સમગ્ર ઉત્તર ભારતમાં ફરી એક વાર હવામાન ઓચિંતુ પલટાયું છે, દેશના ઘણા ભાગોમાં કડકડતી ઠંડી શરૂ થઈ ગઈ છે અને છેલ્લા ૨૪ કલાક દરમિયાન તામિલનાડુ, કેરળ અને કર્ણાટકના દક્ષિણ ભાગોમાં હળવાથી ભારે વરસાદ પણ પડ્યો છે. આગામી દિવસોમાં તાપમાનમાં પણ ઝડપથી ઘટાડો થવાનો છે.
ભારતીય હવામાન વિભાગે જણાવ્યું છે કે, આજે પણ ભારતના ઘણા વિસ્તારોમાં મુશળધાર વરસાદની આશંકા છે, જેના કારણે કાતિલ ઠંડી વધશે. આઈએમડીએ પહાડી વિસ્તારોમાં ભારે વરસાદ અંગે ચેતવણી જારી કરી છે. હવામાન વિભાગના અધિકારીઓના કહેવા પ્રમાણે કાશ્મીર, હિમાચલ પ્રદેશ, ઉત્તરાખંડ અને લદ્દાખમાં ભારેથી અતિ ભારે વરસાદ અને બરફવર્ષાની આશંકા છે.
હવામાન વિભાગના જણાવ્યા પ્રમાણે, આગામી ૨૪ કલાકમાં દેશના ઘણાં રાજ્યોમાં ભારે વરસાદ સાથે બરફવર્ષા થવાની સંભાવના છે. જમ્મુ-કાશ્મીરમાં ભારે હિમ વર્ષાની આશંકા છે અને ઉત્તરાખંડમાં ભારે વરસાદની સંભાવના છે. મેદાની વિસ્તારો સંપૂર્ણપણે બરફની ચાદરોથી ઢંકાઈ ગયાં છે. બરફ વર્ષા અને વરસાદની સંભાવનાને ધ્યાનમાં રાખીને યલો એલર્ટ જારી કરવામાં આવ્યું છે.
પહાડી વિસ્તારોમાં થતી બરફ વર્ષા મેદાની વિસ્તારો પર પણ અસર કરશે, જેના કારણે શિમલા, સોલન, સિરમૌર, મંડી, કુલ્લુ, ચંબામાં ભારે વરસાદ, કરા અને ગાજવીજ સાથે તોફાની પવન ફૂંકાવાની સંભાવના છે. ઊંચા પહાડી વિસ્તારો કિન્નૌર અને લાહોલ સ્પીતિમાં ભારે બરફ વર્ષાની ચેતવણી પણ આપવામાં આવી છે.
હવામાન વિભાગના જણાવ્યા પ્રમાણે, દિલ્હીની પ્રદૂષણની સ્થિતિ વધુ વિકટ બનશે. એવો અંદાજ છે કે, ગુલમર્ગ, પહેલગાંવ, શિમલામાં ભારે બરફ વર્ષા થઈ શકે છે, જ્યારે ચેન્નઈ અને બેંગલુરુમાં પણ ભારે વરસાદ પડી શકે છે. આ સ્થળોએ વરસાદને કારણે તાપમાન ઘટશે અને કાતિલ ઠંડી વધશે.
દિલ્હી-એનસીઆરમાં ફરી સ્મોગનું આગમન : પ્રદૂષણ વધશે
પંજાબ અને હરિયાણામાં સતત સળગાવવામાં આવી રહેલી પરાળના ધુમાડાથી રાજધાની દિલ્હી અને એનસીઆરમાં વાયુ પ્રદૂષણ સતત ખતરનાક સ્તરે વધી રહ્યું છે. એર ક્વોલિટી ઈન્ડેક્સ (એક્યૂઆઈ) અનુસાર, દિલ્હીના લોધી રોડ વિસ્તારમાં પીએમ ૨.૫નું સ્તર ૨૬૧ હતું, જ્યારે પીએમ ૧૦નું સ્તર ૨૪૯ હતું, જે સ્વાસ્થ્ય માટે અત્યંત ખરાબ છે.
આ અગાઉ ગઈકાલે ગુરુવારે આખો દિવસ સ્મોગની ચાદર દિલ્હી-એનસીઆર પર છવાયેલી જોવા મળી હતી. આજે પણ પ્રદૂષણની પરિસ્થિતિ વધુ બગડવાની આશંકા છે. શનિવારથી પવનની ગતિ થોડી વધશે તો જ વાતાવરણમાં થોડો સુધારો થવાની સંભાવના છે.