વિખવાદ / APMCની લાખો ટન માટી બારોબાર વેચાઈ...: અમરેલીમાં ભાજપ નેતાઓના જ એકબીજા પર ગંભીર આરોપ 

• સાવરકુંડલા APMCમાં જમીન કૌભાંડનો આક્ષેપ
• ભાજપના નેતાનો APMC શાસકો સામે આક્ષેપ
• APMCના ચેરમેન દિપક માલાણીએ આક્ષેપોને ફગાવ્યા

અમરેલી જિલ્લામાં ભાજપનો જૂથવાદ ફરી એકવાર સામે આવ્યો છે. સાવરકુંડલાના ભાજપ શાસિત APMC માર્કેટ યાર્ડમાં જમીન કૌભાંડ આચરવામાં આવ્યું હોવાનો આક્ષેપ ખુદ ભાજપના જ નેતાએ કર્યો છે. સાવરકુંડલા તાલુકા પંચાયતના પૂર્વ પ્રમુખ અને ભાજપના નેતા ચીમનભાઇ શેખડાએ APMCમાં લાખો ટનનું માટી કૌભાંડ થયું હોવાની ફરિયાદ કરતા ચકચાર મચી જવા પામી છે. સાવરકુંડલા APMCના યાર્ડની જમીનમાંથી લાખો ટન માટી જેસીબી વડે ઉખાડીને ટ્રેકટરો ભરી ભરીને બારોબાર વેચાણ કરવામાં આવ્યું હોવાનો આક્ષેપ કરાયો છે.ખાણ ખનીજ વિભાગની પરવાનગી વગર જ લાખો ટન માટીનું વેચાણ કરવામાં આવતા ભાજપના APMC સત્તાધીશો સામે ચીમનભાઇ શેખડાએ આધાર પુરાવા સાથે ગાંધીનગર સુધી ફરિયાદ કરી છે.

સાવરકુંડલા તાલુકા પંચાયતના પૂર્વ પ્રમુખ અને ભાજપના નેતાએ કરી ફરિયાદ 
સાવરકુંડલા એપીએમસી સેન્ટર પર ભાજપનો કબ્જો છે અને છેલા ઘણા સમયથી આ એપીએમસી પર રાજકારણ ખેલાઈ રહ્યું છે. ભાજપ સામે ભાજપના જ નેતાઓ આક્ષેપ પ્રતિઆક્ષેપો કરતા હોય ત્યારે સાવરકુંડલા એપીએમસીના યાર્ડની જમીનમાંથી લાખો ટન માટીઓ જેસીબી વડે ઉખાડીને ટ્રેકટરો ભરી ભરીને માટીનું બરોબર વેચાણ કરવામાં આવ્યું હોવાની સાવરકુંડલા તાલુકા પંચાયતના પૂર્વ પ્રમુખ અને ભાજપના નેતા ચીમન શેખડાએ ફરિયાદ કરતા ચર્ચા જાગી છે.  

ટ્રેક્ટરના નંબર, પહોંચો સહિતના  આધારપુરાવા સાથે ફરીયાદ 
ભાજપના નેતા ચીમનભાઇ શેખડાએ જિલ્લા રજીસ્ટર ખાણ ખનીજ વિભાગને ટ્રેક્ટરના નંબર, પહોંચો સહિતના  આધારપુરાવા સાથે ફરીયાદ કરી છે. આ પ્રકરણમાં ઊંડી તપાસ કરીને દોષીતો સામે કડક કાર્યવાહી કરવાની ચીમનભાઇ શેખડાએ માંગ ઊઠાવાતા ચકચાર મચી છે. ત્યારે સત્તાધીશ એપીએમસીના ચેરમેન દિપક માલાણીએ આક્ષેપો અંગે જણાવ્યું હતું કે પહોંચ અને કૌભાંડ બન્ને સાથે શક્ય નથી. સાવરકુંડલા એપીએમસીના માટી કૌભાંડનું ભૂત ધૂંણતાં વિધાનસભાની ચૂંટણી અગાઉ જ ભાજપ સામે ભાજપ આવતા આગળના દિવસોમાં રાજકારણના નવા રૂપરંગ સામે આવશે સમાઇ જશે તે જોવું રહ્યું!