બેઠક / મોટા નેતાઓ સાથે સોનિયા ગાંધીએ બોલાવી અગત્યની બેઠક, આ મુદ્દાઓ પર સરકાર સામે બાંયો ચડાવવાની તૈયારી

• કોંગ્રેસની બેઠક આજે 
• પાર્ટીના વરિષ્ઠ નેતાઓ રહેશે હાજર 
• મોંઘવારીના મુદ્દાઓ પર થઈ શકે છે ચર્ચા 

કોંગ્રેસ અધ્યક્ષ સોનિયા ગાંધીએ પેટ્રોલ-ડીઝલના ભાવમાં વધારો અને અમુક અન્ય મુદ્દાઓ પર સરકારને ઘેરવા માટે રણનીતિ પર ચર્ચા કરવા માટે આજે વરિષ્ઠ નેતાઓની બેઠક બોલાવી છે. આ બેઠકમાં પાર્ટીના મહાસચિવો અને પ્રદેશ પ્રભારી સામેલ થઈ શકે છે. આ ડિજિટલ બેઠકમાં કોંગ્રેસના નેતા પાર્ટીના પ્રસ્તાવિત સંપર્ક અભિયાન પર પણ ચર્ચા કરી શકે છે. 

ભાવ વધારાને લઈને થઈ શકે છે ચર્ચા 
આ બેઠકમાં પેટ્રોલ-ડીઝલ અને જરૂરી ખાદ્ય વસ્તુઓની કિંમતોમાં વધારાના સંદર્ભમાં આગળની રણનીતિ પર ચર્ચા કરવામાં આવશે. બેઠકમાં કોવિડની હાલની પરિસ્થિતિ અને આર્થિક સ્થિતિ પર પણ ચર્ચા થઈ શકે છે. બેઠક બાદ પ્રદેશ કોંગ્રેસ કમિટિઓના અધ્યક્ષોની પણ બેઠક બોલાવવામાં આવશે. 

આગામી વિધાનસભા ચૂંટણીને લઈને પણ થઈ શકે છે ચર્ચા
સોનિયા ગાંધીએ પાર્ટીના વરિષ્ઠ નેતાઓની સાથે આ બેઠક સંસદના મોનસુન સત્ર પહેલા બોલાવી છે. મોનસુન સત્ર જુલાઈમાં થઈ શકે છે. કોંગ્રેસ પેટ્રોલ-ડીઝલની કિંમતોમાં વધારાના મુદ્દાને લઈને પાછલા અમુક અઠવાડીયાથી સરકાર પર સતત હુમલો કરી રહી છે. હાલમાં જ પેટ્રોલ-ડીઝલની કિંમતોની વિરૂદ્ધ કોંગ્રેસે દેશવ્યાપી પ્રદર્શન કર્યું હતું. પરંતુ પેટ્રોલ-ડીઝલની કિંમતો સતત વધી રહી હોવાના કારણે ઘણા રાજ્યોમાં પેટ્રોલ 100ને પાર થઈ ગયું છે. એવામાં કોંગ્રેસ ફરી એક વખત રસ્તાઓ પર ઉતરવાની તૈયારી કરી રહી છે. સૂત્રોના જણાવ્યા અનુસાર કોરોના સંક્રમણને લઈને કોંગ્રેસ દ્વારા શરૂ કરવામાં આવેલા સર્વેને લઈને પણ ચર્ચા કરવામાં આવશે. આ ઉપરાંત અન્ય મુદ્દાઓ અને રાજનૈતિક પરસ્થિતિઓને લઈને વિચાર કરવામાં  આવશે જેમાં આગામી વિધાનસભા ચૂંટણી જેવા મુદ્દા પણ સામેલ હશે.