સુરતઃ સરકાર ખેડૂતોને તેમની ઉપજના યોગ્ય ભાવ મળી રહે તે માટે ટેકાના ભાવે ખેતપેદાશની ખરીદી કરી રહી છે. પરંતુ સુરત સહિત દક્ષિણ ગુજરાતમાં ઉલટી ગંગા જોવા મળી રહી છે. સહકારી મંડળીઓ સરકારે જાહેર કરેલા ટેકાના ભાવો કરતા ખેડૂતોને વધુ ભાવ ચૂકવીને ખેત પેદાશની ખરીદી કરી રહી છે. સરકારની ટેકાના ભાવની યોજનાનો ફિયાસ્કો થયો છે. દક્ષિણ ગુજરાતમાં સહકારી માળખું એટલું મજબૂત છે કે સરકારના ટેકાના ભાવો કરતા વધુ ભાવ ખેડૂતોને મળી રહ્યા છે.
ખાસ કરીને સમગ્ર વર્ષ દરમ્યાન ખાતર બિયારણ સહિત અનેક મુદ્દે ખેડૂતોને મદદ કરતી સહકારી મંડળીઓ જ્યારે ડાંગર સહિતની ખેત પેદાશ તૈયાર થાય ત્યારે સારા એવા ભાવ આપી તેની ખરીદી પણ કરે છે. આને પિલણ પદ્ધતિ કહેવાય છે જેમાં ખેડૂતોને જે બિયારણ ખાતરની મદદ કરવામાં આવી હોય તે રકમ બાદ કરાય છે અને ખેત પેદાશની બજારમાં જ્યારે વધુ ઉપજ આવે ત્યારે વેચાણ કરવામાં આવે છે અને તેનો નફો પણ બધા સભાસદોને વહેંચી દેવામાં આવે છે.
સામાન્યરીતે સરકાર ખેત પેદાશો માટે ટેકાના ભાવ જાહેર કરીને ખેડૂતોને એક આર્થિક સંરક્ષણ આપતી હોય છે. પરંતુ દક્ષિણ ગુજરાતમાં સહકારી માળખું એટલું મજબૂત છે કે સરકારના ટેકાના ભાવો કરતા વધુભાવ ખેડૂતોને મળી રહ્યા છે.
સુરતમાં પાલ કોટન મંડળી જહાંગીરપુરા જિન અને ઓલપાડ સહકારી મંડળી દવાઈએ આશરે 10 લાખ ગુણ ડાંગરની હાલમાં ખરીદી કરી છે. જ્યારે પુરવઠા નિગમમાં માત્ર 1500 ગુણ જેટલી જ ખરીદી થઈ શકી છે.