સમગ્ર વિશ્વ અત્યારે એક મહામારીનો સામનો કરી રહ્યું છે જેનું નામ છે કોરોના વાયરસ. ભારત સહિત સમગ્ર દેશોના આરોગ્ય વિભાગે ચેતવણી આપી છે કે આ રોગ અતિશય ચેપી છે આથી દર્દીઓ જ નહિ શંકાસ્પદ કેસો પણ આઈસોલેશનમાં જતા રહે એ જરૂરી છે. જો એમ ન થાય તો વરવા પરિણામો ભોગવવા પડી શકે છે. એવું જ એક ઉદાહરણ સાઉથ કોરિયાની એક મહિલા દર્દી છે જેની બેદરકારીથી સાઉથ કોરિયામાં તેના સંપર્કમાં આવેલા તોતિંગ ૧૧૬૦ લોકો કોરોનાવાયરસનો ભોગ બન્યા અને સમગ્ર દેશ કોરોનાવાયરસની ચપેટમાં આવ્યો.
એક મહિલાથી ૧૧૬૦ લોકોને ચેપ લાગ્યો
૧૦ દિવસમાં સાઉથ કોરિયામાં ૨૦૦૦ કેસ ઉછળ્યા
મહિલાએ સેલ્ફ આઈસોલેશનની તકેદારી ન રાખતા ગંભીર પરિણામ
સાઉથ કોરિયા એ શરૂઆતના તબક્કાથી જ વાયરસને ખૂબ ગંભીરતાથી લઇને તકેદારીના તમામ પગલા ભરવાના શરુ કરી દીધા. જો કે શરુઆતના ૩૦ દર્દીઓ બાદ ૩૧મી ૬૧ વર્ષીય મહિલા દર્દીએ એક ગંભીર ભૂલ કરી.
આ મહિલાએ સોશ્યલ ડિસ્ટન્સિંગની તાકીદને અવગણીને લોકોને મળવાનું ચાલુ રાખ્યું. આ મહિલાને તેના ટેસ્ટ પહેલા દાએગુ નામના શહેરમાં એક ટ્રાફિક અકસ્માત થયો હતો. તેણે ત્યાર બાદ ઓરિયેન્ટલ મેડિસીન હોસ્પિટલની મુલાકાત લીધી હતી. ખૂબ તાવના લક્ષણ અને ડોકટરોએ આપેલી ચેતવણી છતાં આ મહિલા પોતાના મિત્રો સાથે લંચ લેવા હોટલમાં ગઈ હતી.
ત્યાર પછી તે 'શીનચેઓનજી' સંપ્રદાયના ચર્ચમાં સેવા આપવા માટે ૯ ફેબ્રુઆરી અને ૧૬ ફેબ્રુઆરીએ ગઈ હતી. ત્યાર બાદ તેના લક્ષણો બદતર થતા આખરે તે ટેસ્ટ કરાવવા બીજી હોસ્પિટલમાં ગઈ હતી.
ટેસ્ટમાં તે સાઉથ કોરિયાની ૩૧મી દર્દી જાહેર થઇ હતી. જો કે તેની લોકોને હળવામળવાની ભૂલ દેશને ભારે પડી હતી અને ગણતરીના દિવસોમાં સાઉથ કોરિયામાં પોઝીટીવ કેસની સંખ્યા ભારે ઉછળી હતી. નોંધપાત્ર છે કે આ પૈકી મોટાભાગના કેસના વ્યક્તિઓ આ મહિલાને ક્યાંક ને ક્યાંક મળ્યા હતા.
સાઉથ કોરિયાના મોટા ભાગના અસરગ્રસ્ત વિસ્તારો દાએગુ શહેર અને ચર્ચની આસપાસના છે જયારે રાજધાની સીઓલમાં ૨.૫ કરોડ જેટલી વસ્તી હોવા છતાં ત્યાં દર્દીઓની સંખ્યા ઘણી ઓછી છે. નોંધનીય છે કે હાલમાં કોરોના વાયરસના કેસીસ સાઉથ કોરિયામાં ૮૧૬૨થી પણ વધુ છે અને ૭૫થી વધુ લોકોના મોત થયા છે. ચીન પછી એશિયાના સૌથી વધુ કેસીસ સાઉથ કોરિયામાં છે.
આ સુપર સ્પ્રેડર ૧૮મી ફેબ્રુઆરીએ કોરોના પોઝીટીવ જાહેર થઇ હતી જયારે સાઉથ કોરિયામાં ફક્ત ૩૧ કેસ હતા. ૧૦ દિવસમાં કેસનો આંકડો ૨૦૦૦ને પાર કરી ગયો હતો. આ ચર્ચના લીડર 'લી મેન હી'એ આ ગંભીર ભૂલ બદલ સૌની જમીન ઉપર નમીને માફી માંગી હતી.
આમ સેલ્ફ આઈસોલેશન અને ક્વોરેનટાઈન કેટલા જરૂરી છે એ આવા કિસ્સાઓ પરથી જાણી શકાય છે.