કેદારનાથ / ચાર ધામ યાત્રામાં 52 શ્રદ્ધાળુઓના મોત, ગઇકાલે પણ દુર્ઘટના ઘટતા-ઘટતા રહી ગઈ, જાણો કુલ કેટલા લોકોએ કર્યા દર્શન

ચારધામ યાત્રા ચાલુ છે, ગયા વર્ષોની સરખામણીમાં રેકોર્ડબ્રેક સંખ્યામાં ભક્તો પહાડોમાં સ્થિત ચારેય ધામોની યાત્રા કરી રહ્યા છે. ભીડના કારણે વ્યવસ્થામાં પણ સમસ્યા આવી રહી છે, ત્યારે સામે આવ્યું છે કે ચારધામ યાત્રામાં અત્યારે સુધીમાં 52 લોકોના મોત થઈ ચુક્યા છે. ગઢવાલ કમિશનરે આ માહિતી આપી છે.

જણાવી દઈએ કે ચારધામ યાત્રા માટે એક અઠવાડિયાથી રોકાયેલા લોકોને યાત્રા પર મોકલવામાં આવી રહ્યા છે. હાલ ચારેય ધામોમાં યાત્રા સુચારૂ રીતે ચાલી રહી છે. યાત્રા વ્યવસ્થા સુધારવા માટે સતત પ્રયાસો કરવામાં આવી રહ્યા છે. રોકાવાની જગ્યાઓ પર વિશેષ સેક્ટર મેજિસ્ટ્રેટ તૈનાત કરવા સૂચના આપવામાં આવી છે. સેક્ટર મેજિસ્ટ્રેટ દર બે કલાકે સ્વચ્છતા વ્યવસ્થાનો રિપોર્ટ મોકલશે.

9 લાખથી વધુ લોકોએ કર્યા ચારધામના દર્શન

ગઢવાલ કમિશનરે જણાવ્યું કે 10 મે 2024ના રોજ કેદારનાથ, ગંગોત્રી અને યમુનોત્રીના દરવાજા અને 12 મેના રોજ બદ્રીનાથના દ્વાર ભક્તો માટે ખોલવામાં આવ્યા. ત્યારથી 23 મે 2024 સુધીમાં કુલ 9,67,302 ભક્તો ચાર ધામના દર્શન કરી ચુક્યા છે. 1,79,932 શ્રદ્ધાળુઓએ યમુનોત્રી ધામ, 1,66,191 ગંગોત્રી ધામમાં, 4,24,242 કેદારનાથના અને 1,96,937 શ્રદ્ધાળુઓએ બદ્રીનાથ ધામના દર્શન કર્યા છે. અગાઉના વર્ષોની સરખામણીએ આ વર્ષે પ્રથમ પખવાડિયામાં ભક્તોની સંખ્યા લગભગ બમણી છે. ગઢવાલ કમિશનરે કહ્યું કે ચારધામ યાત્રામાં ભીડ વ્યવસ્થાપન માટે જરૂર પડશે ત્યારે જ NDRF અને ITBPની મદદ લેવામાં આવશે.

નકલી રજિસ્ટ્રેશન પર થઈ કાર્યવાહી

ગઢવાલ કમિશનરે જણાવ્યું કે ચારધામ યાત્રાના શરૂઆતના દિવસોમાં શ્રદ્ધાળુઓની સંખ્યામાં ઝડપથી વધારો થયો અને ટ્રાફિક જામની સમસ્યા પણ ઊભી થઈ. કેટલાક કિસ્સાઓ એવા પણ જોવા મળ્યા હતા જેમાં યાત્રિકોના દર્શન માટે રજિસ્ટ્રેશન પછીના હતા, પરંતુ તેઓએ યાત્રા પહેલા જ શરૂ કરી દીધી. ફેક રજિસ્ટ્રેશનની પણ કેટલીક ફરિયાદો મળી, આ સંદર્ભમાં વિવિધ ટૂર ઓપરેટરો સામે ઋષિકેશમાં ત્રણ, હરિદ્વારમાં 01 અને રુદ્રપ્રયાગમાં 09 એફઆઈઆર નોંધવામાં આવી. ખૂબ જ કડક સૂચના આપવામાં આવી છે કે કોઈ પણ સંજોગોમાં રજિસ્ટ્રેશન વિના અને રજિસ્ટ્રેશનની નિયત તારીખ પહેલાં યાત્રાને મંજૂરી આપવામાં આવશે નહીં.

ચારધામ યાત્રામાં અત્યાર સુધીમાં 52 લોકોના મોત: ગઢવાલ કમિશનર

ગઢવાલ કમિશનરે કહ્યું કે અત્યાર સુધીમાં ચારધામ યાત્રા માટે આવેલા 52 શ્રદ્ધાળુઓના મોત થયા છે. જેમાં મોટાભાગના લોકોની ઉંમર 60 વર્ષથી ઉપર છે. મોટાભાગના મૃત્યુ હાર્ટ એટેકના કારણે થયા છે. ગંગોત્રીમાં 03, યમુનોત્રીમાં 12, બદ્રીનાથમાં 14 અને કેદારનાથમાં 23 શ્રદ્ધાળુઓના મોત થયા છે. ભક્તોની નિયમિત તપાસ કરવામાં આવી રહી છે. ડોકટરો દ્વારા તબીબી સારવાર અને દેખરેખ પછી, ઘણા શ્રદ્ધાળુઓને મુસાફરી ન કરવાની સલાહ આપવામાં આવી રહી છે. તે પછી પણ જો કોઈ શ્રદ્ધાળુ યાત્રાએ જતા હોય તો તેને લેખિતમાં ફોર્મ ભરવાની કાર્યવાહી કરવામાં આવી રહી છે. ગઢવાલ કમિશનરે કહ્યું કે ઉત્તરાખંડની અર્થવ્યવસ્થામાં તીર્થયાત્રા અને પર્યટનનું મહત્ત્વનું યોગદાન છે. ચારધામ યાત્રા રાજ્યની અર્થવ્યવસ્થાને વધારવામાં મહત્ત્વની ભૂમિકા ભજવે છે.

વધુ વાંચો: માંડ-માંડ બચ્યું હેલિકોપ્ટર..., કેદારનાથના દર્શને ગયેલા યાત્રિકોને ધોળા દહાડે ભગવાન દેખાઇ ગયા! સામે આવ્યો ખૌફનાક Video

ગઢવાલ કમિશનરે માહિતી આપી કે કેદારનાથ જતી વખતે એક હેલિકોપ્ટરની હાઈડ્રોલિક સિસ્ટમમાં ટેકનિકલ સમસ્યા આવી હતી, પાયલોટની બુદ્ધિમત્તાને કારણે તેણે સોફ્ટ લેન્ડિંગ કરાવ્યું. તેમાં તમિલનાડુના 06 મુસાફરો હતા, તમામ સુરક્ષિત છે. આ સમગ્ર મામલે યુકાડા દ્વારા આગોતરી કાર્યવાહી કરવામાં આવી રહી છે. યુકાડાએ આ સમગ્ર ઘટનાની જાણ DGCAને કરી છે.