સામૂહિક બળાત્કાર બાદ યુવતીઓને જીવતી સળગાવવાની હાલમાં બનેલી બે ઘટનાઓ પર દેશભરમાં આક્રોશ વચ્ચે કેન્દ્રીય મહિલા અને બાળ વિકાસ મંત્રી સ્મૃતિ ઇરાની ( Smriti Irani)એ શનિવારે કહ્યું કે અડધી વસ્તીની સુરક્ષા માટે સરકારે દુષ્કર્મના મામલાઓમાં ફાંસીની સજા સુધી જોગવાઇ કરી છે. અને તેનાથી વધારે કડક સજા કોઇ ન હોઇ શકે.
સામૂહિક બળાત્કાર ઘટનાઓ પર દેશભરમાં આક્રોશ
ફાંસીની સજાથી વધારે કડક સજા કોઇ હોઇ ન શકે: સ્મૃતિ ઇરાની
સમાજે 'ચાઇલ્ડ પોર્નોગ્રાફી' જેવા પડકાર વિશે વિચાર કરવો પડશે
તેઓએ કહ્યું કે, સમાજે પણ 'ચાઇલ્ડ પોર્નોગ્રાફી' જેવા પડકાર વિશે વિચાર કરવો પડશે અને માતાપિતાએ પોતાની જવાબદારી સમજતા બાળકોને શીખવવું પડશે કે મહિલાઓ સાથે યોગ્ય રીતે વર્તે. સ્મૃતિ ઇરાનીએ અહીં રોટરી ઇન્ટરનેશનલના આંતરરાષ્ટ્રીય સમ્મેલન દરમિયાન વાતચીતમાં કહ્યું, ચર્ચા એમ પણ થઇ રહી છે કે બળાત્કારના ગૂનેગારો માટે વધુ કડક સજાની જોગવાઇ કરવી જોઇએ.
એવા મામલાઓમાં સરકાર તરફથી ફાંસીની સજા સુધીના કાયદાની જોગવાઇ કરાઇ છે. હવે ફાંસીની સજાથી વધારે કડક સજા કોઇ હોઇ ન શકે. તેઓએ કહ્યું કે સરકારે બળાત્કારના કેસોના ઝડપી ચૂકાદો લાવવા માટે દેશભરમાં 1023 'ફાસ્ટટ્રેક કોર્ટ' સ્થાપિત કરવા માટે નાણાકીય મદદ આપવાનું શરૂ કરી દીધું છે.