કોરોના વાયરસ મહામારીના સંકટમાં એક નામ એવું છે જે દરેકના મોઢે ચડી ગયું છે અને એ નામ છે સોનુ સૂદ. જી હાં, અત્યારે ચારેય તરફ સોનુ સૂદની વાહવાહી થઈ રહી છે. કોરોના સંકટમાં જ્યારે પ્રવાસી મજૂરો પગપાળા અનેક પરેશાનીઓનો સામનો કરીને પોતાના વતન જવા નીકળી પડ્યાં ત્યારે સોનુ સૂદ તેમના માટે દેવદૂત બનીને આવ્યો. સોનુએ આ મજૂરોને તેમના ઘરે પહોંચાડવાનું નેક કામ શરૂ કર્યું. તેણે પહેલાં બસોની વ્યવસ્થા કરી પછી ફ્લાઈટ અને હવે ટ્રેનથી મજૂરોને ઘરે મોકલવામાં મદદ કરી રહ્યો છે.
સોનુ સૂદ પ્રવાસી મજૂરો માટે બન્યો દેવદૂત
બસ અને ફ્લાઈટ બાદ હવે આ રીતે પ્રવાસીઓને મોકલી રહ્યો છે ઘરે
સોનુ સૂદના નેક કામની બધાં પ્રસંશા કરી રહ્યાં છે
તમને જણાવી દઈએ કે, સોનુ સૂદ પ્રવાસી મજૂરો માટે મુંબઈ થાણે રેલ્વે સ્ટેશનથી ઉત્તરપ્રદેશ અને બિહાર મોકલવા તેમને વિદા કરવા આવ્યો હતો. સોનુ રાત-દિવસ એક કરીને મજૂરોની મદદ કરી રહ્યો છે અને સોનુના આ નેક કામમાં ઘણાં લોકો જોડાયા છે. સોનુ અને તેની ટીમ 18-18 કલાક મજૂરોની મદદ કરવામાં લાગેલા રહે છે.
સોનુની ટીમ પર પ્રવાસી મજૂરોની મદદ કરવા સતત લાગેલી રહે છે. એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં સોનુ સૂદ સોમવારે મુંબઈથી એક સ્પેશિયલ ટ્રેનમાં પ્રવાસી મજૂરોને બેસાડી વિદા કરી રહ્યો છે. આ દરમિયાન તે મજૂરો માટેની વ્યવસ્થા જોવા પોતે સ્ટેશન પર પહોંચ્યો હતો. સાથે જ તેણે પ્રવાસીઓને સોશિયલ ડિસ્ટન્સિંગ જાળવી રાખવાની પણ સલાહ આપી. આ સાથે જ વીડિયોમાં સોનુ બાળકો અને મહિલાઓના ખાવાપીવાની વ્યવસ્થા અંગે પણ વાત કરતા જોવા મળી રહ્યો છે.
સોનુ સૂદના આ નેક કામમાં મહારાષ્ટ્ર સરકાર તેને ખૂબ મદદ કરી રહી છે. રાજ્ય સરકારોથી પરમિશન લઈને સોનુ સતત પ્રવાસી મજૂરોને તેમના વતન મોકલી રહ્યો છે. તેના ઘણાં વીડિયો અને ફોટોઝ સોશિયલ મીડિયા પર વાયરલ થઈ રહ્યાં છે. હાલના વીડિયોમાં સોનુ સૂદ બધાંને બાય-બાય કહેતો જોવા મળી રહ્યો છે. વીડિયોમાં તે લોકોને અત્યારે ઘરે જવા અને પછી જલ્દી પાછાં આવવાની વાત કહી રહ્યો છે. વીડિયોમાં જોઈ શકાય છે કે, લોકો સોનુ સૂદનો આભાર માની રહ્યાં છે. વીડિયોમાં છેલ્લે તે ટ્રેનને રવાના કરી રહ્યો છે.