જીવલેણ બેદરકારી / ઓનલાઈન મંગાવેલું ખાવાનું હવે ન ખવાય, કેરળના પરિવારે મંગાવ્યા પરોઠા, પેકેટ ખોલીને જોયું તો ઉડ્યાં હોશ

• કેરળના   તિરુવનંતપુરમના એક વ્યક્તિએ હોટલોમાંથી મંગાવ્યા પરોઠા
• પેકેટ ખોલતા ઉડી ગયા હોશ
• ભોજનમાં જોવા મળી સાપની કાંચળી

ઓનલાઈન ફૂડ ઓર્ડર કરીને ખાવાનું ખાતા લોકોએ હવે ચેતી જવાની જરુર છે. આજકાલ હોટલમાંથી મંગાવેલા ભોજનમાં ગમે તેવી વસ્તુ નીકળે છે. ઝડપી ઝડપી વેચી દેવાની ફિરાકમાં રહેલી હોટલ અને રેસ્ટોરન્ટ ખાવાનું પેક કરતા પહેલા જોતી પણ નથી અને સરવાળે જ્યારે પાર્સલ ઘેર આવે ત્યારે તે ખોલીને જોતા હોશ ઉડી જતા હોય છે.

કેરળના પરિવાર સાથે બની ઘટના 

કેરળના તિરુવનંતપુરમના નેદુમંગડમાં એક વ્યક્તિએ ફૂડ પાર્સલ મંગાવ્યું હતું. જો કે ફૂડ પેકેટ ખોલતા જ તેના હોશ ઉડી ગયા હતા. પેકેટ ખોલવામાં આવતા શખ્સને ભોજનમાં સાપની કાંચળી જોવા મળી હતી.  ઘટના 5 મેના રોજ બની હતી જ્યારે પરિવારે હોટલમાંથી જમવાનું મંગાવ્યું હતું. ઓનલાઈન ઓર્ડર આવી જતા પરિવાર ખાવા બેઠો હતો પરંતુ તેમણે જેવું પેકેટ ખોલ્યું કે તેમાં સાપની કાંચળી જોવા મળતા તેમને અરુચિ આવી ગઈ હતી. ખોરાકને લપેટવા માટે ઉપયોગમાં લેવાતા કાગળમાં આ સાપની ચામડી મળી આવી હતી.

આ ઘટના બાદ પરિવારે હોટલ સામે કર્યો કેસ 
આ ઘટનાથી આઘાતમાં આવેલા પરિવાર હોટલ પર કેસ ઠોકી દીધો હતો. ફરિયાદના આધારે પાલિકાના સત્તાધીશો અને પોલીસે આ મામલે તપાસ શરૂ કરી હતી અને હોટેલ હંગામી ધોરણે બંધ કરી દેવામાં આવી હતી.

ઘટના બનતા ફૂડ સેફ્ટી વિભાગ હરકતમાં આવ્યો 

આ મામલો સામે આવ્યા બાદ ફૂડ સેફ્ટી વિભાગે વધુ તપાસ માટે પેકેજ અને ફૂડ જપ્ત કર્યા હતા. પાલિકા દ્વારા હાથ ધરવામાં આવેલી તપાસમાં જાણવા મળ્યું હતું કે, હોટેલ જરૂરી લાઇસન્સ અને પરમિટથી સજ્જ હતી. આ સિવાય હોટલના પરિસરમાં રાખવામાં આવેલા ભોજનમાં કંઈ ખોટું નહોતું. જેના કારણે હોટલને ચેતવણી આપવામાં આવી હતી અને જ્યાં સુધી યોગ્ય સફાઈ ન થાય ત્યાં સુધી હંગામી ધોરણે બંધ રાખવામાં આવી હતી. જો કે, આ પહેલી વાર નથી જ્યારે ભોજનમાં આવી ફરિયાદ મળી હોય.