શહેરમાં 'વૃક્ષો વાવો, વરસાદ લાવો' તેમજ પર્યાવરણની જાળવણીના આશય સાથે ચોમાસામાં સરકાર અને સામાજિક સંસ્થાઓના સહયોગથી વૃક્ષારોપણના કાર્યક્રમો આયોજિત કરાતા હોય છે ત્યારે રાજ્ય સરકારના આરોગ્ય અને પરિવાર કલ્યાણ વિભાગના ગુજરાત ઔષધીય વનસ્પતિ બોર્ડ દ્વારા 25 ઓગસ્ટના દિવસે સોલા સિવિલ હોસ્પિટલમાં ઔષધીય વનસ્પતિ રોપાઓનું વિનામૂલ્યે વિતરણ કરવામાં આવ્યું હતું, પરંતુ સોલા હોસ્પિટલમાં આપવામાં આવેલા રોપા રઝળતી હાલતમાં ફેંકી દેવામાં આવ્યા છે.
ઘણા લોકોએ રોપા વિનામૂલ્યે લીધા હતા
તંત્રને જાણ હોવા છતાં સોલા સિવિલના અધિકારીઓ આંખ આડા કરે
સોલા હોસ્પિટલ કેમ્પસમાં ગંદકી અને કચરાના ઢેર જોવા મળી રહ્યા છે
રાજ્ય સરકારના આરોગ્ય અને પરિવાર કલ્યાણ વિભાગના ગુજરાત ઔષધીય વનસ્પતિ બોર્ડ દ્વારા 25 ઓગસ્ટના દિવસે સોલા સિવિલ હોસ્પિટલમાં ઔષધીય વનસ્પતિ રોપાઓનું વિનામૂલ્યે વિતરણ કરવામાં આવ્યું હતું, પરંતુ સોલા હોસ્પિટલમાં આપવામાં આવેલા રોપા રઝળતી હાલતમાં ફેંકી દેવામાં આવ્યા છે. કારણ કે પડી રહેલામાંથી કેટલાક રોપા સુકાઈ ગયા છે તો કેટલાક રોપા તૂટી ગયેલા જોવા મળે છે તો બીજી બાજુ સોલા હોસ્પિટલ કેમ્પસમાં ગંદકી અને કચરાના ઢેર જોવા મળી રહ્યા છે. આ અંગે તંત્રને જાણ હોવા છતાં સોલા સિવિલના અધિકારીઓ આંખ આડા કરે છે
કેમ્પસમાં રોપા રઝળતી હાલતમાં પડ્યા છે
ગુજરાત ઔષધીય વનસ્પતિ બોર્ડ દ્વારા સોલા સિવિલ હોસ્પિટલમાં તુલસી, અરડૂસી, નગોડ, ચંદન, અર્જુન સાદડ, પાનફૂટી, બોરસલ્લી, લીલી ચા અને બીલી જેવા ઔષધીય રોપાનું વિતરણ કરાયું હતું, જેમાં આસપાસના વિસ્તારના લોકો તેમજ સોલા સિવિલ હોસ્પિટલ દર્દીનાં સગાં તેમજ ડોક્ટરોએ આ કાર્યક્રમમાં ભાગ લીધો અને ઘણા લોકોએ રોપા વિનામૂલ્યે લીધા હતા, સોલા સિવિલના ફાર્મસી ડિપાર્ટમેન્ટ નજીક રોપાનું વિતરણ કરાયું હતું, પરંતુ હાલમાં કેમ્પસમાં રોપા રઝળતી હાલતમાં પડ્યા છે, જે પૈકી કેટલાક રોપા સુકાઈ ગયા તો કેટલા રોપા બહાર રસ્તે રઝળતા જોવા મળે છે.
દર્દીઓ સાથે પરિવારજનો ત્રસ્ત
સોલા સિવિલ હોસ્પિટલમાં મોટી સંખ્યામાં શહેરના તેમજ ગ્રામ્ય વિસ્તારના લોકો સારવાર માટે આવે છે ત્યારે હોસ્પિટલના કમ્પાઉન્ડ તેમજ વોર્ડની આજુબાજુ ગંદાં પાણી-ગંદકીનો ફેલાવો થતાં દર્દીઓ સાથે પરિવારજનો ત્રસ્ત બની ઊઠ્યા છે.
દુર્ગંધયુક્ત ગંદા પાણીના કારણે મચ્છરોનો ઉપદ્રવ જોવા મળે છે
કમ્પાઉન્ડમાં કચરાના ઢગ તેમજ ગંદાં પાણી પણ હોસ્પિટલનાં રસ્તા પર જોવા મળી રહ્યાં છે, જેના કારણે દર્દીઓ સારવાર લે તેની સાથે-સાથે તેમનાં પરિવારજનોને પણ સારવાર લેવી પડે તેવો ઘાટ સર્જાયો છે. વોર્ડની પાછળ પારાવાર ગંદકી, દુર્ગંધયુક્ત ગંદા પાણીના કારણે મચ્છરોનો ઉપદ્રવ જોવા મળી રહ્યો છે.
શહેરમાં સ્વાઈન ફ્લૂ-ડેન્ગ્યુ સહિતના રોગચાળા વકરી રહ્યા છે
હોસ્પિટલમાં દરરોજ હજારો લોકોની અવરજવર રહે છે. શહેરમાં સ્વાઈન ફ્લૂ-ડેન્ગ્યુ સહિતના રોગચાળા વકરી રહ્યા છે. તેમ છતાં સોલા સિવિલમાં ગંદકી દૂર કરવાના કે સ્વચ્છતા જળવાઈ રહે તે તેવાં કોઈ પગલાં લેવાયાં નથી. આ અંગે સોલા સિવિલ હોસ્પિટલના ડો. કિરણ ગોસ્વામીનો સંપર્ક થઇ શક્યો ન હતો.