જો તમે દિવાળી કે ધનતેરસના શુભ મુહર્ત ઉપર સોના ખરીદવા ઇચ્છો છો તો તમે કેન્દ્ર સરકારની આ ખાસ યોજનામાં ઈન્વેસ્ટ કરી શકો છો.
આ યોજનાને સોવરેન બોન્ડ સ્કીમ કહે છે અને અહીં તમે ફિઝીકલી ગોલ્ડ ખરીદ્યા વિના સોનામાં રોકાણ કરી શકો છો.
સોવરેન ગોલ્ડ બોન્ડનું આ 8મું સબ્સ્ક્રિપ્શન
ફેસ્ટિવ સિઝનમાં RBI સોવરેન ગોલ્ડ બોન્ડ સ્કીમની શરૂઆત આજથી થઇ છે. નાણાકીય વર્ષ 2020-21 માટે સોવરેન ગોલ્ડ બોન્ડનું આ 8મું સબ્સ્ક્રિપ્શન છે જે રોકાણ કરવાનો સમય 9 નવેમ્બરથી 13 નવેમ્બર સુધીનો છે.
RBIએ આ વખતે સોનાની ઈશ્યુ પ્રાઈઝ 5177 રૂપિયા પ્રતિ ગ્રામ છે. રિઝર્વ બેન્કે આપેલી માહિતી પ્રમાણે ઓનલાઇન ઈન્વેસ્ટ કરનાર લોકોને પ્રતિ ગ્રામ 50ની છૂટ મળશે. નોંધનીય છે કે ગઈ સોવરેન ગોલ્ડ બોન્ડ સ્કીમમાં એક ગ્રામ સોનાનો ભાવ 5051 રૂપિયા નક્કી કરવામાં આવ્યો હતો.
નોંધનીય છે કે આ વખતે સરકારી ગોલ્ડ બોન્ડની કિંમત બજારમાં ચાલી રહેલા સોનાના રેટથી ઓછા છે. આ કિંમત RBI દ્વારા નક્કી કરવામાં આવે છે. આ બોન્ડમાં ન્યુનતમ 1 ગ્રામ જેટલું રોકાણ કરી શકાય છે. આ રોકાણ ઉપર ટેક્સની છૂટ પણ મળે છે. આ ઉપરાંત બેન્કમાંથી પણ લોન મળી શકે છે.
એક વ્યક્તિ એક વર્ષમાં વધુમાં વધુ 500 ગ્રામ અને HUF પરિવાર એક વર્ષમાં 4 કિલો જેટલા સોનાના બોન્ડ ખરીદી શકે છે.
ઇલેક્ટ્રિક બોન્ડને ફિઝિકલ સોનાની જેમ સાચવવાની જરૂર નથી
આ બોન્ડનો સૌથી મોટો ફાયદો એવો છે કે આ સોનુ ઇલેક્ટ્રિક બોન્ડ ફોર્મેટમાં છે જેને તમારે ફિઝિકલ સોનાની જેમ સાચવવાની જરૂર નથી. તેને સાચવવા માટે લોકરનો ખર્ચ કરવાની પણ જરૂર નથી. આ ગોલ્ડ બોન્ડને તમે બેંકો, પોસ્ટ ઓફિસ જેવી સંસ્થાઓમાંથી ખરીદી શકો છો.
આ ઉપરાંત આ બોન્ડ ઉપર વાર્ષિક 2.5% રિટર્ન મળશે. આ બોન્ડમાં સોનામાં કોઈ અશુદ્ધિની સંભાવના હોતી નથી. આ ઉપરાંત આ બોન્ડ 8 વર્ષ પછી મેચ્યોર થશે. જો કે રૂપિયા 5 વર્ષ પછી કાઢવાનો વિકલ્પ પણ ઉપલબ્ધ છે.
આ યોજનાની શરૂઆત નવેમ્બર 2015માં કરવામાં આવી હતી અને તેનો હેતુ સોનાની ભૌતિક માંગને ઓછો કરવાનો છે.