અત્યાર સુધીમાં સ્માર્ટફોન, કમ્પ્યૂટર અને લેપટોપના હેક થવાના સમાચાર સામે આવ્યા છે, પરંતુ હવે સ્માર્ટ ટીવી હેક થવાની પણ રિપોર્ટ સામે આવી છે. હાલમાં જ સ્માર્ટ ફોન હેક કરીને દંપતીની અંગત પળોને રેકોર્ડ કરવાનો મામલો સામે આવ્યો છે. ત્યારે હવે સવાલ એ ઉભો થાય છે કે સ્માર્ટ ટીવી હેક કેવી રીતે થયું, તથા હેક થવાથી કેવી રીતે બચાવી શકાય.
સ્માર્ટ ટીવી કેવી રીતે થયો હેક?
સ્માર્ટ ટીવીમાં ઇન્ટરનેટ કનેક્શન હોય છે. સ્માર્ટ ટીવીમાં ગૂગલ પ્લે-સ્ટોરને પણ સપોર્ટ મળી રહ્યો છે, જ્યાં લોકો પોતાની જરૂર મુજબ એપ ડાઉનલોડ કરી શકે છે. સ્માર્ટ ટીવીમાં તમે ગેમ પણ રમી શકો છો. સ્માર્ટ ટીવીમાં પણ સ્માર્ટફોનની જેમ એપ્સ અને ઘણા બધા ફીચર્સ મળી રહ્યા છે. એવામાં કોઇ એપની મદદથી ટીવીને હેક કરવું સરળ થઇ ગયું છે. પોલીસમાં નોંધાયેલ મામલાઓમાં કંઇક આવું જ થયું હશે, જેમા હેકરે ટીવી સુધી પહોંચવા માટે કોઇ એવી એપનો સહારો લીધો હશે, જે ટીવીમાં પહેલાથી હાજર હતી. અને તેનો કોઇ લૂપહોલ હેકર્સ જાણી ગયા. બાદમાં હેકરે એ એપની મદદથી હાજર કેમરાને એક્સેસ કર્યો અને બેડરૂમનું રેકોર્ડિંગ કરી લીધું.
કયા ટીવી થઇ શકે હેક?
આપને જણાવીએ કે, દુનિયાના તમામ ડિવાઇસને હેક કરી શકાય છે, જેમા ઇન્ટરનેટ હાજર હોય છે. સ્માર્ટ ટીવીને પણ હેકર્સ હેક કરી શકે છે. જોકે, જ્યાં સુધી કેમેરાનો સવાલ છે. તમામ સ્માર્ટ ટીવીમાં કેમેરો આવતો નથી. કેટલાક પ્રીમીયમ સ્માર્ટ ટીવીમાં કેમેરા ફીચર મળે છે. કેટલાક સ્માર્ટ ટીવીમાં આપવામાં આવેલ કેમેરા ડિફોલ્ટ રૂપે ઓન હોય છે. જ્યારે કેટલાકમાં ઓન કરવા પડે છે. ઘણીવાર કેટલીક એપ ડાઉનલોડ બાદ કેમેરાનું એક્સેસ માંગે છે. ત્યારે કેમેરાનું એક્સેસ સમજી-વિચારીને આપવું જોઇએ.
સ્માર્ટ ટીવી હેક થવાથી કેવી રીતે બચાવી શકાય?
હવે સવાલ છે કે આખરે હેકર્સની નજરથી આપના સ્માર્ટ ટીવીને કેવી રીતે બચાવી શકાય? હેકિંગથી બચવા માટે સૌથી મોટો રસ્તો સાવધાની રાખવાનો છે. જો આપના ઘરમાં સ્માર્ટ ટીવી છે, તો આપ સાવધાની રાખો અને પોતાની પ્રાઇવર્સી જાળવવી. જેમકે-જો આપના સ્માર્ટ ટીવીમાં કેમેરો છે, તો તેના સેટિંગ્સમાં જઇને ઓફ કરી દો. જો જરૂર ન હોય તો તેને ઓન કરવાથી દૂર રહેવું.
જ્યારે કેમેરાને કાળા સ્ટીકર અથવા ટેપથી ઢાંકી દેવો. જો એવી કોઇ એપ કેમેરા એક્સેસ માંગે છે તો જો તમે એ એપ વિશે જાણો છો, ત્યારે જ તેને એક્સેસ આપો. ઉદાહરણ તરીકે તમે ફેસબુકને કેમેરા એક્સેસ આપી શકો છો. સાથે જ, કોઇ થર્ડ પાર્ટી સ્ટોરથી ટીવીમાં એપ ડાઉનલોડ કરવાથી બચવું જોઇએ, ન પેન ડ્રાઇવની મદદથી કોઇ એપ ઇન્સ્ટોલ કરવી જોઇએ.
આ ઉપરાંત ટીવીમાં વૉઇસ કંટ્રોલ માટે માઇક્રોફોન મળે છે, તેને પણ ઓફ કરી દો. જ્યારે ટીવી પર કોઇ અપડેટનું નોટિફિકેશન મળે છે તો, અપડેટ જરૂર કરો.