નિવેદન / પોતે પ્રધાનમંત્રી બનશે કે નહી તે અંગે સોનુ સૂદે તોડ્યું મૌન, PM મોદી અને રાજીવ ગાંધી પર કરી આ વાત

• પીએમ બનવા પર સોનુ સૂદે જવાબ આપ્યો
• કહ્યું- આ થોડું વધારે થઈ ગયું 
• સોનુ લોકોની મદદ કરીને મસીહા બની ગયો છે 

કોરોનાની બીજી લહેરે કેટલાય પરિવારના સ્વજનોને તેમનાથી દૂર કરી દીધા છે. જ્યારે કોરોના પોતાનો પ્રકોપ વરસાવી રહ્યો હતો. ત્યારે સોનુ સૂદ લોકો માટે મસીહા બનીને આગળ આવ્યો હતો. ગયા વર્ષે લોકડાઉન સમયે પણ તેણે ઘણા લોકોને મદદ કરી અને ઘણા લોકોના જીવ પણ બચાવ્યા હતા. 

સોનુંએ શ્રમિકો માટે ઘણું કર્યું હતું. તેમને પોતાના ગામ પરત મોકલવાથી લઈને તેમના ભોજન અને રહેવાની વ્યવસ્થા પણ સોનુએ ગયા વર્ષે લોકડાઉન સમયમાં કરી હતી. જેના કારણે ગરીબોમાં સોનુ એક મસીહા બની ગયો છે. આ વર્ષે જ્યારે કોરાનાની બીજી લહેર આવી ત્યારે પણ સોનુએ લોકોને ખૂબ મદદ કરી છે. ઓક્સિજન બેડથી લઈને હોસ્પિટલમાં દાખલ થવા માટે સામાન્ય જનતાને તો ઠીક પણ ઘણા ક્રિકેટરો અને સેલેબ્રિટીઝને પણ સોનુએ મદદ કરી છે. 

હુમાએ કહ્યું સોનુને દેશના પ્રધાનમંત્રી હોવું જોઈએ 
આ બધા વચ્ચે સોનુને દેશનું પ્રધાનમંત્રી હોવું જોઈતુ હતું તે વાતે જોર પકડ્યું હતું. જોકે ત્યારે સોનુએ તેનો જવાબ આપતા કહ્યું હતું કે તે ફિલ્મ જગતમાં જ બરાબર છે.
આ વાત ફરી ચર્ચામાં આવી છે જ્યારે હાલમાં જ એક ઈન્ટરવ્યૂમાં હુમા કુરેશીએ આ વાતની ઈચ્છા જાહેર કરી છે.  હુમાએ કહ્યું કે સોનુ સૂદ લોકોની મદદ કરી રહ્યા છે. તેને દેશનું પ્રધાનમંત્રી હોવું જોઈએ. તેના પર હવે એક્ટરે જવાબ આપ્યો છે. 

સોનુએ પીએમ બનવાની વાત પર આપ્યો જવાબ 
સોનુએ હુમાની આ વાત પર જવાબ આપતા કહ્યું કે પીએમ બનવું તેનું કામ નથી. પીએમ બનવાની વાત થોડી વધારે થઈ ગઈ. આ હુમાની અચ્છાઈ છે પરંતુ હું કહેવા માંગુ છું કે હું આ સન્માનનો હકદાર નથી. મેં જરૂરથી કોઈ સારૂ કામ કર્યું હશે. જેથી તેમણે મને આ સન્માનને લાયક સમજ્યો. પરંતુ હું તેના પર સહમત નથી. મને લાગે છે કે આપણી પાસે સક્ષમ પ્રધાનમંત્રી છે. 

સોનુ આ કારણે નથી લેવા માંગતા પ્રધાનમંત્રીની જવાબદારી 
પીએમની જવાબદારી ન લેવા અંગે એક્ટરે કહ્યું કે આ જવાબદારી લેવા માટે તે ખૂબ નાના છે. જોકે ફક્ત 40 વર્ષની ઉંમરમાં રાજીવ ગાંધી પીએમ બની ગયા હતા. પરંતુ તે સમયે તેમની પરિસ્થિઓ અલગ હતી. હું ન તો રાજનૈતિક પરિવારમાંથી આવું છું ન મારો કોઈ એવો અનુભવ છે. ઘણા લોકો મારા આ વિચારથી સહમત નથી પરંતુ હું ફક્ત કામ કરવા માંગું છું. હું સામાન્ય માણસના દુખોને સમજી રહ્યો છું. મને લાગે છે કે સત્તામાં કોઈ પદ પર રહ્યા વગર પણ તમે તમારૂ કામ સારી રીતે કરી શકો છો.