ગાંધીનગર: 2019ની લોકસભા ચૂંટણીની તૈયારીઓના ભાગરૂપે ગાંધીનગર ખાતે ભાજપની બેઠક યોજાઈ હતી. મુખ્યમંત્રી વિજય રૂપાણી અને નાયબ મુખ્યમંત્રી નિતીન પટેલના અધ્યક્ષ સ્થાને યોજાયેલી આ બેઠકમાં લોકસભા અને રાજ્યસભાના સાંસદો હાજર રહ્યા હતા. બેઠકમાં લોકસભા ચૂંટણીને લઈને નેતાઓ સાથે રણનીતિ તૈયાર કરવામાં આવી.
ગાંધીનગર ખાતે યોજાયેલ આ બેઠક બાદ ભાજપ પ્રદેશ અધ્યક્ષ જિતુ વાઘાણીએ મીડિયા સાથે વાતચીત કરી હતી. તેમણે જણાવ્યું કે આગામી લોકસભાની ચૂંટણીમાં ભાજપ રાજ્યની તમામ 26 બેઠકો પર ફરી જીત મેળવશે.
આ સાથે જ કોંગ્રેસ પર પ્રહાર કરતા રહ્યું કે કોંગ્રેસની નકારાત્મકતા સામે ભાજપના કાર્યો દ્રઢ બન્યા છે. કોંગ્રેસે માત્ર જાતિવાદના નામે ચૂંટણી જિતવાનો પ્રયાસ કરે છે. કારણ કે તેની પાસે અન્ય કોઈ મુદ્દો જ નથી. પરંતુ તમામ બેઠકો પર ફરી ભાજપનો ભગવો લહેરાવવા માટે રણનીતિ તૈયાર થઈ ચૂકી છે.
ઉલ્લેખનીય છે કે લોકસભાની ચૂંટણીના પડઘમ વાગી રહ્યા છે અને નજીકના જ ભવિષ્યમાં ચૂંટણી આવનારી છે. ભાજપે અગાઉથી જ તૈયારીઓ આરંભી છે જેના ભાગરૂપે આજરોજ એક ખાસ બેઠકનું આયોજન ગાંધીનગર ખાતે કરવામાં આવેલ. આ બેઠકમાં 2019 માટેની પૂર્વ તૈયારીઓ અંગે ખાસ ચર્ચા કરવામાં આવી હતી. જેમાં લોકસભા અને રાજ્યસભાના સાંસદો ખાસ હાજર રહ્યા હતા.