આંતરિક હલચલ / કોંગ્રેસમાં વરિષ્ઠ નેતાઓની ધીરજ ખૂટી જતાં સોનિયા ગાંધી મેદાનમાં, લીધો મોટો નિર્ણય

• કોંગ્રેસની અંદર આંતરિક હલચલ તેજ 
• અસંતુષ્ટ નેતાઓની સાથે સોનિયા ગાંધી કાઋ શકે છે વાતચીત 
• 19 મી ડિસેમ્બરે યોજાનારી છે આપાતકાલીન બેઠક 

નોંધનીય છે કે તાજેતરમાં જ પાર્ટીના 23 વરિષ્ઠ નેતાઓએ સોનિયા ગાંધી ને એક પત્ર લખીને પક્ષની પરિસ્થિતિ અંગે નારાજગી વ્યક્ત કરી હતી, ત્યારબાદ આ કટોકટી સતત વધુ તીવ્ર બની રહી છે. એક જૂથના નેતાઓનું કહેવું છે કે જો તાત્કાલિક કોઈ પગલા લેવામાં નહીં આવે તો પાર્ટીમાં મોટા ભાગલા પડી શકે છે. 

જાન્યુઆરીના બીજા અઠવાડિયામાં નવા પ્રમુખની પસંદગી થઈ શકે છે 

સૂત્રોના જણાવ્યા અનુસાર 19 ડિસેમ્બરની બેઠક ખૂબ જ મહત્વપૂર્ણ બનવા જઈ રહી છે જેમાં નેતાઓ આગળના માર્ગમેપ વિશે સ્પષ્ટ રીતે વાત કરી શકે છે. એવી ચર્ચા છે કે જાન્યુઆરીના બીજા અઠવાડિયામાં પાર્ટી નવા પ્રમુખની પસંદગી કરી શકે છે. આ માટેની પ્રક્રિયા પણ શરૂ થઈ ગઈ છે. 

સૂત્રોના જણાવ્યા અનુસાર પાર્ટીના કેટલાક વધુ નેતાઓ 23 નેતાઓના સમર્થનમાં આવ્યા છે અને સોનિયા ગાંધી ને તાકીદે દરમિયાનગીરી કરવાની માંગણી કરી રહ્યા છે. પાર્ટીના એક વરિષ્ઠ નેતાએ જણાવ્યું હતું કે, પાર્ટીમાં ટોચનાં સ્તર પરના નેતૃત્વની કટોકટી હવે રાજ્યો પર અસર થવા લાગી છે અને જૂના વિવાદો ફરી શરૂ થઈ રહ્યા છે. રાજસ્થાનમાં ફરી એકવાર રાજકીય કટોકટીના સમાચાર સામે આવી રહ્યા છે.

માત્ર રાહુલ ગાંધીના નામ પર જ સંમતિ સાધી શકાય છે 

સૂત્રોના જણાવ્યાનુસાર એવી માહિતી બહાર આવી હતી કે કોંગ્રેસ ના હાલના અસંતુષ્ટ નેતાઓ રાહુલ ગાંધી ના ફરીથી અધ્યક્ષ પદ બનવાને સ્વીકારી શકે છે, પરંતુ જો રાહુલ ગાંધી પોતાની સક્રિયતા નથી દેખાડતા અને તેમના કોઈ મનપસંદ ઉમેદવારને પાર્ટી પ્રમુખ માટે ઊભો કરે છે તો આ ઉમેદવારની સામે પડકાર ઊભો કરવામાં આવશે, એટલે કે રાહુલ ગાંધી ના મનપસંદ ઉમેદવારને ટેકો નહીં મળે અને પાર્ટીમાં ભંગાણની સ્થિતિ ઉદ્ભવી શકે છે,  રાહુલ ગાંધી ની ટીમ અંગે પણ વિવાદ છે. 

કમલનાથ મધ્યસ્થી બન્યા?

સૂત્રોના જણાવ્યા અનુસાર, મધ્યપ્રદેશના ભૂતપૂર્વ સીએમ કમલનાથ નારાજ નેતા અને ગાંધી પરિવાર વચ્ચેના અંતરને ઘટાડવા અને પાર્ટીને વર્તમાન કટોકટીમાંથી બહાર કાઢવા મધ્યસ્થીની ભૂમિકા નિભાવી રહ્યા છે. કમલનાથ વચ્ચે આવ્યા બાદ 19 ડિસેમ્બરની બેઠકનો નિર્ણય લેવામાં આવ્યો છે. પાર્ટીમાં અહમદ પટેલના અકાળ અવસાન પછી કમલનાથનું નામ પણ તે પદ માટે સંભવિત ઉમેદવાર તરીકે આગળ વધી રહ્યું છે.