ખાડાનગરી / સુરતીલાલાઓના વાહનોનું મેન્ટેનન્સ વધારવા SMC જવાબદાર, મુસાફરોના મણકા ખસેડી નાખે તેવા માર્ગ

• સ્માર્ટ સિટી સુરતમાં મુસાફરોના મણકા ખસેડી નખતા ખાડા
• વરસાદે બદલી સુરતની સૂરત
• શહેરનો એક પણ રોડ નથી રહ્યો વાહન ચલાવવા લાયક

સ્માર્ટ સિટી સુરતની હવે સૂરત બદલાઈ ગઈ છે. સૂરતને સ્માર્ટ સિટી કહેવી કે પછી ખાડાનગરી. તેવી સ્થિતિ જન્મી છે. હવે આ સ્માર્ટસિટીમાં રહેતા લોકોએ પોતાની સાવચેતી જાતે જ રાખવા પડે તેમ છે. કેમ કે SMCના પાપે જે ખાડા પડ્યા છે. જે ખાડા મોતનું મો ફાડીને રોડ પર ઊભા છે. જનતાએ ખોબલે ખોબલે મત આપેને નેતાઓને ચૂંટયા છે. પ્રજાના કાર્યો કરવા પ્રશ્નો સાંભળવા અને તેના ઉકેલ માટે  પણ મત મળ્યા બાદ નેતાઓએ હદે લોકોને મજબૂર કરી દે છે કે લોકોને ગુસ્સો ઠાલવવા સિવાઈ કોઇ રસ્તો રહેતો નથી. ડાયમંડ સિટી તરીકેની ઓળખ ધરાવતા સુરતની હાલ સૂરત બદલાઈ ગઈ છે. સુરત મહાનગરપાલિકાની બેદરકારી કહો કે પછી કોન્ટ્રાક્ટરો સાથેની મિલીભગત. ખાડાના સામ્રાજ્યને પગલે શહેરના એક પણ રોડ વાહન ચલાવવા લાયક ન રહ્યા હોવાનું લોકો જણાવી રહ્યા છે.

લિંબાયત વિસ્તામાં રોડ પર જ મસમોટો ભૂવો પડયો 
સુરત શહેરમાં આવેલ લિંબાયત વિસ્તામાં રોડ પર જ મસમોટો ભૂવો પડયો છે. જેને પગલે વાહન ચાલકો પરેશાન છે. 5 ફૂટથી મોટો ભૂવો પડયો હોવા છતાં SMCના અધિકારીઓને ભૂવાનું પુરાણ કરવામાં રસ નથી. એટલું જ નહિ ભુવાની આસપાસ બેરીકેડ કરવાની પણ તંત્રને ફુરસદ ન હોવાથી લોકોમાં રોષ ફેલાયો છે. એમ્બ્યુલન્સને પણ આ ખાડામાંથી પસાર થવું પડે છે. સ્માર્ટ સિટી સુરતને ખાડાનગરી કહો તો પણ કોઈ નવાઈ નથી. ખાડાના કારણે વાહન ચાલકો પરેશાનીનો સામનો કરી રહ્યા છે. આ ખાડાના કારણે અનેક અકસ્માતો પણ થાય છે. પણ SMCના અધિકારીઓ આળસ ખંખેરાતા નથી. 

અધિકારીઓ અને કોન્ટ્રાક્ટરો ખાડા પુરવા માટે કમર ક્યારે કસશે?
આ સ્થિતિ આખા સુરત શહેરમાં છે. અનેક સ્થળોએ ખાડા પડયા છે. ભૂવા પડયા છે. SMCના અધિકારીઓની નિરસતાના કારણે વાહન ચાલકો પરેશાન થઈ રહ્યા છે. હાલ તો સુરતમાં પડેલા ખાડા શહેરીજનો માટે કમરનો દુઃખાવો વધારી રહ્યા છે પણ SMCના અધિકારીઓ અને કોન્ટ્રાક્ટરો ખાડા પુરવા માટે કમર ક્યારે કસશે તે જોવું રહ્યું.