સમગ્ર ગુજરાતમાં મેઘરાજાએ સૌરાષ્ટ્ર અને દક્ષિણ ગુજરાતમાં ધબધબાટી બોલાવી છે. ત્યારે દક્ષિણ ગુજરાતમાં તો ભારે વરસાદને લઇને વહીવટી તંત્ર પણ સાબદું થઈ ગયું છે.
વલસાડ જિલ્લામાં સતત વરસાદથી જનજીવન પ્રભાવિત
વાપીમાં ત્રણ ઇંચથી વધારે વરસાદ વરસતા શાળાઓમાં પાણી
સુરત તંત્ર એલર્ટ : સ્થાનિક કંટ્રોલ રૂમના નંબરો જાહેર કરાયા
ચોમાસાની શરૂઆત મોટે ભાગે ગુજરાતના જિલ્લાઓમાં થઈ ચૂકી છે ત્યારે અનેક ડેમોમાં પણ પાણીની આવક શરૂ થઈ ગઇ છે. જેમાં દક્ષિણ ગુજરાતના ખેડૂતો અને લોકો માટે આશીર્વાદરૂપ એવા તાપી જિલ્લાના ઉકાઈ ડેમના ઉપરવાસ એટલે કે મહારાષ્ટ્ર અને મધ્યપ્રદેશમાં વરસી રહેલા વરસાદના કારણે ઉકાઈ ડેમમાં 11,889 ક્યુસેક પાણીની આવક થતા ડેમનું લેવલ 315.55 ફૂટ પર પહોંચ્યું છે જેમાં ચાલુ વર્ષે નવા નીરની આવક થતા ખેડૂતો અને લોકોમાં ખુશી જોવા મળી રહી છે.
દક્ષિણ ગુજરાતના ભરૂચ જિલ્લામાં ભારે વરસાદની શક્યતા
દક્ષિણ ગુજરાતના ભરૂચ જિલ્લામાં પણ ભારે વરસાદની શક્યતા રહેલી છે. ભરૂચમાં પણ ઓરેન્જ એલર્ટ અપાતા વહીવટી તંત્ર પણ સાબદું થઈ ગયું છે. હોડીઓને કિનારે લાંગરવામાં આવી રહી છે.
વલસાડ જિલ્લામાં ભારે વરસાદ વરસતા કોયલી ખાડીના પાણી પુલ પર ફરી વળ્યાં
વલસાડ જિલ્લામાં ભારે વરસાદ વરસ્યો. જેને પગલે લીલાપોર અને સરોધી વચ્ચે કોયલી ખાડી બે કાંઠે વહેતી થઈ છે. કોયલી ખાડીના પાણી પુલ પર ફરી વળ્યાં છે. જેના લીધે લોકો જીવના જોખમે ખાડી પસાર કરતા જોવા મળી રહ્યા છે. સતત વરસતા વરસાદથી જનજીવન પ્રભાવિત થયું છે.
વાપીમાં ત્રણ ઇંચથી વધારે વરસાદ વરસતા શાળામાં પાણી ભરાયા
વાપીમાં ત્રણ ઇંચથી વધારે વરસાદ વરસતા વાપીની ગીતા નગર સરકારી પ્રાથમિક શાળામાં પાણી ભરાઇ ગયા છે. શાળાના પરિસર લોબી અને ક્લાસરૂમમાં પાણી ભરાઇ જતા બાળકોની સલામતી માટે બાળકોને શાળામાંથી રજા આપી દેવાઇ છે. અહીં દર વખતે ભારે વરસાદના કારણે શાળામાં પાણી ભરાય છે. શાળાના ક્લાસરૂમમાં પાણી ભરાઈ જતા આજે શિક્ષણ કાર્ય બંધ રખાયું છે. બાળકોની સાથે-સાથે શાળાનો સ્ટાફ પણ પરેશાન થઇ ગયો છે.
વલસાડ જિલ્લામાં સાર્વત્રિક વરસાદ થતા જિલ્લાનું વહીવટીતંત્ર એલર્ટ
વલસાડ જિલ્લામાં સવારથી જ સાર્વત્રિક વરસાદ વરસતા જિલ્લાનું વહીવટીતંત્ર એલર્ટ થઇ ગયું છે. ઉમરગામ 1 ઇંચ, ધરમપુર 1.2 ઇંચ વરસાદ, પારડી 2 ઇંચ, વલસાડ 2 ઇંચ અને વાપીમાં 2.5 ઈંચ વરસાદ વરસ્યો છે. અહીં સરેરાશ દોઢથી અઢી ઈંચ જેટલો વરસાદ અહીં વરસ્યો છે.
નવસારી જિલ્લામાં સાર્વત્રિક મેઘમેહર
નવસારી જિલ્લામાં પણ સાર્વત્રિક મેઘમેહર જોવા મળી રહી છે. નવસારી જિલ્લામાં સારો વરસાદ વરસવાથી ખેતરોમાં પાણી ભરાઇ ગયા છે. હાલ અવિરત વરસાદના કારણે નવસારીમાં નદીઓ બે કાંઠે જોવા મળી રહી છે.
સુરતના ઓલપાડ, કિમ અને સાયણ વિસ્તારમાં ધોધમાર વરસાદ
સુરત જિલ્લામાં પણ ઓલપાડ, કિમ અને સાયણ વિસ્તારમાં તેજ પવન સાથે ધોધમાર વરસાદ વરસી રહ્યો છે. એક દિવસના વિરામ બાદ ફરી સુરતમાં વરસાદે રમઝટ બોલાવી છે. સુરતના બારડોલીમાં પણ ધોધમાર વરસાદના કારણે બારડોલી નગરના મુદિત પેલેસથી શાસ્ત્રી રોડને જોડતા માર્ગ પર સ્વામિનારાયણ મંદિર નજીક તોતિંગ લીમડાનું વૃક્ષ ધરાશાયી થયું હોવાની ઘટના સામે આવી છે. જેમાં મુખ્ય માર્ગ પર ઝાડ તૂટી પડતા એક તરફનો વાહનવ્યવહાર અટવાઇ પડ્યો છે. ઝાડ પડતા વીજતારો તૂટી પડતા વીજ પુરવઠો પણ ખોરવાઇ ગયો છે.
ભારે વરસાદની આગાહીને પગલે સુરતમાં કંટ્રોલ રૂમ નંબરો જાહેર કરાયા
હવામાન વિભાગની ભારે વરસાદની આગાહીને પગલે સુરત તંત્ર એલર્ટ થઇ ગયું છે. સુરત જિલ્લા કલેક્ટરે તમામ અધિકારીઓને હેડક્વાર્ટર ન છોડવા માટેની સૂચના આપી છે. 5 દિવસ સુધી ભારે વરસાદની આગાહીના કારણે તંત્ર દ્વારા આ આદેશ જાહેર કરાયો છે. ભારે વરસાદની આગાહીના પગલે સ્થાનિક કંટ્રોલ રૂમના નંબરો પણ જાહેર કરવામાં આવ્યા છે. સુરત માટે 0260-2663200 અને 0261-1077 નંબરો જાહેર કરાયા છે.
નવસારીની પુના, અંબિકા અને કાવેરી નદીઓમાં નવા નીર
દક્ષિણ ગુજરાતના પાંચેય જિલ્લાઓમાં મેઘરાજાની મહેર વર્ષી રહી છે જેમાં ધીમી ધારે વરસી રહેલા વરસાદના કારણે વરસાદની મોસમ જામી છે. નવસારી જિલ્લામાં પણ સવારથી જ વરસી રહેલા વરસાદના કારણે શહેર અને જિલ્લામાં વરસાદી માહોલ છવાયો છે. એક તરફ ખેડૂતોએ ખેતીની શરૂઆત કરી દીધી છે જ્યારે બીજી બાજુ નદીઓમાં પણ નવા નીર આવવાની શરૂઆત થઈ ચૂકી છે. નવસારીની પુના, અંબિકા અને કાવેરી નદીઓમાં નવા નીર આવવાની શરૂઆત થઈ છે. હાલમાં જિલ્લાની સ્થિતિ પર સમગ્ર તંત્ર નજર રાખીને બેઠું છે.
નવસારીના કાલીયાવાડી વિસ્તારમાં ઝાડ પડતા મારુતિ વાનને નુકસાન
આ સિવાય નવસારી શહેરના કાલીયાવાડી વિસ્તારમાં શહેરમાં પ્રવેશવાના મુખ્ય માર્ગ પર મહાકાય ઝાડ પડતા અવરજવર બંધ થઈ ગઇ હતી. ઝાડ પડવાના કારણે મારુતિ વાનને નુકસાન થયું હતું. જો કે, સદસીબે કોઈ જાનહાની ન હોતી થઇ. તંત્ર દ્વારા ઝાડને હટાવવાની કામગીરી હાથ ધરાઇ.