આ વર્ષે ૯૧મી ઓસ્કાર એવોર્ડ સેરેમની કોઇ હોસ્ટ વગર થશે. કોઇ એક હોસ્ટ રાખવાના બદલે સેરેમનીના અલગ અલગ ભાગમાં કેટલાક હોલિવૂડ સેલિબ્રિટીઝ દ્વારા એવોર્ડ આપવામાં આવશે.
છેલ્લાં ૩૦ વર્ષમાં આવું પહેલી વાર થશે જ્યારે ઓસ્કાર સેરેમની કોઇ હોસ્ટ વગર યોજાશે. ઓસ્કાર સેરેમની ર૪ ફેબ્રુઆરીએ (ભારતીય સમય મુજબ રપ ફેબ્રુઆરી સવારે ૬-૩૦ વાગ્યે) હોલિવૂડના ડોલ્બી થિયેટરમાં યોજાશે.
૧૯ર૯માં પહેલી વાર ઓસ્કાર એવોર્ડ આપવામાં આવ્યા હતા ત્યારથી અત્યાર સુુધી ૧૯૩૯ ૧૯૬૯ ૧૯૭૦ ૧૯૭૧ અને ૧૯૮૯ એમ પાંચ વાર હોસ્ટ વગર ઓસ્કાર સેરેમની યોજાઇ હતી.
હવે ઓર્ગેનાઇઝરને એવોર્ડ પ્રેઝન્ટ કરવા માટે એ-લિસ્ટ સેલિબ્રિટીઝ શોધવામાં મુશ્કેલી પડી રહી છે. કોમેડિયન કેવિન હાર્ટ આ વખતે સેરેમની હોસ્ટ કરવાના હતા પરંતુ કેવિનની પસંદગી બાદ તેના દ્વારા ખૂબ જ પહેલાં કરાયેલાં કેટલાંક વિવાદિત ટ્વિટ વાઇરલ થવા લાગ્યાં અને યુઝર્સે કેવિનને હોસ્ટ તરીકે પસંદ કરવાની ખૂબ જ ટીકાઓ કરી. કેવિને આ ટ્વિટમાં સમલૈંગિકતાના વિરોધમાં વિચાર પ્રદર્શિત કર્યા હતા જોકે આ ટ્વિટ ખૂબ જ જૂનાં હતાં.
ઓસ્કારના નિર્માતાઓએ કેવિનને પોતાના ટ્વિટ માટે માફી માગવા કહ્યું. કેવિને માફી માગવાનો ઇનકાર કરતાં પોતાની જાતને શોથી અલગ કરી લીધી.