કાર્યવાહી / પોપ્યુલર બિલ્ડર રમણ પટેલની 600 કરોડની જમીન પચાવવાના આરોપ હેઠળ ધરપકડ

• પોપ્યુલર બિલ્ડરના રમણ પટેલની ધરપકડ
• 600 કરોડની જમીન પચાવવાનાનો લાગ્યો આરોપ
• પહેલા પણ પુત્રવધુને ત્રાસ આપવાના કેસમાં નોંધાઇ હતી ફરિયાદ 

અમદાવાદમાં પોપ્યુલર બિલ્ડરના માલિક રમણ પટેલે વર્ષ 1993-94માં થલતેજની જમીન સોમેશ્વર દર્શન ખેતી સહકારી મંડળીના નામે ખોટા બાનાખત અને વેચાણ દસ્તાવેજથી પચાવી પાડી હતી. જેને લઇ જમીન માલિક બાબુજી ઠાકોરે સોલા પોલીસ સ્ટેશનમાં રમણ પટેલ, સંદીપ પ્રજાપતિ વિરુદ્ધ છેતરપીંડી, વિશ્વાસઘાત અને ગુનાહિત ષડયંત્રની ફરિયાદ નોંધાવી હતી.

ઉલ્લેખનીય છે કે રમણ પટેલે જમીનનો પહેલા દસ્તાવેજ કર્યો અને ત્યારબાદ અમુક વર્ષ પછી તે જમીનની પાવર ઓફ એટર્ની બનાવતા આ કૌભાંડ સામે આવ્યું હતું. જેને પગલે હાલ તો પોલીસે રમણ પટેલ ટ્રાન્સફર વોરંટના આધારે ધરપકડ કરી છે. મહત્વનું છે કે રમણ પટેલ વિરુદ્ધ અગાઉ પણ તેની પુત્રવધુ શારીરિક-માનસિક ત્રાસ અને ફરિયાદ કરી હતી. ત્યારબાદ જમીન-મકાનના કૌભાંડમાં વધુ ત્રણ ફરિયાદ વસ્ત્રાપુર પોલીસ સ્ટેશન ખાતે નોંધાઇ હતી.

પોલીસની ટીમે તેની ઓફીસમાં સર્ચ ઓપરેશન હાથ ધર્યું 

મહત્વનું છે કે આ મહિનામાં પોપ્યુલર બિલ્ડરની મુશ્કેલી ફરી વધી હતી જ્યારે પોલીસની ટીમે તેની ઓફીસમાં સર્ચ શરૂ કર્યુ હતું. આ જ જમીન અને ઓફિસ પચાવી પાડવાના કેસમાં પુરાવા મેળવવા માટે નવેમ્બરના શરૂઆતના સપ્તામાં તપાસ શરૂ કરાઈ હતી. આ મામલે રમણ પટેલ અને દશરથ પટેલ એમ પોપ્યુલર બ્રધર્સના બાદમાં રિમાન્ડ મંજૂર કરવામાં આવ્યાં હતાં. સાબરમતી જેલમાંથી વસ્ત્રાપુર પોલીસે આ મામલે કબજો લીધો હતો. 

શું છે કેસ

અમદાવાદના વસ્ત્રાપુર પોલીસ સ્ટેશનમાં રમણ પટેલ સહિત 9 લોકો સામે મુંબઈમાં રહેતા ફરિયાદી ચંચલબેનની થલતેજની જમીન ખોટી સહી કરાવીને પચાવી પાડવાના આરોપમાં ફરિયાદ નોંધાઈ હતી. આશરે 10000 ચો.મી જમીન હડપી લેવાનો આરોપ ફરિયાદીએ લગાવ્યો હતો. તેમના પર આરોપ છે કે ખોટી ખેતીની મંડળી બનાવીને સહી કરાવી લીધી હતી.  મહત્વનું છે કે રમણ પટેલ સહિત તેમના ભાઈ દશરથ પટેલ અને પુત્ર મોનાંગ પટેલ પર પણ ફરિયાદ નોંધાઈ હતી. જેમાં મોનાંગ અને દશરથ પટેલ અગાઉથી જ પુત્રવધુના ઘરેલુ હિંસાના આરોપોમાં જેલમાં છે.