તૈયારીના દાવા પોકળ! / ક્યાંક તાળાં તો ક્યાંક માત્ર ગંદકી: સુરતથી લઈને રાજકોટ સુધી જુઓ કોવિડ હોસ્પિટલના કેવા છે હાલ

• અરવલ્લીમાં મોડાસાની કોવિડ હોસ્પિયલ બિસ્માર હાલતમાં
• હોસ્પિટલમાં ઓક્સિજન પ્લાન્ટ પણ ખાઈ રહ્યો છે ધૂળ
• સુરતની કોવિડ હોસ્પિટલમાં ગંદકીના સામ્રાજ્યના દ્રશ્યો સામે આવ્યા
• આજથી 300 બેડ તૈયાર થવાની વાતો પોકળ 

સમગ્ર વિશ્વ ત્રણ વર્ષ બાદ પણ વૈશ્વિક મહામારી કોરોનાના સંક્રમણમાંથી સંપૂર્ણપણે મુક્ત થઈ શક્યું નથી અને આ મહામારી ગમે ત્યારે ફરી માથું ઉચકે છે. છેલ્લા કેટલાક દિવસોથી આ મહામારીથી ચીનની દશા માઠી બની છે. ત્યારે ચીન સહિતના દેશોમાં સતત વધી રહેલા કોરોનાના કેસોને પગલે રાજ્ય સરકાર એલર્ટ થઈ ગઈ છે. આજની કેબિનેટની બેઠકમાં પણ કોરોના અંગે મહત્વપૂર્ણ ચર્ચા કરવામાં આવી હતી. 

જિલ્લા આરોગ્ય અધિકારીઓને લખવામાં આવ્યો પત્ર 
વિદેશમાં વધેલા કોરોના કેસોને પગલે રાજ્યભરના જિલ્લા આરોગ્ય અધિકારીઓને અટકાયતી પગલા લેવાની સૂચના આપવામાં આવી છે. અધિક નિયામક આરોગ્ય દ્વારા જિલ્લા આરોગ્ય અધિકારીઓને પત્ર લખવામાં આવ્યો છે. જેમાં રાજ્યમા કોવિડના કેસ વધે નહી તેના અટકાયતી પગલાં લેવા સૂચના આપવામાં આવી છે. સાથે જ કેન્દ્ર સરકારની માર્ગદર્શિકા પણ જિલ્લાઓને મોકલાઈ છે. 

મોડાસાની કોવિડ હોસ્પિટલ બિસ્માર હાલતમાં
એક તરફ કોરોનાને લઈને તમામ સંબંધિતોને એલર્ટ રહેવા અને તકેદારી વધારવા જણાવામાં આવી  રહ્યું છે તો બીજી તરફ અરવલ્લીમાં મોડાસાની કોવિડ હોસ્પિટલ બિસ્માર હાલતમાં જોવા મળી છે. આ હોસ્પિટલ કોરોનાની ચોથી લહેર સુધી કાર્યરત હતી. જોકે, આજે VTVની ટીમ જ્યારે કોવિડ હોસ્પિટલ ખાતે પહોંચી ત્યારે કોવિડ હોસ્પિટલમાં તાળા લાગેલા જોવા મળ્યા હતા. સાથે જ હોસ્પિટલમાં ઓક્સિજન પ્લાન્ટ પણ ધૂળ ખાઈ રહ્યો છે. હોસ્પિટલની અંદર ધૂળની ડમરીઓ જોવા મળી રહી છે. મોડાસામાં કોરોનાની પાંચવી લહેરની દસ્તક વચ્ચે તંત્રની ઘોર બેદરકારી સામે આવી છે.

સુરત સિવિલ તંત્રનો દાવો પોકળ!
સુરતમાં કોરોનાને લઇ તમામ તૈયારીના દાવા પોકળ સાબિત થયા છે. કોવિડ હોસ્પિટલમાં ગંદકીના સામ્રાજ્યના દ્રશ્યો સામે આવ્યા છે. હોસ્પિટલમાં કોરોનાની તૈયારીઓના દાવા વચ્ચે ગંદકીના દ્રશ્યો સામે આવ્યા છે. કોવિડ હોસ્પિટલમાં કોઈપણ પ્રકારની તૈયારી જોવા મળી નથી. હોસ્પિટલમાં તૈયારીમાં દાવા વચ્ચે કોઈપણ તૈયારી જોવા મળી નથી. 300 બેડ તૈયાર કરવાની તૈયારી આજથી શરુ થવાની વાતો પોકળ સાબિત થઈ છે. તો હોસ્પિટલ તંત્ર દ્વારા કોવિડ હોસ્પિટલમાં ફાયર સેફ્ટીની કામગીરી ચાલી રહી હોવાનો દાવો કરવામાં આવ્યો છે. 

રાજકોટ સિવિલમાં 100 બેડની હોસ્પિટલ તૈયાર
કોરોનાની સ્થિતિને લઇ રાજકોટ સિવિલ તંત્ર એલર્ટ થઈ ગયું છે. સિવિલમાં 100 બેડની હોસ્પિટલ કાર્યરત કરવામાં આવી કરવામાં આવી છે. આ 100માંથી 64 ICU બેડ અને 36 ઓક્સિજન બેડ તૈયાર કરાયા છે. આ ઉપરાંત ઓક્સિજન અને દવાના જથ્થાની સમીક્ષા કરાઇ છે. તબીબ અને નર્સિંગ સ્ટાફને તૈનાત રાખવામાં આવ્યા છે. આપને જણાવી દઈએ કે, અત્યારે રાજકોટ સિવિલમાં એકપણ દર્દી દાખલ નથી.