ઈન્દૌરના એક પરિવાર પર કોરોના મહામારીએ કાળો કેર વર્તાયો છે. તેમના યુવાન દિકરાના ફેફસા સંક્રમણને કારણે સંપૂર્ણ રીતે ડેમેજ થઈ ગયા છે. એવામાં સોનુ સૂદ તેમના માટે દેવદૂત બનીને સામે આવ્યો છે.
સોનુ સૂદ સતત લોકોની મદદ કરી રહ્યો છે
ઈન્દૌરના આ સ્ટૂડન્ટના ફેફસા થઈ ગયા છે ડેમેજ
સારવાર માટે આવશે 2 કરોડનો ખર્ચ
આ યુવક લૉનો સ્ટૂડન્ટ છે. તેની ઉંમર માત્ર 25 વર્ષની છે. કોરોનાને કારણે તેના ફેફસા ખરાબ થઈ ગયા છે. સાર્થક અત્યારે જીવન અને મરણની લડાઈ લડી રહ્યો છે. દિકરા પર આ સંકટ જોઈ પરિવાર બેહાલ છે. ઈલાજ માટે 2 કરોડનો ખર્ચ થશે. હવે આટલી મોટી રકમ પરિવાર માટે ભેગી કરવી મુશ્કેલ છે. જેથી પરિવારે લોકોને મદદ કરવા અપીલ કરી.
7 દિવસથી વેન્ટિલેટર પર
સાર્થક હાલમાં મોહક હોસ્પિટલમાં દાખલ છે. તેનું સીઆરપી સ્તર વધ્યું છે અને ઓક્સિજનનું સ્તર ઝડપથી ઘટતું જાય છે. તેની સારવાર શહેરની અન્ય હોસ્પિટલોમાં પણ કરવામાં આવી છે, પરંતુ સાર્થકની હાલત એટલી નાજુક છે કે તેને 7 દિવસથી વેન્ટિલેટર પર રાખવામાં આવ્યો છે. આ યુવકના પિતા નીતિન ગુપ્તા વ્યવસાયે એડવોકેટ છે. તેઓ પરિવારમાંથી તેમના એકમાત્ર દિકરા માટે જે પણ શક્ય બન્યું તે કર્યું છે. હવે સારવાર પાછળ થયેલા આટલા ખર્ચને ધ્યાનમાં રાખીને તેમના માટે આટલી રકમ ભેગી કરવી શક્ય નથી.
મામાએ મદદ માટે કરી અપીલ
ચારે બાજુથી હતાશ અને નિરાશ સાર્થકના મામાએ પણ તેની સારવારમાં મદદ માટે ફિલ્મ સ્ટાર સોનુ સૂદને વિનંતી કરી હતી. સોનુ સૂદ એક એવું વ્યક્તિત્વ છે જેણે કોરોના સંક્રમણમાં દેશમાં દરેક જરૂરિયાતમંદોને મદદ કરી છે. જેની શરૂઆત લોકડાઉન દરમિયાન પરપ્રાંતિય મજૂરોને તેમના ઘરે લઈ જવાની સાથે કરી હતી અને હવે તેનું કામ એક અભિયાન બની ગયું છે.
એર એમ્બ્યુલન્સની રાહ
સાર્થકના મામાએ કહ્યું કે હવે તેની સારવાર હૈદરાબાદના ડોક્ટર કે સુબ્બા રેડ્ડી (અપોલો હોસ્પિટલ) કરશે. સોનુ સૂદ સારવાર કરાવવામાં મદદ કરશે. સાર્થકની સારવાર માટે પરિવાર, મિત્રો અને સમાજના તમામ લોકો સંપૂર્ણ મદદ કરી રહ્યા છે. તેની સારવાર કરતા ચેસ્ટ ફિઝિશિયન ડો. રવિ ડોસીએ જણાવ્યું કે સાર્થકના ફેફસામાં નુકસાન થયું છે. અન્ય અંગો સારી રીતે કામ કરી રહ્યાં છે. કોલકાતાથી એક એર એમ્બ્યુલન્સ આવવાની છે, જે તેને એર લિફ્ટ દ્વારા લઈ જશે, પરંતુ વરસાદને કારણે તે આવી શકી નથી. આ સાથે ડોકટરોની એક ટીમ પણ આવશે, જે જરૂર પડશે તો અહીં જ ઈકમો કરી શકે છે.