UP MLC Election Result / બહુચર્ચિત સપા ઉમેદવાર ડૉ. કફીલ ખાન ચૂંટણી હારી ગયા, ભાજપે જીતી લીધી આ સીટ

• વિધાન પરિષદની ચૂંટણીના આજે પરિણામ
• ચર્ચિત સપા ઉમેદવાર કફીલ ખાન ચૂંટણી હારી ગયા
• ભાજપના ઉમેદવારની જીત થઈ

UP વિધાન પરિષદ ચૂંટણીમાં દેવરિયા -કુશીનગર સીટથી સમાજવાદી પાર્ટીના ચર્ચિત ઉમેદવાર ડો. કફીલ ખાન ચૂંટણી હારી ગયા છે. કફીલ ખાનને ભાજપના ઉમેદવારે રતનપાલ સિંહે હરાવી દીધા છે. દેવરિયા કુશીનગર સીટ ત્યારે ચર્ચામાં આવી હતી, જ્યારે અખિલેશ યાદવે અહીંથી ભાજપની વિરુદ્ધ કફીલ ખાનને ઉતાર્યા હતા. ત્યારથી સૌની નજર આ સીટ પર બનેલી હતી. આ સીટ પર શનિવારે વોટિંગ થયું હતું. અહીં 98.11 ટકા મતદાન થયું હતું. 

ભાજપ સામે હારી ગયા કફીલ ખાન

દેવરિયા કુશીનગર એમએલસી સીટ પર કુલ 5513 મતદારો હતા. જેમાંથી કુશીનગરમાં 2727 અને દેવરિયામાં 2786 મતદારો હતા. આ સીટ પર મોટી સંખ્યામાં વોટિંગ થયું હતું. સપા ઉમેદવાર ડો. કફીલ ખાન અને ભાજપ ઉમેદવાર રતનપાલ સિંહની વચ્ચે અહીં મોટી ટક્કર માનવામાં આવી રહી હતી. પણ હવે પરિણામ સૌની સામે આવી ગયું છે અને ભાજપે આ સીટ પર કબ્જો જમાવી લીધો છે. ડો. કફીલ ખાનને આ સીટ પર ભાજપના ઉમેદવાર રતનપાલ સિંહની સામે હારનો સામનો કરવો પડ્યો છે. 

ગોરખપુર કાંડ બાદ આવ્યા હતા ચર્ચામાં

આપને જણાવી દઈએ કે, શનિવારે યુપી વિધાન પરિષદની 36માંથી 27 સીટો પર મતદાન થયું હતું. જેના માટે આજે સવારથી જ વોટની ગણતરી ચાલુ છે. ભાજપના નવ ઉમેદવારો બિનહરીફ ચુંટાઈ આવ્યા છે. જ્યારે બાકીની સીટો પર વોટની ગણતરી ચાલુ છે. પરિણામ પહેલા ડો. કફીલ ખાન સતત જીતનો દાવો કરતા હતા. એટલુ જ નહીં ઈવીએમની દેખરેખ રાખવા માટે તેઓ સતત સ્ટ્રોંગ રૂમ બહાર પહેરો આપી રહ્યા હતા.