જમાનો ઘણો બદલાઈ ગયો છે. વાત સંપત્તિની હોય તો પછી તેમાં સહમતિની કોઈ પરવા કરતું નથી. પછી ચાહે તે સંબંધો પિતા-પુત્ર વચ્ચેનાં કેમ ન હોય! વર્તમાન સમયમાં મિલકતનાં ઝઘડા પોલીસ સ્ટેશને વધારે નોંધાતાં જાય છે. ત્યારે તેમાં વધારે એક વિવાદ કાગડાપીઠ પોલીસ સ્ટેશને પહોંચ્યો છે. જેમાં પિતાએ પોતાનાં પુત્ર વિરુદ્ધ છેતરપિંડીનો આરોપ લગાવ્યો છે.
આ છે કાંકરિયા વિસ્તારમાં રહેતાં 90 વર્ષનાં મોહનલાલ. અનેક દિવાળી જોઈ ચૂકેલાં મોહનલાલ એ વાત સારી રીતે જાણી ચૂક્યાં હતાં કે, ઘડપણમાં તેમની જીવનમૂડી જ તેમનો સહારો બનશે. કેમ કે, પુત્રનાં લક્ષણ પારણામાંથી તેઓ જાણી ચૂક્યાં હશે. એટલે જ તેમણે પોતાની તમામ જવાબદારી અદા કરી એક-એક રૂપિયો બચાવ્યો હતો. પરંતુ તેમનાં પુત્રએ પિતા પાસેથી મૂડી ખંખેરી લેવાની રીત નક્કી કરી લીધી હતી.
સિનિયર સિટીઝન મોહનલાલ અને પુત્રવધૂ લતાબેનનું સંયુકત બેંક એકાઉન્ટ હતું. પરંતુ પૌત્રને ન્યુઝીલેન્ડ વિઝા માટે પ્રોસેસનાં ભાગરૂપે પુત્ર વ્યોમેશે પિતા મોહનલાલને ખાતામાં નાણાંકીય સદ્ધરતા બતાવવાનું જણાવ્યું હતું. તેથી પિતા મોહનલાલે એફ.ડી તોડાવી 9 લાખ રૂપિયા પૌત્રનાં એકાઉન્ટમાં જમા કરાવ્યાં હતાં. પરંતુ તે પછી તો લાગ જોઈ ગયેલાં પુત્ર વ્યોમેશે પિતાની જાણ બહાર પુત્ર અને પોતાની પત્ની સાથે મળીને ચેકબુકમાં સાઇન કરીને ટુકડે-ટુકડે 8.50 લાખ રૂપિયા પોતાનાં એકાઉન્ટમાં ટ્રાન્સફર કરાવી દીધાં હતાં. પિતા મોહનભાઈએ પુત્રની છેતરપિંડી સામે સવાલ ઉઠાવ્યાં તો પુત્રએ કંઈક આવો જવાબ આપ્યો.
વૃદ્ધ પિતાને આ વાતની જાણ થતાં તેમને આઘાત તો લાગ્યો પરંતુ તેમણે પુત્રની સાન ઠેકાણે લાવવાં કાગડાપીઠ પોલીસ સ્ટેશન પહોંચીને પુત્ર વિરુદ્ધ ફરિયાદ નોંધાવી છે. વૃદ્ધ પિતાએ પુત્ર વિરુદ્ધ અગાઉ પણ મારામારી કરી હોવાંનો પણ આક્ષેપ કરતી ફરિયાદ નોંધાવી હતી. ત્યારે ફરી એક વખત વૃદ્ધ પિતાએ પુત્ર વિરુદ્ધ છેતરપિંડીનો આક્ષેપ કર્યો છે. પુત્ર વ્યોમેશ પિતા સામે મિલ્કતને લઇને ભેદભાવનો આક્ષેપ કરી રહ્યો છે તો બીજી બાજુ વૃદ્ધ પિતાએ પુત્ર કંઇ જ કમાતો ન હોવાંનો અને ઘર ચલાવવા પોતાનાં પર જ આધાર રાખતો હોવાંનો આરોપ લગાવ્યો છે. આ સાથે જ પોલીસ પાસે મદદની ધા નાખી છે.
વૃદ્ધ મોહનલાલની સારસંભાળ રાખવી તે તેમનાં પુત્રની નૈતિક ફરજમાં આવે છે. પરંતુ જ્યારે માત્ર સંપત્તિની ભૂખમાં સંબંધોની હત્યા થઈ જાય છે ત્યારે આ અપેક્ષા કોની પાસે રાખવી. હાલ તો આ મામલો પોલીસ પાસે પહોંચ્યો છે. આશા રાખીએ એક વૃદ્ધ પિતાને ન્યાય મળી રહે.