સર્વે / સોશિયલ મીડિયા પર આમ આદમી જ શહેનશાહ, કંપનીઓ પાછળ રહી ગઇ

• સોશિયલ મીડિયા પર 79 ટકા સામગ્રી સામાન્ય લોકો દ્વારા થાય છે અપલોડ
• સર્વે અનુસાર, સોશિયલ મીડિયા પર બ્લોગર્સની સંખ્યામાં થયો ઘટાડો
• યુઝર્સ પૈકી 69 ટકા લોકો સો.મીડિયા પર ફોટો-વીડિયો કરી રહ્યા છે શેયર

તેનું કારણ એ છે કે સોશિયલ મીડિયા પર 79 ટકા સામગ્રી જ સામાન્ય લોકો દ્વારા અપલોડ થાય છે. 2013માં આ આંકડો માત્ર 8 ટકા હતો. સોશિયલ મીડિયા પર આપણે દરરોજ ફોટો-વીડિયો સહિતની તમામ પ્રકારની સામગ્રી શેર કરી રહ્યાં છીએ.

સોશિયલ મીડિયા પરની સામગ્રી પર પોસ્ટ કરાયેલ ડેટા અંગેનો રિપોર્ટ ઓક્સફર્ડ યુનિવર્સિટીની ઇન્ટરનેટ ઇન્સ્ટિટ્યૂટ દ્વારા બહાર પાડવામાં આવ્યો છે. રિપોર્ટમાં કહેવામાં આવ્યું છે કે તમે સોશિયલ મીડિયા પ્લેટફોર્મ જેમ કે ફેસબુક, હેલો, ટ્વિટર અને વ્હોટ્સએપ વગેરે પર જે કન્ટેન્ટ જોઈ રહ્યા છો તેમાં 79 ટકા પાછળ લોકો અને બાકીના માટે કંપનીઓ અથવા ઓર્ગેનાઇઝ્ડ ગ્રુપ્સ જવાબદાર છે. 

યુનિવર્સિટીએ સર્વે બાદ જણાવ્યું હતું કે બ્લોગર્સની સંખ્યા સતત ઓછી થઈ રહી છે. સ્થિતિ એવી બની છે કે બ્લોગર્સની સંખ્યા ઘટીને સાવ અડધી થઈ ગઈ છે. રિપોર્ટ અનુસાર ઇન્ટરનેટ યુઝર્સ પૈકીના 69 ટકા લોકો સોશિયલ મીડિયા પર ફોટા અને વીડિયો શેર કરી રહ્યા છે. જ્યારે સોશિયલ મીડિયા પર ફક્ત 14 ટકા લોકો જ લખે છે. 

બીજી બાજુ ઓનલાઇન ખરીદી કરતા લોકોનું પ્રમાણ પણ વધી રહ્યું છે. 2013માં જ્યાં આ સંખ્યા 59 ટકા હતી જે હવે વધીને 83 ટકા થઇ છે. બીજી તરફ ઓનલાઇન મૂવી અને ટીવી શો જોવાનું પ્રમાણ પણ વધ્યું છે. હાલમાં 72 ટકા લોકો ઇન્ટરનેટ પર મૂવીઝ અને ટીવી શો જોઈ રહ્યા છે.