ક્રિકેટ / તો શું ટીમ ઈન્ડિયામાંથી KL Rahul નું પત્તું કપાઈ જશે? આ 5 ધુરંધર બેટ્સમેન જગ્યા લેવા માટે છે તૈયાર

• KL રાહુલને ટેસ્ટ અને T20 ટીમમાંથી ધીરે ધીરે રજા આપવામાં આવી રહી છે
• કેપ્ટનશિપની સાથે બેટિંગમાં પણ નિષ્ફળ રહ્યો KL રાહુલ
• આ ખેલાડીઓ કેએલ રાહુલની જગ્યા લેવાના માટે દાવેદાર છે

ટીમ ઈન્ડિયાના વાઇસ કેપ્ટન કેએલ રાહુલનું ખરાબ ફૉર્મ ટીમ ઈન્ડિયા માટે ટેન્શનનું કારણ બની ગયું છે. હાલ જ ઓસ્ટ્રેલિયામાં આયોજિત T20 વર્લ્ડ કપમાં કેએલ રાહુલ પ્રદર્શન કરવામાં ફ્લોપ રહ્યો હતો અને આ સાથે જ બાંગ્લાદેશ પ્રવાસમાં પણ તેનું ફોર્મ ખરાબ રહ્યું હતું. આ સાથે જ તે બે ટેસ્ટ મેચમાં તે કેપ્ટનશિપની સાથે બેટિંગમાં પણ નિષ્ફળ રહ્યો હતો. જો કે સતત ખરાબ પ્રદર્શન બાદ હવે KL રાહુલને ટેસ્ટ અને T20 ટીમમાંથી ધીરે ધીરે રજા આપવામાં આવી રહી છે, જો કે ઘણા એવા ખેલાડીઓ છે જે કેએલ રાહુલની જગ્યા લેવાના માટે દાવેદાર છે. આજે અમે તમને એવા પાંચ ખેલાડીઓ વિશે જણાવીશું જે કેએલ રાહુલનું સ્થાન લઈ શકે છે...

1. શુભમન ગિલઃ 
કેપ્ટન રોહિત શર્મા ઓસ્ટ્રેલિયા સામેની ટેસ્ટ સીરિઝ માટે સંપૂર્ણ રીતે ફિટ થયા પછી મેદાનમાં પરત ફરે તેવી શક્યતા છે એવામાં રોહિત સાથે શુભમન ગિલનું ઓપનિંગ કોમ્બિનેશન ટીમ ઈન્ડિયા માટે અસરકારક સાબિત થઈ શકે છે. જણાવી દઈએ કે શુભમન ગીલે બાંગ્લાદેશ પ્રવાસ પર ટેસ્ટમાં સદી પણ ફટકારી છે અને તે હાલ સારા એવા ફોર્મમાં ચાલી રહ્યો છે. આ પહેલા પણ ગિલ અને રોહિત ટેસ્ટ ક્રિકેટમાં ઓપનિંગ કરી ચૂક્યા છે.

2. સંજુ સેમસનઃ 
વિકેટ કીપર બેટ્સમેન સંજુ સેમસનને ટીમ ઈન્ડિયામાં શામેલ થવા માટે વધુ તકો મળી નથી. એવામાં T20માં ઓપનર તરીકે કેએલ રાહુલઇ જગ્યાએ સંજુ સેમસન શ્રેષ્ઠ વિકલ્પ બની શકે છે. જણાવી દઈએ કે T20 ઇન્ટરનેશનલમાં સંજુ સેમસને ચાર મેચમાં ઓપનિંગ કર્યું હતું જેમાં તેને 26.25ની એવરેજ અને 164.06ની સ્ટ્રાઇક રેટથી કુલ 105 રન બનાવ્યા હતા. આ સિવાય ODI ક્રિકેટમાં મિડલ ઓર્ડરમાં સંજુ પણ કેએલ રાહુલનો વિકલ્પ બની શકે છે.

3. ઈશાન કિશન: 
ઈશાન કિશન ટી20માં ઓપનર તરીકે કેએલ રાહુલની જગ્યા લેવા માટે શ્રેષ્ઠ ઉમેદવાર છે. ડાતેને 21 ટી20 મેચ રમી છે જેમાં 29.45ની એવરેજથી 589 રન બનાવ્યા છે. જણાવી દઈએ કે ઇશાન કિશને બાંગ્લાદેશ પ્રવાસ પર ત્રીજી વનડેમાં બેવડી સદી ફટકારી હતી અને આ દર્શાવે છે કે તેની પાસે T20ની સાથે સાથે ODI ક્રિકેટમાં પણ સારું પ્રદર્શન કરવાની ક્ષમતા છે.

4. ઋતુરાજ ગાયકવાડઃ  
ડોમેસ્ટિક ક્રિકેટમાં મહારાષ્ટ્રનો બેટ્સમેન ઋતુરાજ ગાયકવાડ સતત રન બનાવી રહ્યા છે. તાજેતરમાં યોજાયેલી વિજય હજારે ટ્રોફીમાં ઋતુરાજ ગાયકવાડે ચાર સદી ફટકારી હતી અને યુપી સામેની મેચમાં ઋતુરાજે એક ઓવરમાં સાત સિક્સર ફટકારી હતી. એવામાં ઋતુરાજ ગાયકવાડ T20 ક્રિકેટમાં રાહુલનો વિકલ્પ બની શકે છે.

5. પૃથ્વી શૉ: 
પૃથ્વી પહેલા ભારત માટે ઓપનર તરીકે પણ રમી ચૂક્યો છે. અને આ સિઝનની સૈયદ મુશ્તાક અલી ટ્રોફીમાં મુંબઈ માટે સૌથી વધુ રન બનાવનાર બેટ્સમેન પણ રહ્યો છે. જો ભારતીય ટીમ મેનેજમેન્ટ નવી ટીમ બનાવવા માંગે છે તો ખાસ કરીને T20 ફોર્મેટમાં 23 વર્ષીય પૃથ્વી શૉ KL રાહુલનો મજબૂત વિકલ્પ બની શકે છે.