ખેડૂતોના આંદોલનની વચ્ચે ટ્વિટર પર અનેક હેન્ડલ પર કાર્યવાહી કરવા માટે કેન્દ્ર સરકાર અને કંપની વચ્ચે વિવાદ થયો હતો જે બાદ હવે ટ્વિટર એક્શન મોડમાં આવ્યું છે અને 97% હેન્ડલ બ્લોક કરી દેવામાં આવ્યા છે.
ભારત સરકાર અને ટ્વિટર વચ્ચે થયો હતો વિવાદ
સરકારના આદેશનું ટ્વિટરે કર્યું પાલન
કેન્દ્રએ જણાવેલા ટ્વિટર હેન્ડલ પર કંપનીએ લીધા એક્શન
97% અકાઉન્ટને બ્લોક કરવામાં આવ્યા
26 જાન્યુઆરીના રોજ દિલ્હીમાં થયેલી હિંસા બાદથી સોશ્યલ મીડિયા પર કાર્યવાહીના કારણે ભારત સરકાર અને ટ્વિટર કંપની વચ્ચે ગજગ્રાહ જોવા મળ્યો હતો. કેન્દ્ર સરકાર સતત ટ્વિટર પર કડક વલણ અપનાવી રહી છે અને ભારતના કાયદા અનુસાર ચાલવા નિર્દેશ આપ્યા છે. જોકે હવે એક રીપોર્ટ અનુસાર ટ્વિટરે ભારત સરકારની વાત માની છે અને 97% અકાઉન્ટને સસ્પેન્ડ કર્યા હતા.
ખેડૂત આંદોલન દરમિયાન વિવાદિત અકાઉન્ટ પર કાર્યવાહી
ખેડૂતોના આંદોલન વચ્ચે ટ્વિટર પર ‘farmers’ genocide’ જેવા હેશટેગ અને ખાલિસ્તાન તથા પાકિસ્તાન દ્વારા દૂષપ્રચારના હેતુથી ચલાવવામાં આવેલ કેમ્પેનની સામે સરકારે કાર્યવાહી કરવા માટે ટ્વિટરને આદેશ આપ્યા હતા. ટ્વિટરના સૂત્રો અનુસાર સરકારે કંપનીને 1,435 હેન્ડલ બતાવ્યા હતા જેના પર કાર્યવાહી કરવાની હતી જેમાંથી 1,398 ટ્વિટર હેન્ડલ બ્લોક કરી દેવામાં આવ્યા છે.
સરકાર લાલચોળ થતાં એક્શનમાં આવી કંપની
એક મીડિયા અહેવાલ અનુસાર કેન્દ્ર સરકાર અને ટ્વિટરના અધિકારીઓ વચ્ચે એક બેઠક કરવામાં આવી હતી જેમાં સરકારે કહ્યું છે કે કેન્દ્ર સરકારે આપેલ યાદીના બધા જ એકાઉન્ટને બંધ કરવામાં આવે જેના જવાબમાં કંપનીએ કહ્યું કે જે અકાઉન્ટ બાકી છે તેમને એક પ્રક્રિયા હેઠળ નોટિસ પાઠવવામા આવી રહી છે. સરકાર સાથે ટ્વિટરના અધિકારીઓની બેઠક બાદ કંપનીના યુઝર્સ પર કાર્યવાહી શરૂ કરી દેવામાં આવી છે જેમાં સરકારને એક યાદી તૈયાર કરીને સોંપવામાં આવી છે. કંપનીએ કહ્યું કે હજુ પણ ઘણા એકાઉન્ટ પર કાર્યવાહી ચાલુ છે અને તેમને નોટિસ મોકલવામાં આવી રહી છે.
ઘણા ટ્વિટર હેન્ડલ પર હજુ કાર્યવાહી ચાલુ, નોટિસ મોકલાઈ
કેન્દ્ર સરકારે જે અકાઉન્ટ આપ્યા હતા તેમાંથી 1,178 એવા હતા જે ખાલિસ્તાન અથવા પાકિસ્તાનથી જોડાયેલા હોવાની આશંકા હતી, આ બધા એકાઉન્ટને બ્લોક કરી દેવામાં આવ્યા છે. 257 ટ્વિટર અકાઉન્ટ દ્વારા વિવાદિત હેશટેગ ચલાવવામાં આવ્યા હતા જેમાંથી 220ને બ્લોક કરી દેવામાં આવ્યા છે. સૂત્રોએ જણાવ્યું કે આમાંથી ઘણા અકાઉન્ટ ડુપ્લિકેટ પણ હોઇ શકે છે. આટલું જ નહીં કારવાં મેગેઝીન અને લેફ્ટના નેતા મોહમ્મદ સલીમના એકાઉન્ટને લઈને કામ કરવામાં આવી રહ્યું છે અને સરકારી સૂત્રોએ ટ્વિટરના આ પગલાંને આવકાર્યું પણ છે.