ગાંધીનગર / ફરી વખત ટી-શર્ટ પહેરીને આવતા વિમલ ચુડાસમાને ગૃહમાંથી બહાર કઢાયા, તો જાણો ધારાસભ્યએ શું કહ્યું...

• વિમલ ચુડાસમાને ગૃહમાંથી બહાર જવા હુકમ
• ટી-શર્ટ પહેરીને ગૃહમાં આવ્યા હતા
• અધ્યક્ષે અગાઉ પણ સૂચના આપી હતી

ગુજરાત વિધાનસભાનું સત્ર ચાલી રહ્યું છે, ત્યારે આજે સત્ર દરમિયાન ગૃહમાં માસ્ક પહેરવા અને પહેરવેશ અંગે વિધાનસભા અધ્યક્ષ રાજેન્દ્ર ત્રિવેદીએ ટકોર કરી હોવાની ઘટનાઓ સામે આવી ચૂકી છે. થોડા દિવસ અગાઉ અગાઉ વિધાનસભા અધ્યક્ષે વિમલ ચુડાસમાને ટી-શર્ટ પહેરીને ગૃહમાં ન આવવા સૂચના આપી હતી. ત્યારે ધારાસભ્ય  ફરી ટી-શર્ટ પહેરીને ગૃહમાં આવતા તેમને વિધાનસભા ગૃહમાંથી બહાર જવા હુકમ કરાયો હતો. મહત્વનું છે કે અધ્યક્ષે અગાઉ વારંવાર સૂચના આપી હતી. અધ્યક્ષના હુકમનો અનાદર કરતા તેમને ગૃહમાંથી બહાર કઢાયા છે.

ભાજપના મંત્રીઓ ટી-શર્ટ પહેરે ત્યારે કોઈ એક્શન નથી લેવાતાઃ વિમલ ચુડાસમા

ત્યારે ગૃહમાંથી બહાર મુદ્દે વિમલ ચુડાસમાએ કહ્યું કે, 2021ની સદીમાં ટી-શર્ટ પહેરવી તે ગુનો છે? હું મારા વિધાનસભા વિસ્તારમાં પણ ટી-શર્ટ જ પહેરુ છું. ભાજપના મંત્રીઓ ટી-શર્ટ પહેરે ત્યારે કોઈ એક્શન નથી લેવાતા. અન્ય મંત્રીઓ ટી-શર્ટ પહેરે ત્યારે તેને કેમ કોઈ ટકોર નથી કરાતી? મારી પાસે આ જ કપડા છે એટલે હું ટી-શર્ટ પહેરુ છું. નિયમો ગૃહના તમામ સભ્યો માટે એક સરખા હોવા જોઈએ. સવા ત્રણ વર્ષ સુધી હું ટી શર્ટ પહેરીને આવ્યો ત્યારે વાંધો ન આવ્યો. નહીં તો બધાને સરખા કપડા પહેરવાનો કાયદો પસાર કરો.

10 માર્ચે વિધાનસભા અધ્યક્ષે વિમલ ચુડાસમાને કરી હતી ટકોર

વિધાનસભાના સત્ર દરમિયાન વિધાનસભાના અધ્યક્ષ રાજેન્દ્ર ત્રિવેદીએ વેરાવળના ધારાસભ્યને કપડા પહેરવા મામલે ટકોર કરી હતી. વેરાવળના કોંગ્રેસના ધારાસભ્ય વિમલ ચુડાસમા ગૃહમાં ટી શર્ટ પહેરીને આવતા વિધાનસભાના અધ્યક્ષ રાજેન્દ્ર ત્રિવેદીએ કહ્યું કે, ગૃહમાં શોભે એવા કપડા પહેવાનું રાખો.