અપીલ / નોકરી જોઇતી હશે તો હું આપીશ, પણ મારા નામે આ કામ બંધ કરી દો: સોનુ સૂદ

• ગરીબોના પૈસાની છેતરપિંડી કરતા લોકોને સોનુની અપીલ
• પૈસા માટે આવું ન કરશો
• મારી પાસે આવો હું નોકરી આપીશ

મળતા અહેવાલો પ્રમાણે, આ લોકો સોનુ સૂદના નામ પર છેતરપિંડી કરી રહ્યા છે. ગરીબોના પૈસા લૂંટી રહ્યા છે અને ત્યારબાદ ફરાર થઇ રહ્યા છે. આ પ્રકારની કેટલીક ઘટનાઓ પ્રકાશમાં આવ્યા બાદ સોનુ સૂદે એક સંદેશ સોશિયલ મીડિયામાં આપ્યો હતો. 

જાણો શું કહ્યું સોનુ સૂદે ? 

એક ન્યૂઝ પોર્ટલને આપેલ ઇન્ટરવ્યૂમાં સોનુએ કહ્યું કે, કોઇનું નુકસાન કરીને કોઇ વ્યક્તિ ખુશ રહી શકતી નથી. ગરીબોના પૈસા પડાવી લેવા ખરેખર ખોટી વાત છે અને આવા લોકોને માફ પણ ન કરવા જોઇએ. તો આવા લોકોને ચેતવણી આપતા કહ્યું હતું કે, તમે પકડાઇ જરૂર જશો. 

તમારે પૈસાની જરૂર હોય તો મારી પાસે આવો, હું નોકરી આપીશ

તમારે પૈસાની જરૂર છે અને તમે આ બધુ કરી રહ્યા છો તો મારી પાસે આવો હું તમને નોકરી આપીશ. લોકો સાથે છેતરપિંડી કરીને પૈસા ન પડાવો. કાઇ સારું નહીં થાય.તો સોનુએ એવું પણ કહ્યું હતું કે, જે વ્યક્તિ આવું કરતો ઝડપાય છે તેને સજા આપવાને બદલે તેને સાચા રસ્તે દોરવામાં આવે. તેનું કાઉન્સેલિંગ કરવામાં આવે. 

આજે જ તેલંગણાથી ઝડપાયો છે એક શખ્સ 

હકીકતમાં સોનુની સંસ્થાના એક બેંક ખાતાની સાથે છેતરપિંડી મામલે એક વ્યક્તિની ધરપકડ કરવામાં આવી છે. તેની ઓળખ ચંદન પાંડે તરીકે થઈ છે. પોલીસ તપાસમાં સામે આવ્યું કે સોનુથી જોડાયેલા એક બેંક ખાતામાંથી ચંદને 60 હજાર રૂપિયા ઉપાડ્યા હતા. જોકે, ચંદનનું કહેવું છે કે તેણે કોઈ બીજાના કહેવા પર આ પૈસા ઉપાડ્યા હતા અને તેના બદલે તેને કમીશન મળ્યું હતું. 

સોનુએ કહ્યું - ગુનેગારોને પકડવામાં મદદ કરો

હવે સોનુ સૂદે ટ્વિટર પર સાયબર અને તેલંગાણા પોલીસની પ્રશંસા કરતાં પોતાની પ્રતિક્રિયા આપી છે. તેણે ટ્વિટ કર્યું, 'જરૂરિયાતમંદોને છેતરનારા ગુનેગારોને પકડવામાં અમારી મદદ કરવા બદલ આભાર. હું તમામ છેતરપિંડી કરનારાઓને વિનંતી કરું છું કે તેઓ તેમની પ્રવૃત્તિઓ બંધ કરે નહીંતર તેઓ જેલના સળીયા પાછળ ધકેલી દેવામાં આવશે. ગરીબ લોકોને છેતરવાનું બંધ કરો. '

આ કેસમાં પોલીસ દરોડા પાડી રહી છે

હવે સોનુ સૂદના ચાહકો સોશિયલ મીડિયા પર તેની પ્રશંસા કરી રહ્યાં છે. સાથે જ પોલીસનું કહેવું છે કે આ કેસમાં ઘણાં આરોપીઓના નામ સામે આવ્યા છે અને તેલંગાણા પોલીસ હવે ઉત્તર બિહારના સીતામઢી સહિતના ઘણાં જિલ્લાઓમાં દરોડા પાડી રહી છે.