નિવેદન / માતા માટે વોટ માંગવા ગઇ સોનાક્ષીએ કહ્યુ કે, 'દિકરી તરીકે જનસભા રૈલીમાં ગઇ હતી'

ચારેક દિવસ પહેલાં સોનાક્ષી સિન્હાએ પોતાની માતા પૂનમ સિન્હાનો પ્રચાર કરવા માટે લખનઉમાં એક ઈલેક્શન રેલીમાં હાજરી આપી હતી. પૂનમ સિન્હા સમાજવાદી પાર્ટીની ટિકિટ પર લખનઉથી લોકસભાની ચૂંટણી લડી રહ્યાં છે. તે ઈલેક્શન રેલીમાં સોનાક્ષીની સાથે તેનો ભાઈ કુશ સિન્હા પણ હાજર હતો. આ બાબતે હવે સોનાક્ષીએ ચોખવટ કરી છે કે, 'હું ત્યાં સેલિબ્રિટી તરીકે નહીં, પરંતુ દીકરી તરીકે હાજર રહી હતી.'

સોનાક્ષી સિન્હાએ જણાવ્યું કે, 'હું લખનઉમાં મારી મમ્મી સાથે રહીને ખૂબ ખુશ હતી. રેલીમાં લોકોની ભીડ અને તેમનો સપોર્ટ જોઈને ધન્ય થઈ ગઈ. હું ત્યાં સેલિબ્રિટી તરીકે નહીં, પરંતુ એક દીકરીની હેસિયતથી મારી માતાને સપોર્ટ કરવા માટે હાજર હતી.'

રેલી દરમ્યાન સોનાક્ષીએ સપોર્ટર્સને કહ્યું હતું કે, 'હું ખુશ છું કે હું અહીં છું. મારી માતાને મત આપવા માટે હું તમને બધાને અપીલ કરું છું. તે તમારી આશાઓ પર ખરી ઊતરશે.' પૂનમ સિન્હાએ લોકોનો આટલી વિશાળ સંખ્યામાં રેલીમાં જોડાવા બદલ આભાર માન્યો હતો.

સોનાક્ષીના પિતા શત્રુઘ્ન સિન્હા ભારતીય જનતા પાર્ટીને છોડીને કોંગ્રેસ પાર્ટીમાં જોડાયા છે. તેઓ બિહારના પટના સાહિબ સીટ પરથી લોકસભાની ચૂંટણીમાં ઊભા રહ્યા છે. પરંતુ સોનાક્ષી પિતાના કોઈ રોડ શો કે રેલીમાં શામેલ થઇ ન હતી.