હોસ્પિટલમાં દર્દીઓની દેખરેખથી માંડીને ટોઇલેટ સાફ કરવા સુધીની કામગીરી કરતો હતો. આ કામ કરતા સમયે તેના પગમાં છાલા પણ પડી ગયા હતા.
ચંદન પ્રસાદે પિતાને બચાવવા માટે વોર્ડ બોયનું કામ કર્યું
કોરોનાગ્રસ્ત પિતા માટે 16 કલાકની શિફ્ટ કરી
દર્દીઓની સારવારથી લઈને ટોઈલેટ સાફ કરવા સુધીની જવાબદારી ઉપાડી
કોરોના વાયરસ મહામારીની બીજી લહેરે સમગ્ર દેશને અજગરભરડો લીધો છે. આવી સ્થિતિમાં પોતાના સ્વજનોને બચાવવા માટે નાગરિકો રીતસર વલખા મારી રહ્યા છે. પરિવારના સભ્યને સારવાર મળે તે માટે આજીજી કરવી પડી રહી છે. અનેક લોકો કરગરી રહ્યા છે, ત્યારે ઉત્તરપ્રદેશના લખનઉમાં એક પુત્રએ તેના પિતાને બચાવવા માટે હોસ્પિટલમાં વોર્ડ બોયની નોકરી શરૂ કરી દીધી.
વેપારીનો પુત્ર બન્યો વોર્ડ બોય
લખનઉના વેપારી સુરેશ પ્રસાદ કોરોનાગ્રસ્ત થયા અને અચાનક તેમની તબીયત લથડી પડી. શ્વાસ લેવામાં તકલીફ પડતા તેમને DRDOના એક સારવાર કેન્દ્રમાં દાખલ કરવામાં આવ્યા. આવા સમયે સુરેશ પ્રસાદનો પુત્ર ચંદન તેના પિતાની દેખરેખ માટે સાથે રહેવા માગતો હતો પરંતુ હોસ્પિટલના વહીવટી તંત્ર દ્વારા તેને વોર્ડમાં પ્રવેશ આપવામાં ન આવતો હતો. તે પોતાના પિતા સાથે વાત કરી શકતો ન હતો. જેથી તે હોસ્પિટલની આસપાસના શેલ્ટર હાઉસમાં રાત વિતાવતો હતો અને મહામહેનતે પોતાના પિતા અંગેની માહિતી મેળવતો હતો.
પિતા વેન્ટિલેટર પર હતા
અભ્યાસ કર્યા બાદ પિતાના વ્યાપારમાં મદદ કરતો ચંદન પિતાથી સંપર્કવિહોણો થતા ખુબ પરેશાન હતો. ત્યારે તેના પિતાએ તેને એક સંદેશ મોકલ્યો કે તેઓને ખુબ એકલું લાગે છે, હોસ્પિટલમાં સારસંભાળ કરનારુ કોઈ નથી. તેઓ ઘરે આવવા માગે છે. આ માહિતી મળ્યા બાદ ચંદને તેના પિતાને ડિસ્ચાર્જ કરવા માટે હોસ્પિટલને વિનંતી કરી. જોકે, તેના પિતા વેન્ટિલેટર પર હોવાથી તેમને ડિસ્ચાર્જ કરવામાં ન આવ્યા.
પિતાને ન બચાવી શક્યો
બિમાર પિતાને મળવા માટે ચંદને એ જ હોસ્પિટલમાં વોર્ડ બોયની નોકરી સ્વિકારી લીધી. ચંદન હોસ્પિટલમાં 16 કલાકની શિફ્ટ કરતો હતો. તે પોતના પિતાની સાથે અન્ય દર્દીઓને પણ એટલો જ સમય આપતો હતો. હોસ્પિટલમાં દર્દીઓની દેખરેખથી માંડીને ટોઇલેટ સાફ કરવા સુધીની કામગીરી કરતો હતો. આ કામ કરતા સમયે તેના પગમાં છાલા પણ પડી ગયા હતા.
ચંદને પોતાના બિમાર પિતાની સેવા માટે પુત્રધર્મ પુરી લગન સાથે નિભાવ્યો પરંતુ તે કુદરતના કહેર સામે હારી ગયો. રાત દિવસ એક કરીને પણ તે પોતાના પિતાને ન બચાવી શક્યો અને તેના પિતા સુરેશ પ્રસાદનું 6 દિવસ બાદ નિધન થયું.