (11 કરોડ) બેંગલુરૂએ એબીડી વિલિયર્સ (11 કરોડ) અને હૈદરાબાદે ડેવિડ વોર્નર (12.50 કરોડ) અને મનિષ પાંડે (11 કરોડ)ને રિટેન કર્યા છે.
ચેન્નાઇએ સૌથી વધારે ખિલાડીઓને કર્યા રિટેન:
ચેન્નાઇ સુપરકિંગ્સે સૌથી વધુ આઠ વિદેશી ખેલાડી સહિત 23 ખેલાડીઓને રિટેન કર્યા છે. હૈદરાબાદે 20 દિલ્હીએ 15 ખેલાડી પંજાબે 10 કોલકાતાએ 13 મુંબઇએ 18 રાજસ્થાને 16 ખેલાડી અને બેંગલુરૂએ 15 ખેલાડીઓને રિટેન કર્યા છે. IPL-12 માટે 18 ડિસેમ્બરે જયપુરમાં યોજાનારી હરાજીમાં 20 વિદેશી અને 50 ભારતીય સહિત કુલ 70 ખેલાડી ખરીદવામાં આવશે.
કોલકાતાએ કુરેન અને મિશેલ જોનસનને કર્યા રિલીઝ:
કોલકાતા નાઇટ રાઇડર્સે મિશેલન જોનસન ટોમ કુરેન કેમરૂન ડેલપોર્ટ અને જાવોન સિયરલેસને રિલીઝ કરી દીધા છે. ફ્રેન્ચાઇઝીએ કુલ 13 ખેલાડીને રિટેન કર્યા છે. ફ્રેન્ચાઇઝીએ દિનેશ કાર્તિક કુલદીપ યાદવ રોબિન ઉથપ્પા અને પીષુષ ચાવલાને રિટેન કર્યા છે. વિદેશી ખેલાડીઓમાં ક્રિસ લિન આંદ્રે રસેલ અને સુનીલ નારાયણને રિટેન કર્યા છે. શુભમન ગિલ શિવમ માવી પ્રસિદ્ધ ક્રિષ્ણા અને નીતિશ રાણા કમલેશ નાગરકોટી અને રિકૂ સિંહને પણ કોલકાતાએ રિટેન કર્યા છે. મિશેલ સ્ટાર્કને ફ્રેન્ચાઇઝીએ રિલીઝ કરી દીધો છે.
ફ્રેન્ચાઇઝી ટીમોએ રિટેન કરવામાં ખર્ચ કર્યા 510.75 કરોડ રૂપિયા:
ટીમોએ ખેલાડીઓને રિટેન કરવામાં 510.75 કરોડ રૂપિયા ખર્ચ કરી દીધા છે. જ્યારે 145.25 કરોડ રૂપિયાની સેલેરી કેપ બાકી છે. પંજાબ પાસે સૌથી વધુ 36.20 કરોડ રૂપિયા બાકી છે. ચેન્નાઇ પાસે 8.40 કરોડ દિલ્હી પાસે 25.50 કરોડ કોલકાતા પાસે 15.20 કરોડ મુંબઇ પાસે 11.15 કરોડ રાજસ્થાન પાસે 20.95 કરોડ બેંગલુરૂ પાસે 18.15 કરોડ અને હૈદરાબાદ પાસે 9.70 કરોડ રૂપિયા બાકી છે.