સ્પોર્ટસ / ક્રિકેટજગતમાં શોકની લહેર : ભૂતપૂર્વ ભારતીય દિગ્ગજ સ્પિનરનું લંડનમાં હૃદયરોગના હુમલાથી નિધન

Dilip Doshi Died In London : ભૂતપૂર્વ ભારતીય ક્રિકેટર દિલીપ દોશીનું અવસાન થયું છે. દિલીપ દોશીએ સોમવાર, 23 જૂને લંડનમાં અંતિમ શ્વાસ લીધા. તેઓ ઘણા દાયકાઓથી લંડનમાં રહેતા હતા. પ્રાથમિક વિગતો મુજબ દિલીપ દોશીનું હૃદયરોગના હુમલાથી અવસાન થયું. તેમણે 32 વર્ષની ઉંમરે ટેસ્ટ ક્રિકેટમાં પ્રવેશ કર્યો અને માત્ર 4 વર્ષની કારકિર્દીમાં દિલીપ દોશીએ 100 થી વધુ વિકેટો લીધી. તેમણે અચાનક અને ખૂબ જ શાંતિથી ક્રિકેટથી પોતાને દૂર કરી દીધા. દિલીપ દોશીએ તેમના ક્રિકેટ કારકિર્દી પર એક આત્મકથા પણ લખી છે, જેનું નામ છે સ્પિન પંચ.

દિલીપ દોશીએ ટેસ્ટમાં 100 થી વધુ વિકેટ લીધી

દિલીપ દોશી ભારતના ડાબા હાથના સ્પિન બોલર હતા. તેઓ 1979 થી 1983દરમિયાન ભારતની આંતરરાષ્ટ્રીય ટીમનો ભાગ હતા. તેમણે 32 વર્ષની ઉંમરે પોતાની ટેસ્ટ કારકિર્દીની શરૂઆત કરી હતી. તેમણે પોતાની કારકિર્દીમાં ભારત માટે 33 ટેસ્ટ અને 15 વનડે રમ્યા હતા. દિલીપ દોશીએ 33 મેચમાં 114 વિકેટ લીધી હતી. તેમણે 6 વખત 5 વિકેટ લેવાનો રેકોર્ડ પણ બનાવ્યો છે.

વનડેમાં પણ સફળ કારકિર્દી

દિલીપ દોશીએ પોતાની કારકિર્દીમાં 15 વનડે મેચ રમી હતી, જેમાં તેમણે 3.96 ની ઇકોનોમી સાથે બોલિંગ કરી હતી અને કુલ 22 વિકેટ લીધી હતી. આ ઉપરાંત દિલીપ દોશીએ ફર્સ્ટ ક્લાસ ક્રિકેટ પણ રમ્યું છે. તેમણે સૌરાષ્ટ્ર, બંગાળ, બર્કશાયર અને નોટિંગહામશાયર માટે ફર્સ્ટ ક્લાસ ક્રિકેટ રમી છે.

આ પણ વાંચો : જે વિરાટ-સચિન ન કરી શક્યા, તે પંતે કરી બતાવ્યું, ઈંગ્લેન્ડમાં તોડ્યા ઘણા મોટા રેકોર્ડ

દિલીપ દોશીનો પરિવાર

દિલીપ દોશીના પરિવારમાં તેમની પત્ની કાલિંદી, એક પુત્ર નયન અને એક પુત્રી વિશાખાનો સમાવેશ થાય છે. દિલીપ દોશીનો પુત્ર નયન પણ સૌરાષ્ટ્ર અને સરે માટે ફર્સ્ટ ક્લાસ ક્રિકેટ રમી ચૂક્યો છે. દિલીપ દોશી એક દાયકાથી વધુ સમયથી તેમના પરિવાર સાથે લંડનમાં રહેતા હતા અને ત્યાં જ તેમણે અંતિમ શ્વાસ લીધા.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ